Փաստ ինֆո

Տղամարդու կողմից կնոջն առանձին դաժանությամբ խոշտանգելու վերաբերյալ գործով այսօր դատարանում ավարտվեց տուժողի նախաքննական ցուցմունքների հրապարակումը՝ դատաքննական ցուցմունքներին հակասելու հիմքով:

Ընդ որում, տուժողի նախաքննական ցուցմունքներն էլ իրենց հերթին հակասում են իրար՝ տարբեր են առաջին և ավելի ուշ տված ցուցմունքները, մեղադրյալի հետ առաջին և երկրորդ առերեսումների ժամանակ տուժողի հայտնածը:

Տուժողը նախաքննության ավելի ուշ փուլում հայտնել է, որ ծեծի ժամանակ հոգեկան տառապանք չի զգացել, այլ զգացել է միայն ցավ, ընդ որում՝ ոչ ուժեղ ցավ: Երկրորդ առերեսման ժամանակ տուժողն ասել է, որ որևէ բողոք չունի Հայրապետից, հաշտվել են, ցանկանում է միանալ տղամարդու հետ: Տուժողը պնդել է, որ տղամարդն իրեն ծեծել է, չի խոշտանգել:

Ի պատասխան դատարանի հարցի՝ ո՞րն է ճիշտը, տուժողը հայտնեց, որ ճիշտն այն է, որ Հայրապետը բակում իրեն ծեծել է: Իսկ ի պատասխան մեղադրողի հարցի՝ տուժողը հայտարարեց, որ ամբաստանյալի կողմից իր նկատմամբ ճնշում չի եղել: Ինչո՞վ է բացատրում տուժողը, որ 3-4 վարկած է առաջ քաշել, նույն հանգամանքը տարբեր կերպ ներկայացրել մեղադրողի հարցին տուժողն ասաց, որ այդ պահին վախեցած է եղել, դրա համար այդ պահին այդպես է ընկալել: Ուզում եմ միանանք, հանգիստ ապրենք, հավելեց տուժողը դատարանում:

Ականջախեցու վնասվածքից հետքեր մնացե՞լ են դատարանի հարցին տուժողը բացասական պատասխան տվեց:

Նշենք, որ ըստ մեղադրանքի, Հայրապետը 2016թ. հոկտեմբերի 27-ին ժամը 19:00-ի սահմաններում բակում առանձին դաժանությամբ տուժողին պատճառել է ֆիզիկական ուժեղ ցավ և հոգեկան ուժեղ տառապանք:

Ամբաստանյալի պաշտպան Թամարա Բաղդասարյանը միջնորդեց իր պաշտպանյալի նկատմամբ ընտրված կալանավորումը փոխարինել այլընտրանքային խափանման միջոցով՝ գրավով: Ըստ պաշտպանի, չկա գրավի կիրառումը թույլատրելի համարելուն խոչընդոտող որևէ հանգամանք:

Տուժողը միացավ պաշտպանի միջնորդությանը, իսկ մեղադրողն առարկեց միջնորդության դեմ՝ նշելով, որ միջնորդությունը վաղաժամ է, վկաները չեն հարցաքննվել:

Դատարանը մերժեց պաշտպանի միջնորդությունը: Ինչպես «Փաստինֆո»-ի լրագրողին հայտնեց Թամարա Բաղդասարյանը, դատարանի այս որոշումն անպայման կբողոքարկվի:

Աղբյուր` Փաստինֆո