Փաստ ինֆո

«Դոն Պիպոյին»` նույն ինքը Արթուր Ասատրյանին, սպանելու նախապատրաստության քրեական գործը  «Փաստինֆո»-ի տեղեկություններով կքննի ազգային անվտանգության ծառայությունը: Նախօրեին  ՀՀ ՔԿ-ից մեր հարցմանն ի պատասխան հայտնեցին, որ գործն ուղարկել են դատախազություն: Նկատենք, որ ՀՔԾ-ն քննում է հատուկ սուբյեկտների վերաբերյալ քրեական գործերը, ԱԱԾ-ի ենթակայության քրեական գործերի շրջանակը նույնպես հստակ է, բայց ունի օպերատիվ ծառայություն ու բացառված չէ, որ հենց այդ նկատառումներից ելնելով էլ գործի քննությունը տեղափոխվի ԱԱԾ: Առավելս եւս, երբ մամուլում տեղեկություններ հայտնվեցին, որ ոչ թե ոստիկանությունն է բացահայտել կամ կանխել «Դոն Պիպոյի» սպանության նախապատրաստությունը, ինչպես ներկայացվում էր, այլ ինչ-որ այլ անձինք, ովքեր էլ նրանց հանձնել են ոստիկանությանը:

Պարզվել է Դոն Պիպոյի սպանության նախապատրաստության համար անհրաժեշտ փոխադրամիջոցը ձեռք բերելու նպատակով գումար տրամադրած անձի ինքնությունը

Վնասազերծված խմբի անդամներից մեկի պաշտպան Արմինե Ֆանյանը «Հետք»-ին տված հարցազրույցում ասել էր, որ նախքան ձերբակալվելը իր պաշտպանյալին, ինչպես նաև իր հետ ձերբակալված մյուս երկու անձանց  մինչև ատամները զինված անձինք տարել են և երեք օր անազատության մեջ պահել, ծեծի ենթարկել, տարբեր աստիճանի մարմնական վնասվածքներ պատճառել: Եվ միայն դրանից հետ են նրանք ձերբակալվել:

Զինված անձինք երեք օր ծեծի են ենթարկել Դոն Պիպոյի գործով անցնող անձանց, ապա հանձնել ոստիկաններին. «Հետք»

Ի սկզբանե շրջանառության մեջ դրվեց այն վարկածը, թե զինված խումբը փորձել է սպանել հայտնի հեղինակու­թյուններ Արթուր Ասատրյանին  և  «Վստրեչի Ապեր» մականունով Արամ Վարդանյանին: Բայց ՔԿ-ն հայտնեց, որ խոսքը գնում է ոչ թե սպանության փորձի, այլ նախապատրաստության եւ ոչ թե երկու անձի, այլ մեկ: Համենայն դեպս` քրեական գործը հարուցվել է հենց կազմակերպված խմբի կողմից պատվերով սպանություն նախապատրաստելու դեպքի առթիվ: Քրեական գործով` մեր տեղեկություններով տուժող է ճանաչվել Արթուր Ասատրյանը, ով նաեւ հարցաքննվել է: Մեղադրյալները 4-ն են, որոնցից 3-ը մեղադրվում են Արթուր Ասատրյանի սպանությունը նախապատրաստելու մեջ, իսկ 4-րդը` Զոհրաբ Ղումաշյանը, օժանդակելու մեջ, ով , ըստ տեղեկությունների, գումար էր տրամադրել սպանության նախապատրաստության համար անհրաժեշտ փոխադրամիջոցը ձեռք բերելու նպատակով: Նկատենք, ոտ Զ.Ղումաշյանը տարիներ շարունակ Հայաստանի իրավապահների կողմից հետխուզման մեջ է գտնվել զինվորական ծառայությունից խուսափելու համար: Նրա անունը կապվում է նաեւ «օրենքով գող» Արտյոմ Կանեւսկոյի, նույն ինքը` Արտյոմ Հարությունյանի հետ: «Փաստինֆո»-ի տեղեկություններով` նա նույնպես հարցաքննվել է:

«Ես կպարզեմ, թե սրա թիկունքում, թիկունքի թիկունքում ով էր կանգնած». Դոն Պիպո. «Ժամանակ»

«Դոն Պիպոն» արդեն հրապարակավ հայտնել է, որ փորձելու է պարզել պատվիրատուին: «Այս պահին ոչ մի հստակ բան չեմ կարող ասել, բայց ես շատ շուտով, ինքս ինձ համար, կարծում եմ՝ կհասկանամ, թե որտեղ կարող էր թաքնված լինել շան գլուխը: Ես 46 տարեկան եմ և շատ լուրջ ճանապարհ եմ անցել, և, կարծում եմ, էս ամենը չի մնա հանելուկ… Ես կպարզեմ, թե սրա թիկունքում, թիկունքի թիկունքում ով էր կանգնած: Ես էդ ամենը կպարզեմ ու կիմանամ»», - օրերս իր հարցազրույցում ասել էր նա:

Աղբյուր` Փաստինֆո