Փաստ ինֆո

Դատաքննության արդյունքներով չի հիմնավորվել, որ Արարատ Խանդոյանը կատարել է հանցագործություն: Այս մասին իր պաշտպանական ճառում այսօր հայտարարեց զանգվածային անկարգություններին մասնակցելու մեջ մեղադրվող Արարատ Խանդոյանի պաշտպան, «Ընդդեմ իրավական կամայականության» ՀԿ փաստաբան Արա Ղարագյոզյանը՝ միջնորդելով առաջադրված մեղադրանքում Արարատ Խանդոյանին ճանաչել անմեղ և նրա նկատմամբ կայացնել արդարացման դատավճիռ:

Ըստ Արարատ Խանդոյանին առաջադրված մեղադրանքի, նա 2016թ. հուլիսի 20-ին Երևան քաղաքում տեղի ունեցած, հասարակական անվտանգության վտանգած բռնությամբ, ջարդերով, գույքը ոչնչացնելով և վնասելով արտահայտված զանգվածային անկարգությունների ընթացքում բռնություն է գործադրել զանգվածային անկարգությունների ընթացքում ոստիկանության աշխատակիցների նկատմամբ:

Պաշտպանը գտնում է, որ եթե անգամ Արարատ Խանդոյանը կատարած լիներ նկարագրված բոլոր գործողությունները, ապա նույնիսկ այդ դեպքում նրա արարքը չէր կարող որակվել ՀՀ քրեական օրենսգրքի 225-րդ հոդվածի 2-րդ մասով:
Զանգվածային անկարգությունների բացակայության պայմաններում Ա.Խանդոյանը պարզապես չէր կարող մասնակցել դրանց: Եթե նույնիսկ վարույթը իրականացնող մարմինը գտնի, որ զանգվածային անկարգությունները այնուամենայնիվ տեղի են ունեցել, ապա պետք է ապացուցեր, թե կոնկրետ Ա.Խանդոյանը ինչ գործողություններ է կատարել:

Վարույթը իրականացնող մարմինը քրեական գործով չի ապացուցել, որ Արարատ Խանդոյանը որևէ մեկին հարվածի ոտքերով ու ձեռքերով և փորձի վահան խլել:

Ըստ Արա Ղարագյոզյանի, զանգվածային անկարգություն որակվելու համար ամբոխը պետք է կիրառի բռնություն, ջարդեր, հրկիզումներ, ինչն ըստ էության 2016թ. հուլիսի 20-ին տեղի չի ունեցել: Հրկիզումները, գույքը ոչնչացնելը կատարվել է ոստիկանության ներկայացուցիչների կողմից, նրանք հատուկ միջոց են կիրառել, որի հետևանքով վնասվածքներ են ստացել մի շարք քաղաքացիներ:

Պաշտպանն ընդգծեց, որ ոստիկանները հատուկ միջոցը կիրառել են առանց զգուշացնելու և քաղաքացիներին ժամանակ տրամադրելու:

Ըստ Արա Ղարագյոզյանի, այն ոստիկանները որոնք սույն քրեական գործով ճանաչվել են տուժող, դատարանում ցուցմունքներ են տվել այն մասին, որ չեն տեսել, որ Ա.Խանդոյանը որևէ ոստիկանի հարվածի կամ բռնություն գործադրի: Տուժող ոստիկանները հայտնել են նաև, որ հավաքի մասնակիցների ձեռքում արգելված առարկաներ չեն տեսել:

Ամբողջ քրեական գործում առկա չէ գեթ մեկ ապացույց կամ փաստական տվյալ, որ 2016 թուլիսի 20-ին Խորենացու փողոցում Ա.Խանդոյանը որևէ ոստիկանի նկատմամբ բռնություն գործադրի կամ ոստիկանի վահան փորձի խլել:
Պարզապես վարույթը իրականացնող մարմինը Ա.Խանդոյանի դեմ չունենալով որևէ ապացույց, փորձել է ջանասիրաբար արհեստական ապացույցներ ստեղծել իրենց ապօրինի մեղադրանքը հիմնավորելու համար, գտնում է պաշտպանը:

Զանգվածային անկարգության տեղի ունենալն իր դատաքննական ցուցմունքում հերքել է նաև Արարատ Խանդոյանը: Նա նշել է, որ քաղաքացիների հետ միասին Խորենացու փողոցում մասնակցել է խաղաղ հավաքին: Պարբերաբար ոստիկանները սադրիչ գործողություններ էին կատարում, շղթա կազմած ոստիկաները առաջ էին գալիս հավաքի մասնակիցերի մոտ, սակայն Ա.Խանդոյանը պարբերաբար խաղաղության կոչեր էր անում: Ապա ոստիկաններն առանց նախապես զգուշացնելու կիրառել են հատուկ միջոց, որի ժամանակ նռնակը պայթել է Ա.Խանդոյանի ոտքի մոտ, վնասվել է նրա աչքը:
Ա.Խանդոյանը հայտնել է նաև, որ երբ նա գնացել է Խորենացի փողոց, հավաքը կրել է խաղաղ բնույթ և ոչ մի քաղաքացու ձեռքին արգելված իրեր և այլ առարկաներ չեն եղել, քաղաքացիների կողմից ոչ մի բռնության կոչ չի հնչեցվել:

Ա.Խանդոյանը հայտնել է, որ ոստիկաններն են ի սկզբանե փակել փողոցները, և քաղաքացիները չեն կարողացել ազատ տեղաշարժվել: Խանդոյանը ոչ մեկի հետ նախապես չի պայմանավորվել, որ պետք է գնա Խորենացի փողոց և հավաքին մասնակցի և այնտեղ ոչ ոքի չի ճանաչել:
Իմ պաշտպանյանի դեմ առաջադրվել է վերացական մեղադրանք, որում շարադրված են վերացական փաստական հանգամանքներ, ավելին դրանց կատարումը իմ պաշտպանյալի կողմից չի հիմնավորվել, նշեց Արա Ղարագյոզյանը:

Ըստ պաշտպանի, մեղադրողը ողջ դատաքննության ընթացքում չի կարողացել ապացուցել իր պաշտպանյալի մեղքը, այլ ելք չունենալով՝ իր ճառում փորձել է հղում կատարել այնպիսի ապացույցնեիրի վրա, որոնք չեն վերաբերվում իր պաշտպանյալին՝ «անթույլատրելի ապացույցների, ոչ արժանահավատ վկաների և իմ պաշտպանյալի հետ կապ չունեցող տուժողների ցուցմունքների հիման վրա»:

Ըստ Արա Ղարագյոզյանի, դատարանն առաջին իսկ պահից Ա.Խանդոյանի նկատմամբ եղել է կանխակալ և կողմնակալ, առանց վարույթը իրականացնող մարմնի միջնորդության որոշում է կայացրել Ա.Խանդոյանի խափանման միջոցը անփոփոխ թողնելու մասին: Դատարանը Ա.Խանդոյանին հնարավորություն չի տվել իր խափանման միջոցի հարցի վերաբերյալ ներկայացնել իր առարկությունները, և Ա.Խանդոյանի կալանքը ժամկետը երկարացվել է անորոշ ժամանակով: Հաջորդ դատական նիստում պաշտպանական ճառով հանդես կգա Արարատ Խանդոյանը:

Նշենք, որ նախորդ դատական նիստում մեղադրողը պնդել էր մեղադրանքը և միջնորդել Արարատ Խանդոյանին դատապարտել չորս տարվա ազատազրկման:

Աղբյուր` Փաստինֆո