Փաստ ինֆո

Իջևանում 50-ամյա տղամարդու սպանության մեջ մեղադրվող 30-ամյա Արթուրը Տավուշի մարզի ընդհանուր իրավասության դատարանի դատավճռով մեղավոր է ճանաչվել առաջադրված մեղադրանքում և դատապարտվել 10-ը տարի ժամկետով ազատազրկման:

Ավելի վաղ «Փաստինֆո»-ն տեղեկացրել էր, որ, ըստ մեղադրանքի, Արթուրը 2016 թվականի օգոստոսի 16-ին՝ ժամը 07:30-ի սահմաններում Իջևան քաղաքի վերջնամասում գտնվող օրվա կարգավորման ջրամբարի հարակից հանդամասում իր մոր և կնոջ վերաբերյալ վարկաբեկիչ տեղեկություններ տարածելու հանգամանքի շուրջ վիճաբանության մեջ է մտել Իջևանի բնակիչ Վաչագան Ակինյանի հետ և նրան ապօրինաբար կյանքից զրկելու դիտավորությամբ իր անվամբ հաշվառված «Չիֆսան» տեսակի 114223 գործարանային համարի որսորդական ողորկափող հրացանով կրակել է նրա որովայնի և կրծքավանդակի շրջաններին, որի հետևանքով ստացած մարմնական վնասվածքներից վերջինս տեղում մահացել է:

Արթուրին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով, նրա նկատմամբ որպես խափանման միջոց է ընտրվել կալանավորումը:

Այսպիսով, Արթուրն առաջադրված մեղադրանքում մեղավոր չի ճանաչել իրեն և ցուցմունք տալով հայտնել է, որ 2007 թվականին ամուսնացել է հարևանությամբ բնակվող Վարդուհի Վաչագանի Ակինյանի հետ: Ամուսնությունից հետո կնոջ ծնողները հաճախակի են խառնվել իր ընտանեկան հարաբերություններին, աներն իր մոր և կնոջ հասցեին վարկաբեկիչ տեղեկություններ է տարածել, որի պատճառով երկու ընտանիքների միջև հաճախակի են անախորժություններ, վիճաբանություններ են եղել:

Արթուրն իր անվամբ օրինական կարգով հաշվառված երկփողանի որսորդական հրացան է ունեցել: 2016 թվականի փետրվարին կնոջ և մանկահասակ երեխայի հետ ՌԴ մեկնելուց առաջ հրացանը լիցքավորել է՝ շնագայլերին կրակելու համար, սակայն չի կրակել և այդպես մոռացության մատնելով՝ թողել է ննջասենյակի զգեստապահարանի գլխին, իսկ երբ ՌԴ-ից վերադարձել են ամիսներ անց, շրջանառվող խոսակցություններից լսել է, որ աները՝ Վաչագան Ակինյանը, տարբեր մարդկանց մոտ մի քանի անգամ իր կնոջ՝ Վարդուհի Ակինյանի և մոր՝ Վեներա Մանուչարյանի հասցեին անպարկեշտ և վարկաբեկիչ արտահայտություններ է արել:

Արթուրն իր ցուցմունքում հայտնել է, որ նախկինում մի քանի անգամ փորձել է աներոջը զգուշացնել, սակայն իր ջանքերն ապարդյուն են եղել, որից հետո որոշել է նրան վախեցնել: 2016թ.-ի օգոստոսի 16-ին առավոտյան շուտ արթնացել է ընտանի կենդանիներին կերակրելու համար և այդ ժամանակ տեսել է Վաչագան Ակինյանին, նրան բարևել է, սակայն բարև չի առել, որից հետո նրան ասել է, որ սպասի, խոսելու բան ունի:

Այս ամենից հետո մտել է տուն, վերցրել է իր անվամբ հաշվառված որսորդական ողորկափող հրացանը, գնացել է Վաչագան Ակինյանի հետևից և վերը նշված հարցի պարզաբանման շուրջ վիճաբանության մեջ մտել նրա հետ, որի ընթացքում Վաչագան Ակինյանը չի հերքել իր կողմից նման արտահայտություններ անելու հանգամանքը, ավելին՝ ասել է, որ իր խոսքերը ճիշտ են: Ինչից հետո էլ Արթուրը վախեցնելու նպատակով, մոտ 7-8 մետր հեռավորությունից հրացանի փողն ուղղել է նրա վրա՝ ասելով, որ եթե մի անգամ էլ խառնվի իր ընտանիքի գործերին, այդ զենքով կկրակի և որպեսզի իր խոսքերը տպավորություն թողնեն աներոջ վրա, ցուցամատը դրել է առջևի ձգանին, միջնամատը՝ երկրորդ ձգանին և հաջորդաբար, մեկը մյուսի հետևից քաշել է ձգանները՝ ասեղի հարվածի ձայնը լսեցնելու համար:

