Փաստ ինֆո

Քրեական հեղինակություն համարվող Թևոսիկի եղբոր՝ Արթուր Սաֆարյանի, սպանության և դա թաքցնելու համար Մովսես Ներսիսյանի սպանության գործով այսօրվա դատական նիստում դատարանը հեռացավ խորհրդակցական սենյակ՝ դատավճիռ կայացնելու, որը կհրապարակվի հունիսի 22-ին:

Մինչ դատարանի խորհրդակցական սենյակ հեռանալը մեղադրող Հայկ Հակոբյանը հանդես եկավ ռեպլիկով՝ ի պատասխան նախորդ դատական նիստում հրապարակված պաշտպան Հեկտոր Սարդարյանի պաշտպանական ճառի:

Մեղադրողն ընդգծեց, որ պաշտպանը թեև առանձին-առանձին վերլուծել է գործով ձեռք բերված ապացույցները, սակայն դրանք չի դիտարկել համակցության մեջ: Ըստ Հայկ Հակոբյանի, գործով բազմակողմանի քննություն է անցկացվել, իսկ պաշտպանական կողմի, այդ թվում՝ ամբաստանյալի, առաջ քաշած վարկածների մասին հայտարարությունները կցկտուր են, իրար հակասող, ոչինչ չասող: Ըստ մեղադրողի, «գործ ունենք պլանավորված, պրոֆեսիոնալ եղանակով կատարված հանցագործության հետ»:

Մեղադրողն ընդգծեց, որ քննադատության չեն դիմանում պաշտպանական կողմի պնդումներն այն մասին, որ ձայնագրությունն առանցքային ապացույց է՝ մինչև ձայնագրության առգրավումն էլ գործի նախաքննությամբ ձեռք են բերվել ապացույցներ: Մեղադրանքը հիմնավորված է, և դա տեսանելի է ցանկացած չշահագրգռված անձի, ասաց մեղադրողը՝ պնդելով մեղադրանքը ու իր հրապարակած մեղադրական ճառը: Դրանում նա պնդել էր մեղադրանքը ողջ ծավալով՝ միջնորդելով Իսրայել Սարգսյանին մեղավոր ճանաչել ՀՀ քրեական օրենսգրքի 38-104-րդ հոդվածի 2-րդ մասի 8-րդ կետով՝ պատվերով սպանություն, 104-րդ հոդվածի 2-րդ մասի 11-րդ կետով՝ այլ հանցանքը թաքցնելու նպատակով կատարված սպանություն, 235-րդ հոդվածի 1-ին մասով՝ ապօրինի կերպով զենք, ռազմամթերք ձեռք բերելը, պահելը, և նրան դատապարտել 25 տարվա ազատազրկման:

Իսրայել Սարգսյանը՝ հանդես գալով վերջին խոսքով, հայտարարեց, որ իր և Տիգրան Ասատրյանի խոսակցության ձայնագրությունը ոչ միայն օրինական չէ, այլև մոնտաժված է, մեկուկես ժամանոց խոսակցությունը կրճատվել է, դարձել 18-րոպեանոց ձայնագրություն: Ըստ Իսրայել Սարգսյանի, ոչ մի ապացույցով չի հիմնավորվում, հակառակը հերքվում է իր մեղքը: Նման ապացույցների շարքում նշեց Արթուր Սաֆարյանի սպանության վայրում հայտնաբերված բժշկական ձեռնոցը, որի վրա հայտնաբերված ԴԲԹ-ն չի համընկել ոչ իր, ոչ էլ Մովսես Ներսիսյանի ԴՆԹ-ի հետ, այսինքն՝ սպանությունը կատարել է մի անձ, ում ԴՆԹ-ն հայտնաբերվել է ձեռնոցի վրա: Այդ իսկ պատճառով էլ ձեռնոցն իրեղեն ապացույց չի ճանաչվել:
Ըստ գործի, Մովսես Ներսիսյանը սպանվել է 2014թ. փետրվարի 1-ին, սակայն նրա դին չի հայտնաբերվել առայսօր, այդուհանդերձ, քննությունը շարունակում է պնդել՝ Մովսես Ներսիսյանը սպանվել է և նետվել Քանաքեռավանի կոյուղատարի դիտահորը:
«Լիքը հարցեր կան, բայց հարցերի պատասխաններ ես այդպես էլ չտեսա»,- ասաց Իսրայել Սարգսյանը:

Ամբաստանյալը տարակուսանք հայտնեց, որ Մովսես Ներսիսյանի որդին ժամանակից շուտ ցանկանում է թաղել հորը, ով ըստ Իսրայել Սարգսյանի, ողջ է:

Ըստ Ի.Սարգսյանի, սխալվում են նրանք, ովքեր կարծում են, որ 25 տարվա կամ ցմահ ազատազրկման դատապարտելով՝ իրեն կարող են կոտրել՝ ինքն ուժեղ է իր «ճշտով, պարզությամբ և մաքրությամբ»:

Ամբաստանյալը նորից ու նորից պնդեց, որ ինքն իրեն մեղավոր չի ճանաչում: Նա հայտարարեց, որ տուժող Արթուր Սաֆարյանը իր համար հարազատ մարդ է եղել, ինքը նրա հետ որևէ «թեմա, վիճաբանություն, ֆինանսական հարցեր» չի ունեցել: «Թևոսը թուլացե՞լ է կամ Թևոսը թուլացո՞ղ տղա է»,- ասաց ամբաստանյալը՝ անդրադառնալով Արթուր Սաֆարյանի սպանության՝ մեղադրանքի առաջ քաշած դրդապատճառին առ այն, որ Արթուր Սաֆարյանը սպանվել է Թևոսի դիրքերն ու ազդեցությունը թուլացնելու նպատակով:

Ամբաստանյալը վրդովմունք հայտնեց նաև գործով անցկացված փորձագիտական եզրակացությունների ծախսերը իրենից բռնագանձելու միջնորդության առնչությամբ: «Ինչո՞ւ պետք է ե՛ս փողը տամ, որ փորձագիտական եզրակացությունները ապացուցում են, որ ես անմե՞ղ եմ: Իմ միակ մեղավորությունն այն է եղել, որ գնացել եմ շակալին խոսացրել»,- ասաց Իսրայել Սարգսյանը՝ ի նկատի ունենալով Տիգրան Ասատրյանի հետ խոսակցությունը:

Ոստիկանությունը կուլ է տվել խայծը՝ ձայնագրությունը և ոգևորվել աղմկոտ հանցագործությունը բացահայտելու պատրանքով, մտածել են մի մեղադրանք, որը չի համապատասխանում իրականությանը և չի տեղավորվում տրամաբանության մեջ, հավելեց Իսրայել Սարգսյանը:

Ամբաստանյալը եզրափակեց իր վերջին խոսքը հետևյալ բառերով՝ դատավճիռ կայացնելիս հիշեք Աստծուն:

Աղբյուր` Փաստինֆո