Փաստ ինֆո

Հանցավոր համագործակցության վերաբերյալ գործի այսօրվա դատական նիստին վեց ամսվա ընթացքում առաջին անգամ դատարան էր ներկայացվել գործով ամբաստանյալ, ՀՀ նախկին փոխվարչապետ և Պաշտպանության նախկին փոխնախարար Վահան Շիրխանյանը՝ սայլակով: Այդուհանդերձ, դատարանը Վ.Շիրխանյանի ոտքի չկանգնելը գնահատեց որպես անհարգալից վերաբերմունք դատարանի հանդեպ:

Այսօրվա դատական նիստը նույնպես տեղի չունեցավ՝ ամբաստանյալ Նելլի Մինասյանի և չորս փաստաբանի բացակայության պատճառով: Ամբաստանյալի պաշտպան, փաստաբան Ինեսսա Պետրոսյանը դատարանին բժշկական տեղեկանք ներկայացրեց առ այն, որ իր պաշտպանյալն արյունահոսություն, սպառնացող վիժում ախտորոշմամբ գտնվում է հիվանդանոցում:

Դատարանը հայտարարեց՝ մինչ այժմ ասում էիք դատարանն է մեղավոր, հիմա էլ պաշտպանները չեն ներկայանում, ով է մեղավոր՝ դատարա՞նը: Ի պատասխան Վ.Շիրխանյանի պաշտպան Հայկ Ալումյանը հայտարարեց, որ դատարանն է մեղավոր, որ նիստերը հետաձգվում էին, եթե վեց ամիս առաջ Վ.Շիրխանյանին սայլակ տրամադրվեր, նիստերը չէին հետաձգվի:

Ինչպե՞ս ստացվեց, որ սայլակն ի վերջո տրամադրվեց Վահան Շիրխանյանին, Հայկ Ալումյանը լրագրողների հետ զրույցում նշեց՝ սայլակ գտան, կանաչ գույնի, ակներով:

Հ.Ալումյանը հայտնեց, որ հանձնաժողովային դատաբժշկական փորձաքննության եզրակացության համաձայն, Վահան Շիրխանյանն ի վիճակի է մասնակցել դատական նիստերին: «Մեր կողմից դա չէր վիճարկվում, հակառակը, ի սկզբանե մենք ասում էինք, որ ինքն ի վիճակի է գտնվել դատական նիստերի դահլիճում, ընկալել դատավարության ընթացքը և մասնակցել: Դա մենք միշտ ասել ենք, դա վիճելի չէր: Պարզապես մենք ասում էինք՝ տրամադրեք հնարավորություն, որպեսզի ինքը գա դատարան: Այսօր ի վերջո վեց ամիս հետո մի հատ սայլակ գտնվեց»,- ասաց Հայկ Ալումյանը:

Պաշտպանի գնահատմամբ, պարզապես ցուցում կար չբերել ու դատավարությունը չսկսել: «Ես ոնց հասկանում եմ, կա ցուցում այս դատավարությունը ձգձգելու, ու այս դատավարությունը ձգձգվելու է տարբեր պատճառներով, ընդ որում, ամեն անգամ ձգձգվելուց մեղադրողն ու դատավորը տպավորություն են փորձելու ստեղծել, որ ձգձգվում է պաշտպանական կողմի պատճառով»:

Հայկ Ալումյանն անդրադարձավ նաև սայլակով դատական նիստերի դահլիճ բերված Վ.Շիրխանյանի ոտքի չկանգնելը որպես դատարանի հանդեպ անհարգալից վերաբերմունք գնահատելու մասին դատարանի հայտարարությանը: «Ես վախենում եմ, որ դատավորի այդպիսի արտահայտությունը ընդհանրապես անհարգալից վերաբերմունք է արդարադատության նկատմամբ, մնացել էր, որ պրն. Շիրխանյանը մի հատ ներողություն խնդրի, որ ինքը հիմա հիվանդ է»:

Ըստ պաշտպանի, դատարանների անհիմն կալանավորումների պատճառով Վ.Շիրխանյանը լրիվ առողջ մարդ լինելով՝ հիմա այն վիճակում է, որ չի կարողանում քայլել ու ոտքի կանգնել, և հիմա իր ոտքի կանգնելու հնարավորության բացակայությունը դատարանը գնահատում է որպես անհարգալից վերաբերմունք, նշեց Հայկ Ալումյանը:

Պաշտպանն ընդգծեց, որ առհասարակ փորձ է արվում ստեղծված բարդ կացությունները վերագրել պաշտպանական կողմին՝ Շիրխանյանն ոտքի վրա չի կարողանում կանգնել, ինքն է մեղավոր, դատավարությունը ձգձգվում է դատավորի պատճառով՝ պաշտպանական կողմն է մեղավոր, դատավարությունը ձգձգվում է սայլակ չտրամադրելու պատճառով՝ պաշտպանական կողմն է մեղավոր: «Բայց կողքից, ինձ թվում է, շատ լավ երևում է, թե իրականում ով է մեղավոր»,- ասաց Հայկ Ալումյանը՝ նկատելով, որ ոչ ոք եզրակացություն չի տվել, որ Վահան Շիրխանյանը տեղաշարժվելու կամ ոտքի կանգնելու հնարավորություն ունի: Ակնհայտ է, որ չունի, եթե սայլակով են բերում, ասաց պաշտպանը:

Աղբյուր` Փաստինֆո