Փաստ ինֆո

Ալավերդին հավակնում է ստանձնել հանցավոր քաղաքի տիտղոսը: Միայն վերջին 1,5 տարիների ընթացքում այստեղ մեկը մյուսին են հաջորդում աղմկահարույց դեպքերը. ավտոմեքենաներով հետապնդումներ, կրակոցներ, սպանություններ: Վերջին դեպքը գրանցվեց երեկ, երեբ օրը ցերեկով` կեսօրին, քաղաքի բանուկ մասում սպանվեց 39-ամյա Կամո Փիրուզյանը: Տուժողը քաղաքում հասցրել է աչքի ընկնել իր ոչ այնքան համեստ վարքագծով եւ շատերը գիտեին թմրամիջոցների, նկատմամբ նրա հակումների մասին ու անգամ վաստակել էր «բենզինիստ» անունը: Վերջինս ոչ այնքան բարյացակամ հարաբերություններ է ունեցել Ալավերդի քաղաքի բնակիչ Վլադիմիր Դավթյանի հետ, ով կասկածվում է նրան սպանելու մեջ:

Վենդետա՞, թե անձնական վրեժխնդրություն.սպանություն Ալավերդիում

Մեզ հայտնի դարձավ, որ կասկածյալը հարցաքննվել է, որի ժամանակ պնդել է, որ սպանության պատճառը եղել է իր հասցեին հնչած սպառնալիքները: Ըստ նրա` Կ.Փիրուզյանը իրեն մի քանի անգամ սպառնացել է, որ կսպանի, ինչին լուրջ է վերաբերել, առավել եւս տեղյակ լինելով, որ նրա եղբայրը մարդ սպանել է եւ ներկայումս հետախուզման մեջ է Ալավերդիում մեկ տարի առաջ տեղի ունեցած երկու անձի սպանության գործով: Ի դեպ, «Դատալեքս» դատական տեղեկատվական համակարգից տեղեկացանք, որ Կամո Փիրուզյանը եւս նախկինում դատապարտվել է թմրամիջոցների գործով:

Սպառնալիքներից էլ վախենալով սկսել է իր մոտ զենք պահել, դեպքի օրն էլ նրան տեսնելով «Կարա» սուպերմարկետի մոտ, իբր, կարծել է, թե իրեն հետեւում է` ինքն էլ կրակել ու սպանել է: Թե որտեղից է զենք ձեռք բերել դա արդեն այլ հարց է: Թե որքանով է կասկածյալի այս վարկածը արժանահավատ դեռ կպարզվի քննությամբ: Սակայն հարկ է նշել, որ, ըստ Ալավերդիում շրջանառվող տեղեկությունների, մեկ տարի առաջ Կ.Փիրուզյանի եղբոր կողմից սպանված երկու անձանցից մեկը Դավթյանի ընկերներից մեկն է: Ասել է թե` բացառված չէ, որ իրականում գործ ունենք վենդետայի հետ, ինչը թերեւս կունենա շարունակություն, քանի որ ազատության մեջ է սպանվածի եղբայրը` թեկուզեւ գտնվում է հետախուզման մեջ;

Աղբյուր` Փաստինֆո