Փաստ ինֆո

Քրեական հեղինակություն համարվող Թևոսիկի եղբոր՝ Արթուր Սաֆարյանի, սպանության և Մովսես Ներսիսյանի ենթադրյալ սպանության գործով մեղադրանքի կողմը խախտել է ապացույցների բավարարության պահանջը, չի հաղթահարել ամբաստանյալ Իսրայել Սարգսյանի անմեղության կանխավարկածի շեմը:

Այս մասին իր պաշտպանական ճառում հայտարարեց պատվերով Արթուր Սաֆարյանի սպանությունը կազմակերպելու և դա թաքցնելու համար Մովսես Ներսիսյանին սպանելու մեջ մեղադրվող ամբաստանյալ Իսրայել Սարգսյանի պաշտպան, փաստաբան Հեկտոր Սարդարյանը՝ միջնորդելով ճանաչել ու հռչակել իր պաշտպանյալի անմեղությունը:

Ըստ պաշտպանի, մեղադրանքն անհիմն է, մեղադրողն իր մեղադրական ճառում սոսկ ապացույցների հիմնավորվածության պատրանք է ստեղծել և դրա հիման վրա միջնորդել իր պաշտպանյալին դատապարտել 25 տարվա ազատազրկման:

Հեկտոր Սարդարյանը գտնում է, որ գործով պարզված չէ Արթուր Սաֆարյանի սպանության դրդապատճառը: Տուժողի եղբոր՝ Թևոսի, դիրքն ու ազդեցությունը թուլացնելու համար Արթուր Սաֆարյանին սպանելու մեղադրանքի կողմի առաջ քաշած դրդապատճառը ոչ մի տվյալով չի հաստատվում: Ավելին, իր դիրքերը թուլացնելու համար իր եղբորը սպանելու վարկածը հերքել է նաև Թևոսը: Նշվում է բոլորովին այլ հնարավոր դրդապատճառ՝ սպանությունը կապված է 1 մլն. 200 հազար դոլարի վերադարձման՝ վազվրատի պահանջի հետ:

Պաշտպանը մեղադրանքը հիմնավորելու տեսանկյունից կասկածի տակ դրեց Իսրայել Սարգսյանի և Տիգրան Ասատրյանի խոսակցության ձայնագրությունը, որտեղ, ըստ պաշտպանի, Ի.Սարգսյանը իբրև խոստովանում է, որ կազմակերպել է Արթուր Սաֆարյանի սպանությունը և կատարել Մովսես Ներսիսյանի սպանությունը: Ձայնագրությունը մոնտաժված է, այսինքն՝ կեղծված: Պաշտպանը վկայակոչեց Տիգրան Ասատրյանի ցուցմունքը՝ նա դատարանում հայտարարել է, որ այն ժամանակ էլ չի հավատացել, այժմ չի հավատում Իսրայել Սարգսյանի ասածներին: Այդ ամենը մութ դաշտ է, ասել է նա:

Ամբաստանյալի պաշտպանը պնդեց, որ Մովսես Ներսիսյանն ողջ է, նա արյան հետքեր է թողել, ստեղծել սեփական սպանության իմիտացիա ու հեռացել Հայաստանից: Այլ բան լինել չի կարող, ընդգծեց պաշտպանը:

Հեկտոր Սարդարյանի գնահատմամբ, քննությունը միակողմանի ու ոչ օբյեկտիվ է եղել, ամեն ինչ քաշել տարել, հարմարեցրել են ձայնագրությանը, որի պարագայում ավելի շատ հարցեր են առաջանում: Ըստ պաշտպանի, ձայնագրությունն ավելի շատ պաշտպանության, քան մեղադրանքի ապացույց է:

Ընդհանուր առմամբ, նշեց պաշտպանը, մեղքը հիմնավորող որևէ տվյալ ձեռք չի բերվել:

Տուժող Արթուր Սաֆարյանի իրավահաջորդի ներկայացուցիչ, փաստաբան Երեմ Սարգսյանը նշեց, որ մեղադրանքը հիմնավորված է: Ներկայացուցիչը նշեց, որ մեղադրողի հետ միայն պատժաչափի մասով համաձայն չէ: Ե.Սարգսյանը հավելեց, որ եթե դատարանը հիմնավորված համարի երկու սպանության մասով էլ Իսրայել Սարգսյանին առաջադրված մեղադրանքը, ապա գտնում է, որ նրա նկատմամբ պետք է նշանակվի առավելագույն պատիժ՝ ցմահ ազատազրկում:

Իսկ տուժող Մովսես Ներսիսյանի իրավահաջորդի ներկայացուցիչ, փաստաբան Թադևոս Ալեքսանյանն իր հերթին խնդրեց բավարարել իրավահաջորդի քաղհայցի պահանջը, եթե դատարանը հիմնավոր համարի Մ.Ներսիսյանի սպանության մեղադրանքը, որպեսզի տուժողի որդին իր հոր հիշատակին գերեզմանի ծախսերը հոգա:

Իսրայել Սարգսյանը հրաժարվեց պաշտպանական ճառով հանդես գալ, նա իր դիրքորոշումը կհայտնի վերջին խոսքում՝ հաջորդ դատական նիստում:

Լուսանկարը՝ «Առավոտ»-ի

Աղբյուր` Փաստինֆո