Փաստ ինֆո

2009 թվականից մինչ այսօր Հայաստանում մոր կողմից նորածնին սպանելու 7 դեպքով կա օրինական ուժի մեջ մտած դատավճիռ:

Միջին ծանրության հանցագործությունների շարքին դասվող այս հանցագործության համար օրենսդիրը նախատեսում է առավելագույնը հինգ տարի ժամկետով ազատազրկում, սակայն ըստ վիճակագրության՝ մինչ այսօր կայացված դատավճիռներով որևէ մեկն առավելագույն պատժի չի դատապարտվել:

Այս 7 գործերով կանայք մեղավոր են ճանաչվել սեփական երեխային սպանելու մեղադրանքում և դատապարտվել 2-ից 3 տարի ժամկետով ազատազրկման, նշված գործերից 3-ով անձինք անկախության հռչակման 22-րդ տարեդարձի կապակցությամբ համաներում հայտարարելու մասին որոշմամբ նշանակված պատժից ազատվել են, երեք դեպքով էլ՝ ՀՀ քրեական օրենսգրքի 70-րդ հոդվածի կիրառմամբ ազատազրկման ձևով նշանակված պատիժը պայմանականորեն չի կիրառվել, սահմանվել է փորձաշրջան և ընդամենը մեկ դեպքով ՝անձը դատապարտվել է և կրել պատիժը ազատազրկման վայրում:

Հիշեցնենք, որ մոր կողմից երեխային սպանելու վերջին աղմկահարույց դեպքը տեղի է ունեցել վերջերս՝ մայիսի 15-ին: Հրազդան քաղաքի Շահումյան փողոցի թիվ 10 հասցեում գտնվող կանաչապատ հատվածում՝ խոտերի վրա՝ թղթե արկղի մեջ, հայտնաբերվել էր արական սեռի նորածին երեխայի դիակ՝ պոլիէթիլենային պարկով փաթաթված: Նորածինը 30-ամյա կնոջ երրորդ զավակն է եղել և ծնվել է առողջ:

Ավելի ուշ հայտնի դարձավ, որ երեխան լույս աշխարհ է եկել մայիսի 11-ի առավոտյան, կինը իրենց բնակարանի զուգարանում առանց բժշկական միջամտության, ծննդաբերել է արական սեռի երեխա, նրան օրեր շարունակ թողել առանց խնամքի, ապա` նորածնի դին պոլիէթիլենային տոպրակով փաթեթավորել և դրել թղթե արկղի մեջ, որից հետո այն տեղափոխել է Հրազդան քաղաքի Շահումյան փողոցին հարակից անտառային կանաչապատ տարածք ու դնելով խոտերի մեջ՝ հեռացել է:

Քրեական գործով նախաքննությունը շարունակվում է:

Աղբյուր` Փաստինֆո