Փաստ ինֆո

4 երեխաների միմյանց տեսակցելու դատարանի որոշումը երկու ամիս է չի կատարվում, դատարանի որոշմամբ հոր խնամակալության ներքո գտնվող 3 աղջիկները և մոր մոտ գտնվող 3 ամյա տղան՝ պետք է տեսակցեն միմյանց, սակայն ի պատասխան իրավապահ մարմնի գրության՝  «Կանանց աջակցման կենտրոնը» մերժել է: «Փաստինֆո»-ին այս տեղեկությունները հայտնել է երեխաների հայրը՝ Արա Խաչատրյանը՝ արձագանքելով կնոջ փաստաբանների նախօրեին հնչեցրած հայտարարություններին։

Ըստ Խաչատրյանի,  այս տարի հունվարի 4-ին կինը լքել է տունը, ընտանիքը եւ  ոստիկանություն հաղորդում  ներկայացրել, թե， իբր，  դարձել է ընտանեկան  բռնության զոհ եւ ամուսինն իրեն դաժանորեն ծեծի է ենթարկել՝ այդ թվում ոտքով հարվածներ հասցրել դեմքին:

Կինը հաղորդում ներկայացնելիս հայտնել է, որ ամուսնու դեմ բողոք չունի, սակայն օրեր անց ասել է, որ այնուամենայնիվ բողոք ունի,  իսկ հունվարի 13-ին  դատաբժշկական փորձաքննություն է կատարվել:

Հարուցվել է քրեական գործ ՀՀ քրեական օրենսգրքի 118-րդ հոդվածով, սակայն ըստ Խաչատրյանի՝ քրեական գործում որևէ արձանագրություն չկա  առ այն, որ կնոջ մատնանշած վայրում՝ դեմքի հատվածում， առկա է վնասվածք:

Խաչատրյանը քրեական գործով անգամ որպես կասկածյալ չի ներգրավվել:

Այսպիսով՝  ՀՀ քրեական օրենսգրքի 118-րդ հոդվածով քրեական հետապնդում չի իրականացվել՝  հանցակազմի բացակայության հիմքով:

Կինը պարբերաբար ֆիզիկական և հոգեբանական բռնությունների է ենթարկվել ամուսնու կողմից

Քննիչի այս որոշումը վերադասության կարգով Խաչատրյանի կինը բողոքարկել է և այժմ գործը քննվում է Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում:

Արա Խաչատրյանը նշում է, որ կինը ծեծի է ենթարկվել, բայց ոչ իր տանը և ոչ իր կողմից՝  ինչպես որ վերջինս է ներկայացնում:

Այդ դեպքերից հետո Խաչատրյանի կինը երեք ամիս բնակվել է իր հայրական տանը, որից հետո մայրը նրան դուրս է արել և արդեն երկու ամիս է， ինչ գտնվում է «Կանանց աջակցման կենտրոն»-ում:

Տղամարդը նշում է, որ այս հինգ ամիսների ընթացքում անչափահաս աղջիկները չեն տեսակցել իրենց մանկահասակ եղբորը, որդուն չի տեսել նաև ինքը:

Խաչատրյանը նշեց նաև, որ երեխաների միմյանց տեսակցելու հարցով դիմել է «Կանանց աջակցման կենտրոն»-ին,  ապա նաև Ոստիկանության քրեական հետախուզության երրորդ վարչություն՝ խնդրելով աջակցել，  որպեսզի երեխաները տեսակցեն մոր և եղբոր հետ, սակայն  կենտրոնը մերժել է:

Դատարանի որոշումը չկատարելու համար կինը կեղծ փաստաթղթեր  է  ներկայացրել Կանանց աջակցման կենտրոն՝ նշելով, որ իբրև ամուսինը հետապնդել է իրեն, իր կյանքին վտանգ է սպառնում:

Սակայն Խաչատրյանը հայտնում է, որ ինքը դիմել է Արդարադատության նախարարության հարկադիր ծառայությանը՝ որպեսզի ապահովեն դատարանի որոշումը, որը արդեն երկու ամիս է չի կատարվում:

Չորս երեխաների հայրը նշում է, որ կնոջ փաստաբաններն իրականությունը խեղաթյուրված են ներկայացնում, իսկ կենտրոնը անչափահաս աղջիկներին շատ վատ է  ներկայացնում՝ իբրև «ստոր արարածներ»， ովքեր այդքան տարի ծաղրել են մորը, այնինչ հայրը， ում խնամքին իրենց կամքով գտնվում են անչափահաս աղջիկները， հակառակն է պնդում, որ երեխաները շատ բարի և խելացի են և  նույնիսկ այս դժվարությունները նրանց չեն փոխել և չեն չարացրել մոր և ընդհանրապես  մարդկության նկատմամբ:

Նշենք, որ նախօրեին կնոջ փաստաբանները ասուլիս էին տվել և հայտնել, որ երեխաներն անգամ դպրոց չեն հաճախում, այնինչ հայրը հակառակն է պնդում՝ նշելով， որ աղջիկներից երկուսը  հաճախում են ավագ դպրոց, նրանցից մեկը քննությունները գերազանցությամբ է հանձնել, որևէ բացակայություն չունեն Թումո կենտրոնից, հաճախում են նաև դաշնամուրի դասընթացների:

Այս ողջ ընթացքում տղամարդը հոգում է երեք դստրերի խնամքը և ցավով արձանագրում, որ զրկված է որպես ծնող՝ որդու նկատմամբ իր ծնողական պարտականությունները կատարելու հնարավորությունից:

Նա նաև պահանջել է， որ չորրորդ երեխան ևս իր հետ բնակվի， որպեսզի երեխաները միմյանցից չբաժանվեն:

Նշենք, որ երկու խնամակալության նիստեր են եղել և աղջիկները ցանկություն են հայտնել հոր հետ ապրել, ըստ Խաչատրյանի՝ այդ նիստերին ներկա է եղել կնոջ փաստաբանը， ով այսօր վիճակում է, թե խնամակալության հանձնաժողովում մանկավարժ ընդգրկած չի եղել, այն դեպքում, երբ հանձնաժողովի անդամները բոլորը մանկավարժներ են և եղել են նույնիսկ հոգեբաններ:

Տղամարդն առնվազն  տարօրինակ է համարում, որ աղջիկ երեխաները,  եթե նման ծեծի ականատես են եղել， ինչպես նրանց մայրն է ներկայացնում, այդ ամենից հետո մնացել են դաժան հոր մոտ:

Ըստ նրա,  մոր կողմից վախի մթնոլորտ է ստեղծվում, որ նրանց հայրը կհայտնվի անազատության մեջ և երեխաների համար միակ տարբերակը կլինի նրա հետ ապրելը:

Ինչ վերաբերում է ծեծի դրվագով գործի քննությանը, ապա Խաչատրյանը նշեց, որ այն դռնփակ է քննվում, սակայն փաստաբանը ասուլիսի ժամանակ այնպիսի փաստերի մասին է հրապարկել, որով  խախտել է անմեղության կանխավարկածի սկզբունքը:

Կնոջ փաստաբան Նոնա Գալստյանը նաև նշել է, որ հաջորդ դատական նիստում միջնորդելու է որպեսզի  դատահոգեբանական փորձաքննություն նշանակվի երեխաների նկատմամբ, ովքեր， ի դեպ， դատարանում հարցաքննվել են և հայտնել, որ հայրը իրենց մորը ծեծի չի ենթարկել և որ առանց որևէ պատճառի մայրը լքել է տունը՝ թողնելով իրենց առանց ծնողական խնամքի:

Խաչատրյանը խոսքով,  իր կնոջ նկարը  համացանցում առկա է， ուստի տվյալ պարագայում շատ հեշտ է երեխաների իդենտիֆիկացումը, այս պայմաններում նրանց հասակակիցները, ընկները  ովքեր իրավագիտակցության այդքան բարձ մակարդակ չունեն լսելով դատահոգեբանական փորձաքննության մասին  կմտածեն,  որ երեխաների մոտ հոգեկան առողջության հետ կապված խնդիրներ կան:

Աղջիկների հայրը գտնում է, որ փաստաբանների կողմից խախտվում է փաստաբանի էթիկայի նորմերը և քրեական դատավարության սկզբունքներից մեկը՝անմեղության կանխավարկածը:

«Այն դեպքում, երբ  փաստաբանը այնպիսի իրավիճակներից է խոսում, որ կարծես թե մեր տանն է բնակվել, իսկ նա իրավունք չուներ իր անունից որպես հաստատված փաստ ներկայացնել որևէ բան»:

