Փաստ ինֆո

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճռով՝ անչափահասին օգտագործելով պոռնկությամբ զբաղվելուն նպաստելու և սուտ մատնություն կատարելու մեղադրանքներում 55-ամյա Աշոտ Դաշտոյանը դատապարտվեց 4 տարի ժամկետով ազատազրկման:

Քրեական գործը դատարանի վարույթ է ստացվել 2016թ. հոկտեմբերի 28-ին: Այս ամիսների ընթացքում տուժողը դատարան չի ներկայացել, ուստիև՝ դատական նիստերը պարբերաբար հետաձգվել են: Այսօր մեղադրող դատախազը դատարանին տեղեկացրեց, որ ոստիկանության համապատասխան բաժնից գրություն է ստացվել առ այն, որ տուժողը ՀՀ սահմանը հատել է և վարույթն իրականացնող մարմնին այդ մասին չի տեղեկացրել:

Այս պայմաններում կողմերը չառարկեցին տուժողի բացակայությամբ գործի քննությանը:

Այսպիսով, դատարանն անցավ գործի քննությանը և ամբաստանյալը, ով նախաքննության ընթացքում առաջադրված մեղադրանքներում իրեն մեղավոր չէր ճանաչել, հայտարարեց, որ առաջադրված մեղադրանքներն ընդունում է և միջնորդեց արագացված դատաքննության կարգ կիրառել:

Նշենք, որ մեղադրական եզրակացությունը հաստատելիս դատախազն առարկել էր գործն արագացված ընթացակարգով քննելուն, սակայն դատարանում մեղադրանքի պաշտպանությունն իրականացնում էր այլ դատախազ, ով փոխեց մեղադրանքի կողմի դիրքորոշումը և չառարկեց:

Այսպիսով, դատարանն անցավ արագացված ընթացակարգով գործի քննությանը, և մեղադրող դատախազը հրապարակեց եզրափակիչ մասը, ըստ որի՝ Աշոտ Դաշտոյանը գույքային օգուտ ստանալու նպատակով 2014թ. օգոստոս ամսին անչափահաս Ն.Կ.-ին նպաստել է պոռնկությամբ զբաղվելուն:

Մեղադրանքի համաձայն՝ 1999թ. ծնված անչափահասը 2014թ. օգոստոսին Վեդի քաղաքից եկել է Երևան, որտեղ ապրուստի և բնակության միջոց չունենալով՝ պատահական ծանոթացել է Դաշտոյանի հետ, ով իրեն առաջարկել է վարձակալական հիմունքներով բնակվել իր՝ Երևան քաղաքի տանը:

Որոշ ժամանակ համատեղ բնակվելուց հետո Դաշտոյանը, տեղյակ լինելով աղջկա անչափահաս լինելու մասին, գույքային օգուտ ստանալու նպատակով, առաջարկել է վերջինս մարմնավաճառությամբ զբաղվել, պատահական քաղաքացիների հետ սեռական հարաբերություններ ունենալ, ինչին անչափահասը համաձայնել է:

Դաշտոյանը սիստեմատիկ հաճախորդներ է գտել անչափահասի համար, որոնց հետ էլ նա ունեցել է սեռական հարաբերություններ, և նրանցից Դաշտոյանը վերցրել է 10 000-ական դրամ, որից 5000 դրամը նա տվել է անչափահասին, իսկ մյուս մասը՝ պահել է իրեն:

Բացի այդ, 2015թ. օգոստոսի 7-ին Դաշտոյանը ոստիկանությունում հաղորդում է տվել, որ իր ծանոթը, Երևան քաղաքի Սարյանի պուրակում բռնություն գործադրելով, իր տաբատի աջ գրպանից բացահայտ հափշտակել է մոտ 5000 դրամ, որից հետո դանակի սպառնալիքով պահանջել է ևս 80 000 դրամ գումար տալ:

Աշոտ Դաշտոյանին մեղադրանք է առաջադրվել ՀՀ քրեական օրենսգրքի 262-րդ հոդվածի 2-րդ մասի 6-րդ կետով և 333-րդ հոդվածի 1-ին մասով, նրա նկատմամբ որպես խափանման միջոց ընտրելով կալանավորումը:

Սուտ մատնության մեղադրանքի վերաբերյալ ամբաստանյալն ասաց, որ այն կատարելու ժամանակ գտնվել է ալկոհոլի ազդեցության տակ:

Մեղադրող դատախազը, մեղադրական ճառով հանդես գալով, նշեց, որ ամբաստանյալին առաջադրված մեղադրանքները ճիշտ են որակված, նրա պատասխանատվությունը և պատիժը մեղմացնող և ծանրացնող հանգամանքներ առկա չեն և միջնորդեց Դաշտոյանի նկատմամբ վերջնական պատիժ նշանակել 4 տարի 6 ամիս ժամկետով ազատազրկում:

Ամբաստանյալի պաշտպանն էլ ճառով հանդես գալով միջնորդեց առավել մեղմ պատիժ նշանակել, պայմանականորեն չկիրառել՝ սահմանելով փորձաշրջան:

Նախկինում 10-ն անգամ դատապարտված և դատվածությունները մարված Աշոտ Դաշտոյանն էլ, պաշտպանական ճառող հանդես գալով, հայտարարեց, որ կատարածի համար զղջում է և խնդրեց շատ մեղմ վերաբերվել:

Նրա վերջին խոսքերը ևս զղջման խոսքեր էին:

Այսպիսով, պատիժների համակցությամբ՝ նրա նկատմամբ վերջնական պատիժ նշանակվեց 4 տարի ժամկետով ազատազրկում՝ առանց գույքի բռնագրավման՝ որպես պատժի սկիզբ հաշվելով 2016թ. հունիսի 13-ը՝ այն օրվանից, երբ նա անազատության մեջ է հայտնվել:

Աղբյուր` Փաստինֆո