Արթուրը ցուցմունք տալիս հայտնել է, որ իր համար շատ անսպասելի երկու կրակոցներ են արձակվել: Դրանից հետո ականջներում խշշոց է լսել, չի հիշում ինչքան ժամանակ է այդպես մնացել, որից հետո վազելով փախել է դեպի անտառ:

Ճանապարհին հանդիպել է իր ընկերոջը՝ Գ. Հ-ին, և պատմել է, որ չի ցանկացել աներոջը սպանել, այլ դա պատահաբար է ստացվել:  Կրակոցից հետո, երբ ուշքի է եկել, զանգահարել է իր մորը և ասել, որ շտապօգնություն կանչեն: Չի հերքել, որ մորն ասել է, թե քանի ինքը կա, նրանց ոչ ոք չի կարող նեղացնել և դա ասելով նկատի է ունեցել, որ միշտ նրանց թիկունքին կանգնած է, քանի որ տան տղամարդն ինքն է:

Քրեական գործով ձեռք բերված ապացույցները հետազոտելով դատարանը հանգել է հետևության, որ ամբաստանյալն այդպիսի դիրքորոշմամբ փորձում է քրեական պատասխանատվությունից մեղմելու հիմքեր ստեղծել:

Սպանվածի դուստրը՝ ամբաստանյալի կինը, ցուցմունք տալիս հայտնել է, որ դեպքի օրն առավոտյան արթնանալով տեսել է, որ ամուսինը տանը չէ, իսկ սկեսուրն ասել է, որ Արթուրը վերցրել է որսորդական հրացանը և գնացել է որսի, նա նաև հայտնել է, որ իր արթնանալուց հետո սկեսրոջ հեռախոսահամարին է զանգահարել Արթուրը, ում հետ խոսելուց հետո սկեսուրը իրեն ասել է, որ Արթուրը հանդիպել է Վաչագան Ակինյանին, վերջինս էլ ի պատասխան Արթուրի հարցին, թե վարկաբեկիչ տեղեկություններ տարածել է, թե՝ ոչ ասել է, որ լավ է արել, որից հետո Արթուրը սպանել է նրան:

Կինն իր հոր սպանության համար ամբաստանվող ամուսնուն բնութագրել է որպես դյուրագրգիռ, շուտ բռնկվող անձնավորություն: Ապա նաև հավելել է, որ Արթուրը իր հետ հեռախոսազրույցի ժամանակ ասել է, որ չի իմացել, թե հրացանի մեջ փամփուշտ կա, չի ցանկացել սպանել և որ ցանկացել է վախեցնել, քանի որ վարկաբեկիչ տեղեկություններ է տարածել իր և մոր հասցեին, և պատահաբար կրակոց է արձակվել, որի հետևանքով մահացել է իր հայրը:

Ամբաստանյալի մայրն էլ ցուցմունք տալիս հայտնել է, որ որդու և հարսի ամուսնության առաջին իսկ օրվանից որդու և աներոջ միջև տարբեր պատճառներով հաճախակի են կոնֆլիկտներ եղել:

Որդին իրեն պատմել է, որ ընկերներից տեղեկացել է, որ իր աները տարբեր վայրերում պատմել է, թե իր դուստրը և Արթուրի մայրը անբարոյականությամբ են զբաղվում: Դեպքի օրն էլ որդին իր հետ վերցրել է որսորդական հրացանը և դուրս է եկել տնից, իսկ ժամեր անց որդին զանգահարել է իրեն և ասել, որ սպանել է Վաչագան Ակինյանին:

Բացի այդ, ամբաստանյալի մայրը ցուցմունք տալով հայտնել է, որ որդին իրեն պատմել է նաև, որ երբ հանդիպել է Վաչագան Ակինյանին, նրան հարցրել է, թե ինչու է իր կնոջ և մոր հասցեին վարկաբեկիչ տեղեկություններ տարածում, իսկ նա պատասխանել է, որ լավ է անում և միաժամանակ հայհոյանք է տվել մոր հասցեին, որից հետո հրացանը պահել է նրա ուղղությամբ` պահանջելով ներողություն խնդրել, չի իմացել, որ լիցքավորված է ձգանը քաշել է և կրակել:

Դատարանը որպես ամբաստանյալի պատասխանատվությունը և պատիժը մեղմացնող հանգամանք հաշվի է առել այն, որ նրա խնամքի տակ են մինչև տասնչորս տարեկան երկու երեխաները:

Աղբյուր` Փաստինֆո