Փաստ ինֆո

Եվրամիությունը մտահոգված է տարածաշրջանում տիրող իրադրությամբ: «Արմենպրես»-ի հաղորդմամբ՝ լրագրողների հետ զրույցում այս մասին հայտարարեց Հայաստանում Եվրամիության պատվիրակության ղեկավար, դեսպան Պյոտր Սվիտալսկին՝ անդրադառնալով Լեռնային Ղարաբաղի համակարտության գոտու իրավիճակին:

«ԵԱՀԿ Մինսկի խմբի համանախագահները շատ լավ գործ են անում այս բավականին դժվար միջավայրում, որտեղ բազմաթիվ են մարտահրավերները: Մենք՝ որպես Եվրամիություն, մեր աջակցությունն ենք արտահայտում Մինսկի խմբի համանախագահությանը: Մի քանի օրվա ընթացքում՝ հուլիսի սկզբին, Հարավային Կովկասի հարցերով ԵՄ հատուկ ներկայացուցիչ Հերբերտ Սալբերը լինելու է Հայաստանում:

Նրա այցելությունն այստեղ ապացույցն է նրա, որ ԵՄ-ն մեծապես կարեւորում է եւ մտահոգ է նրանով, ինչ տեղի է ունենում այստեղ: Մեր հիմնական դերը միջնորդների ջանքերին աջակցելն է, բայց պատրաստ ենք նաեւ լրացուցիչ աջակցություն ցուցաբերել խաղաղության գործընթացին, այդ թվում հակամարտությանը հաջորդող վերականգնման շրջանում»,-ընդգծեց ԵՄ ղեկավարը:

Նա իր զորակցությունը հայտնեց օրերս ղարաբաղա-ադրբեջանական շփման գծում Ադրբեջանի կողմից դրսեւորված ագրեսիայի հետեւանքով զոհված զինծառայողների հարազատներին՝ շեշտելով, որ խաղաղության հաստատումը պետք է լինի տարածաշրջանի առաջնահերթություններից մեկը:

«Տխուր է, իհարկե, քանի որ խոսք է գնում մարդկային կորուստների մասին. նրանք երիտասարդներ են, ում ամբողջ կյանքը դեռ առջեւում էր: Ռեժիմի խախտման դեպքերը մտահոգիչ են, որովհետեւ այսպիսի խաղաղությունը կարող է շատ փխրուն լինել. եկեք փորձենք աշխատել հանուն խաղաղության ու չկորցնենք մեր հույսը»,- եզրափակեց Պյոտր Սվիտալսկին:

Հունիսի 16-ի երեկոյան՝ ժամը 18:05-ի սահմաններում, հակառակորդը հաստոցավոր հակատանկային նռնականետերից խախտել է հրադադարի պահպանման ռեժիմը ՊԲ կենտրոնական ենթակայության զորամասերից մեկի պահպանության տեղամասի ուղղությամբ, ինչի հետևանքով մահացու վիրավորումներ են ստացել ՊԲ երեք զինծառայողներ՝ Արայիկ Ռուդիկի Մատինյանը (ծնված 1997թ.), Վիգեն Ժիրայրի Պետրոսյանը (ծնված 1997թ.) և Վարդան Ծովակի Սարգսյանը (ծնված 1997թ.):

Արցախա-ադրբեջանական հակամարտ զորքերի շփման գծում հունիսի 16-ին հակառակորդի կողմից ձեռնարկված նախահարձակ գործողության արդյունքում արձանագրված մահվան ելքով դեպքերից հետո, հունիսի 17-ի առավոտյան ադրբեջանական կողմը հյուսիսային ուղղությամբ դիմել է հերթական սադրանքի, որի հետևանքով ժամը 09.40-ի սահմաններում մահացու հրազենային վիրավորում է ստացել ՊԲ զինծառայող, 1997թ. ծնված Նարեկ Տիգրանի Գասպարյանը:

Աղբյուր` Փաստինֆո