Ա.Խաչատրյանը նշեց，որ փաստաբան Ստեփան  Ոսկանյանի  նկատմամբ կարգապահական վարույթ հարուցելու միջնորդությամբ դիմելու է Փաստաբանների պալատ, ապա նաև զրպարտության համար փոխհատուցման պահանջով՝ դատարան:

«Մասնավորապես ընտանեկան վեՃի հետ կապված փաստաբանը օգտագործում է  այնպիսի տեղեկատվություն քրեական գործի նյութերից， որն այս պահին համարվում է գաղտնի»,-ասում է Խաչատրյանը:

Արա Խաչատրյանը նաև նշում է, որ «Կանանց աջակցման կենտրոն» ՀԿ-ի տնօրեն Մարո Մաթոսյանը իր ֆեյսբուքայն էջում տեղադրել է իր աղջիկներից մեկի  լուսանկարը և երեխային վարկաբեկող արտահայտություններ,  ակնհայտ զրպարտություն պարունակող գրառումներ կատարել  որպես բռնարար ներկայացնելով նաև իրեն, ինչի հետ կապված վարչական վարույթ է հարուցվել:

Կենտրոնի տնօրենի դեմ դիմում է  ներկայացրել Արդարադատության նախարարություն՝ անձնական տվյալների հրապարակման համար՝ նշելով，որ կենտրոնի տնօրենն իր անչափահաս երեխայի լուսանկարը հրապարակել է առանց երեխայի օրինական ներկայացուցչի և երեխայի համաձայնության:

Այսպիսով, ներկայումս Մալաթիա-Սեբաստիա վարչական շրջանների ընդհանուր իրավասության դարանում քննվում է որդու  խնամակալության գործը, Արաբկիրում՝ ծեծի քրեական գործը:

Ըստ երեխաների հոր պատմածի՝  երեխաների Զատիկի օրը գնացել են իրենց մոր հայրական տուն， որտեղ այդ ժամանակ նա բնակվում էր՝ մորը և եղբորը տեսակցելու，ինչի ժամանակ մայրական տատիկը և մորեղբայրը ծեծի են ենթարկել  նրանցև մայրը գտնվելով տանը՝  որևէ ձևով չի միջամտել:

Այս փաստի առթիվ ևս կա հարուցված քրեական գործ， կատարվում է նախաքննություն:

Կա ևս մեկ գործ, որը կինը դիմել է 6-րդ վարչության կիբերհանցագործությունների բաժին՝ հայտնելով, թե իբր ամուսինը կնոջ ֆեյսբուքյան էջը կամ էլեկտրոնային փոստը  կոտրել է，որով կատարվում է նախաքննություն։  

Արա Խաչատրյանն ընդգծում է, որ անկախ մոր ոչ ադեկվատ գործելաոճից իր  համար սկզբունքային է՝ իր քայերով չվնասել երեխաների մորը:

«Արդարադատությունը էմոցիաների չի ճանաչում,  փաստերն ու ապացույցները ուսումնասիրելով կապացուցվի, որ իրականում ծեծ չի եղել»,- ասաց նա:

Տեղի ունեցածի պատճառը， ըստ Խաչատրյանի， նյութական է. Ամուսիններն  այս պահին ամուսնալուծվում են՝ չնայած,  որ համատեղ ձեռքբերած գույք չկա, սակայն երկու աղջիկների անունով կա բնակարան և երեխաներին վարկաբեկելով ցանկանում են գույքին տիրանալ:

« Հանուն իմ երեխաների առողջության և ի շահ նրանց՝  պատրաստ եմ ցանկացած գույք կորցնել»,- նշում է չորս երեխաների հայրը՝ հավելելով, որ կնոջն առաջարկել է  որպեսզի երեխաների հետ բնակվի այդ բնակարանում և ինքը տեղափոխվի այլ վայր, սակայն երեխաները հրաժարվել են մոր հետ բնակվել միևնույն հարկի տակ:

«Փաստինֆո»-ն պատրաստակամ է ներկայացնել խնդրի վերաբերյալ բոլոր կողմերի արձագանքը։

Լուսանկարը՝ արխիվային

Աղբյուր` Փաստինֆո