Փաստ ինֆո

2015 թ. հունվարի 29 -ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով այսօր դատարանում հարցաքննվեց 3 վկա:

Երևանի Ավան և Նոր-Նորք վարչական շրջանների ընդհանուր իրավասության դատարանում այսօր առաջինը հարցաքննվեց վկա Էրիկ Բեգլարյանը, ով հայտնեց, որ բացի Գնել Թևոսյանից մյուս ամբաստանյալների հետ նորմալ հարաբերությունների մեջ է գտնվել, իսկ սպանված Հայկազ Բրասեղյանն իր ընկերն էր:

Վկայի բնութագրմամբ՝ Հայկազ Բարսեղյանը աշխույժ, ընկերասեր տղա է եղել, որևէ մեկը նրան տխուր չէր տեսնի, դեպքի օրը եւս՝ ժամեր առաջ, Հայկազին տեսել էր ուրախ տրամադրությամբ:

Վկան հայտնեց որ, Հայկազ Բարսեղյանը կուրսանտ Կարեն Բաղրամյանին անշնորհք ուտելու հետ կապված դիտողություն է արել: Կարեն Բաղրամյանի ուտելու ձևը սեղանակիցներին դուր չի եկել. նա ճպճպացնելով է հաց կերել, բացի այդ ուտելիքները խառնել է միմյանց, իսկ երբ Հայկազը նրան դիտողություն է արել, նրանց է մոտեցել Վաչե Սահակյանը: Ճաշարանում զրույցը անավարտ է մնացել և պայմանավորվել են ավելի ուշ շարունակել է Հայկազենց ննջարանում:

Իսկ երբ ավելի ուշ զրուցել են` Կարենը զգացել է, որ մեղավոր է և խոսակցությունը փակվել է:

Վկայի խոսքով՝ հունվարի 28-ին` ժամը 23.00-ի սահմաներում ինքը գնացել է բուժկետ, ապա վերադարձել եւ պառկել քնելու, վերադարձի ճանապարհին տեսել է Հայկազին, ով ուրախ է եղել: Հաջորդ օրն առավոտյան իրենց ննջարան է գնացել է Սամվել Սերոբյանը և Վաչեին կանչել` ասելով, որ  Հայկազը չկա: Ննջարանում  Հայկազի անկողինը  հայտնաբերել են կարմիր գույնի մեջ: Սկզբում վկան մտածել է, որ կարմիր ներկ է, բայց կարճ ժամանակ անց հասկացել, որ արյուն է և սթափվել է: Անկողնու վրա եղել են նաև փսխոցի հետքեր:

Այդ ամենից հետո գնացել են Հայկազին փնտրելու և նրա դին գտել  պպտաձողից կախված վիճակում, իսկ դիակին մոտենալ թույլ չեն տվել. Վաչե Սահակյանն էլ ասել է մի խառնվեք, պետք չէ մոտենալ:

Վկան նաև նշեց, որ Հայկազի անկողնու մեջ «լանցետ կար», ինչին Վաչեն ձեռք է տվել, ապա գցել ձեռքից:

Վկայի խոսքով` ինքը չի պատկերացրել, որ Հայկազը կարող էր իրեն վնաս տալ, իսկ երբ մահճակալն արյունոտ է տեսել` մտածել է, որ կատակ է արել:

Դատավարության մասնակիցներին հետաքրքրում էր,  թե արդյոք վկան չի փորձել պարզել  նույն ննջարանում քնող կուրսանտներից, թե ինչ է պատահել ընկերոջ հետ` վկան ասաց, որ կուրսատներն ասել են, թե  դեպքի ժամանակ քնած են եղել: Վկան հայտարարեց, որ  հարցրել է, «թե նիուժելի չեք տեսել կամ ձայն լսել, որ եթե անգամ մարդ իրեն վնաս տա` ցավին չի կարող դիմանալ, ձայն կհանի», բայց  իրեն պատասխանել են որ քնած են եղել:

Ի վերջո վկան, ասաց որ ինստիտուտում զրույցներից տեղեկացել է, որ այդ օրը գիշերը խմել են «կապտյորկայում», և երբ Հայկազը հայոհանքներ է տվել ինչ-որ մեկի հասցեին` այդ մասին մեկը գնացել է ու պատմել է ապտյորկայում գտնվողներին: Իսկ, թե ովքեր են «կապտյորկայում» խմել` վկան անուններ չհնչեցրեց:

Դեպքից հետո էլ վկան տեղեկացել է, որ Հայկազի ննջարանում քնողները ցուցմունք են տվել, թե վախեցել են, քանի որ ինչպես հետո է իմացել.  սպանության մեջ մեղադրվող չորս անձանցից մեկն ասել է. «կմոռթեմ Ձեզ...»:

Վկայի ցուցմունքներում առկա էական հակասություններով պայմանավորված մեղադրող դատախազը միջնորդեց հրապարակել վկայի նախաքննական ցուցմունքները, ըստ որոնց՝ Հայկազը Կարենին մի քանի անգամ զգուշացրել է, որ փնթի է ուտում, վկան հայտնել էր, որ ինքը ևս նկատողություն է արել Կարենին` փնթի լինելու համար:

Ինչ վերաբերում է նրան, թե ամբաստանյալները գերիշխող դիրք են զբաղեցել, թե ոչ` վկան նշեց, որ Գնել Թևոսյանը,Վաչե Սահակյանը, Նորիկ Սահակյանը և Մովսես Ազարյանը այնպես էին արել, որ գերիշխող դիրք զբաղեցնեն մյուս կուրսանտների նկատմամբ, բացի այդ` Վաչեին շողոքորթում էր Մովսեսը, իսկ Գնելին՝ Նորիկը. նրանց ձեռքի տակ լավ էին զգում իրենց:

Վկայի նախաքննական ցուցմունքից նաև պարզ դարձավ, որ դեպքին նախորդող ժամերին սարսափ ֆիլմ են դիտել, որի հերոսուհուն ընկները սպանել էր և նրա հոգին հանգիստ չի թողել ընկերներին:

Դատաքննական և նախաքննական ցուցմունքի հակասության մի դրվագը վերաբերում էր նրան, որ Վաչեն Հայկազի անկողնուց լանցետ է վերցրել. վկան նախաքննական ցուցմունքում հայտնել էր, որ ինքը անձամբ չի տեսել, որ Վաչեն Հայկազի անկողնուց ինչ որ բան վերցնի, իսկ երբ կապիտան Ավետիսյանն ասել է տեղը դիր՝ մտածել է երևի լանցետի մասին է ասում:

Մյուս հակասությունների վերաբերյալ էլ ասաց, որ դրանք պայմանավորված են նրանով, որ չի հիշում:

Ի վերջո, թե ինչ է իրեն հայտնի սպանության մասին, ինչ է լսել` վկան կոնկրետ անուներ չհայտնեց, սակայն նշեց, որ, ըստ իր լսած տեղեկությունների՝ մեկը բռնել է Հայկազի ոտքերից, մյուսը ձեռքերից, մյուս երկուսն էլ կտրել են երակները, որից հետո բուշլատը հագցրել են, որ արյունը չթափվի և տարել` կախել:

Թե ումից է լսել` դատարանի ճշտող հարցին վկան որևէ անուն չհնչեցրեց, սակայն հավելեց, որ ով մեղավոր է թող պատժվի:

Հաջորդիվ հարցաքննվեց վկա Արայիկ Ավագյանը:  Ըստ նրա՝ դեպքի օրն առավոտյան չի հիշում, թե ով է գնացել իրենց ննջարան և ասել, որ Հայկազը չկա: Անմիջապես գնացել են նրա ննջարան, որտեղ տեսել են Հայկազի անկողինն արյունոտ, որից հետո իր ինքնազգացողությունը վատացել է և ուշաթափվել:

Վկային տարել են բուժկետ, որտեղից դուրս գալով  գնացել է շարահրապարակ եւ այնտեղ տեսել Հայկազին` կախված:

Վկան նշեց, որ Վաչե Սահակյանը, ով իր ննջարանում էր քնում, իմանալով որ Հայկազը չկա` գունատվել է:

Վկայի խոսքով, սպանության մասին ինքը տեղեկացել է ռազմական ոստիկանությունում:

Վկա Արամ Սարիբեկյանը նույնպես հայտնեց, որ գնալով Հայկազ Բարսեղյանի ննջարան՝ անկողինը հայտնաբերել են արյոնոտ, որից հետո կուրսանտ Արայիկ Ավագյանը ուշագնաց է եղել ու ինքը օգնել է նրան` գնալ բուժկետ:

Վկան հստակ չհիշեց, թե ով, սակայն ասաց, որ կարծես թե Օհանջանյան Նորիկն է դեպքի օրն առավոտյան գնացել իրենց ննջարան և Վաչեին կանչել:

Ի սկզբանե, ըստ վկայի,   առաջ էր քաշվում ինքնասպանության վարկածը, սակայն հետո ռազմական ոստիկանությունում տեղեկացել է, որ սպանություն է տեղի ունեցել:

Վկան նաև նշեց, որ մի քանի անգամ  գնացել քննչական, իսկ վերջին անգամ  իրեն նկար են ցույց տվել, որում պատկերված է եղել՝ պարան օղակ արված, ինչն իրեն անծանոթ է եղել:

Իսկ ամբաստանյալներին նա դեպքից հետո մեկ անգամ է տեսել, երբ նրանց տարել են ինստիտուտ` քննչական փորձարարության, սակայն նրանց հետ չի շփվել:

Նկատենք, որ մինչ այսօր գործով անցնող մյուս վկաները իրենց ցուցմունքներում նկարագրում էին ամբատանյալ Գնել Թևոսյանի գործողությունները, սակայն այսօր հարցաքննվող վկաները Վաչե Սահակյանի պահվածքին ու նրա գործողություններին անդրադարձան: Վկաները նշեցին, որ դեպքի օրն առավոտյան Վաչե Սահակյանը գունատ է եղել, սփրթնած հուզված:

Աղբյուր` Փաստինֆո