Փաստ ինֆո

Հունիսի 10-ն ապրիլյան պատերազմի հերոս, հետախույզ-գնդացրորդ Սասուն Մկրտչյանի ծննդյան օրն է: Սասունն անվախ էր, ընկերոջ համար պատրաստ ամեն ինչի. հերոսի ավագ քույրը՝ Անի Մկրտչյանը, հենց այսպես էլ կհիշի նրան. մարդ, ում օգնության դիմելու դեպքում երբեք մերժում չէիր լսի:

Անին պատմում է, որ Սասունն իր ճանապարհին հանդիպող յուրաքանչյուր դժվարություն հաղթահարում էր արժանապատվությամբ, ձգտում առաջ շարժվել իր իսկ հնարավորություններով առանց որեւէ մեկին անհանգստացնելու:

«Դեռ փոքրուց շատ նպատակասլաց էր, պատրաստակամորեն օգնում էր բոլորին անկախ նրանից՝ դա իրեն հարմար կլիներ, թե ոչ: Ով նրան ճանաչում է կփաստի, որ նրա կողքին հումորի պակաս չի եղել, դեռ մանկուց արկածային ինչ-որ պատմությունների մեջ էր լինում: Այս բոլոր հատկություններից առավել եղբայրս անչափ բարի էր ու շատ էր սիրում երեխաների: Ես իր մոտ էի թողնում բալիկիս՝ հանգիստ լինելով, որ հոգատար քեռին ամեն ինչ տեղին է անելու, միասին հաճախ էին զբոսնում»,-«Արմենպրես»-ի հետ զրույցում հիշում է հերոսի քույրը:

Անիի համար հերոս եղբայրը միշտ թիկունք է եղել, հենց այդ աջակցության պակասն է, որ օրեցօր ավելի շատ է զգում. «Ես չեմ զգացել, որ քույր չունեմ, իսկ նա չի զգացել, որ եղբայր չունի: Ամեն հարցում ենք միասին եղել, վստահել իրար։ Երբ մեկը քո առօրյայի մեջ է անընդհատ լինում, նրա պակասը անչափ խորն ես զգում, ու Սասունին հիշելու ,նրա պակասը զգալու առիթները շատ-շատ են: Նա հիմա էլ է իմ կողքին անկախ ամեն ինչից, ես դա գիտեմ»:

Հերոսի ավագ դասարանների դասղեկը՝ տիկին Օվսաննան, հիշում է Սասունին որպես շատ զուսպ, անարդարությունը չհանդուրժող մի աշակերտի: Դասղեկը համոզված է՝ Սասունով հպարտանալու առիթներ դեռ շատ կլինեին. «Եթե ինչ-որ անազնիվ քայլ էր նկատում, անպայման պիտի արձագանքեր, իր խոսքն ասեր: Սպորտով էր զբաղվում, հենց մրցույթներում հաջողություն էր գրանցում, գալիս, քննարկում էինք, ասում էի՝ Սասուն ջան, դու չեմպիոն պիտի դառնաս: Շատ յուրահատուկ ժպիտ ուներ, ժպտուն աչքեր, որոնք ես միշտ կհիշեմ»:

Դասղեկն ասում է՝ հետադարձ հայացք գցելով դպրոցական տարիներին՝ չի զարմանում, որ սասունցի Սասունը անձնվիրաբար պայքարել է պատերազմում, քանի որ հենց նա կարող էր նման բան անել:

«Սասունի մեջ կար այդ անվախությունը. եթե նա ինչ-որ մեկին պիտի պաշտպաներ, չէր նայում՝ իրեն կվնասի, թե ոչ: Կյանքը կտար հանուն ընկերոջ: Այդպես էլ արեց պատերազմում»:

Սասուն Մկրտչյանը ծնվել է 1989 թվականի հունիսի 10-ին Երեւանում: Հայաստանի Հանրապետության Զինված ուժերի պայմանագրային զինծառայող, հետախույզ-գնդացրորդը հերոսաբար ընկել է 2016թ. ապրիլի 3-ին՝ Թալիշում:

Հուղարկավորվել է Եռաբլուր զինվորական պանթեոնում՝ զինվորական արարողակարգով։ Հուղարկավորությանը ներկա է գտնվել Հայաստանի Հանրապետության նախագահ Սերժ Սարգսյանը: Հունիսի 10-ը նաեւ նախորդ տարվա ապրիլին ռազմաճակատ կամավոր մեկնած եւ զոհված ազատամարտիկ Սարգիս Խալաֆյանի ծննդյան օրն է:

Սյուզի Մուրադյան

Աղբյուր` Փաստինֆո