Փաստ ինֆո

«Սասնա Ծռեր»-ի գործով՝ 14 մեղադրյալի մասով, այսօրվա առաջին դատական նիստն հետաձգվեց՝ այդպես էլ մինչև վերջ պարզ չդարձավ, թե ինչու: Միայն միջնորդավորված լրագրողներն իմացան, որ դատական նիստը հետաձգվել է մինչև հունիսի 21-ը:

Մինչ դատական նիստի հետաձգումը նիստերի դահլիճում ներկա հանրության ներկայացուցիչները ամբաստանյալների անունները վանկարկելով էին նրանց դիմավորում, հնչեց նաև «մահ ռեժիմին» գոչյունը:

Ամբաստանյալների շարքում հնչեցին «Քրեական օրենսգիրքը մեզ չի վերաբերվում, մեզ ժողովուրդը չի դատում, դատարանը չենք ընդունում» հայտարարությունները:

Գործով նախագահող՝ Երևանի Էրեբունի և Նուբարաշեն վարչական շրջանների դատարանի դատավոր Արտուշ Գաբրիելյանի զգուշացմանը՝ եթե չեք լռելու, նիստը կհետաձգվի, հնչեցին ամբաստանյալների հայտարարությունները՝ «ժողովրդին չեք կարող լռեցնել, մեր ձայնն ավելի բարձր պետք է լինի, քան ձերը»:

«Փաստինֆո»-ի հետ զրույցում ամբաստանյալներ
Էդվարդ Գրիգորյանի և Սեդրակ Նազարյանի պաշտպան, փաստաբան Երվանդ Վարոսյանը նշեց, որ ի սկզբանե անհասկանալի էր, թե ինչո՞ւ է «Սասնա Ծռեր»-ի դատավարությունն անց կացնելու համար ընտրվել Էրեբունու դատարանի այդ դահլիճը։

«Պարզ էր, որ դահլիճում շատ դժվար կլինի տեղավորել ամբաստանյալներին ու նրանց պաշտպաններին, էլ ուր մնաց, թե տեղ լինի տղաների հարազատների կամ լրագրողների համար։

Այսօր տեղի ունեցածը ապացուցեց, որ իմաստ չկար այդ դահլիճում նիստ իրականացնել։ Այս դահլիճում դատավարություն անելու փորձը միանշանակ հանգեցնելու է փաստացի դռնփակ դատավարության»,- ասաց Երվանդ Վարոսյանը։

Գործով ամբաստանյալ Արայիկ Խանդոյանի պաշտպան, «Ընդդեմ իրավական կամայականության» ՀԿ փաստաբան Արա Ղարագյոզյանն իր հերթին նշեց, որ դահլիճում շատ վատ աշխատանքային պայմաններ էին: Մասնավորապես, ինքը դահլիճի մի ծայրում էր, իր պաշտպանյալը՝ մեկ այլ: Այսինքն՝ ինքը զրկված էր լինելու այս կամ այն հարցի շուրջ դիրքորոշում հայտնելու համար իր պաշտպանյալի հետ երկու բառ փոխանակելու հնավորությունից: Ստացվում է, որ փաստորեն ինքն առանց իր պաշտպանյալի մասնակցության նրա պաշտպանությունն է իրականացնում:

Ըստ Արա Ղարագյոզյանի, իր նստած տեղից չէին երևում ու լսելի չէին ոչ դատարանը՝ նախագահող դատավորը, ոչ էլ դատախազները: Իր ասածն էլ չէր կարող լսելի լինել դատարանի ու դատախազների համար:

Իր սեղանին խոսափող չէր դրված, այսինքն՝ իր կողմից ասվածը չէր ձայնագրառվելու:

Ըստ փաստաբանի, ստեղծված պայմանները հանգեցնում են արդար դատաքննության և պաշտպանության իրավունքների կոպիտ խախտումների:

«Դատավարությունը չի կարող նման կերպ ընթանալ»,- ասաց Արայիկ Խանդոյանի պաշտպանը՝ հավելելով, որ մոտ օրերս ինքը բողոք է ներկայացնելու Դատական դեպարտամենտի ղեկավարին՝ խնդրելով ավելի ընդարձակ դահլիճ տրամադրել նույն դատարանում կամ էլ եթե այդտեղ այդպիսի դահլիճ չկա, դատավարությունն անցկացնել Երևանի Կենտրոն և Նորք-Մարաշ կամ Աջափնյակ և Դավթաշեն վարչական շրջանների դատարանների շենքում:

Հիշեցնենք, որ Պավել Մանուկյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով՝ զանգվածային անկարգությունների նախապատրաստություն, 235-րդ հոդվածի 3-րդ մասով՝ կազմակերպված խմբի կողմից ապօրինի կերպով զենք, ռազմամթերք ձեռք բերելը, պահելը և փոխադրելը, 219-րդ հոդվածի 3-րդ մասի 1-ին կետով՝ կազմակերպված խմբի կողմից շենքեր, շինություններ, տրանսպորտի, հաղորդակցության կամ կապի միջոցներ զավթելը, 218-րդ հոդվածի 3-րդ մասի 1-ին կետով՝ կազմակերպված խմբի կողմից պատանդ վերցնելը, 238-րդ հոդվածի 4-րդ մասի 1-ին և 2-րդ կետերով՝ կազմակերպված խմբի կողմից կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով զենք, ռազմամթերք հափշտակելը, 185-րդ հոդվածի 3-րդ մասի 1-ին կետով՝ գույքը դիտավորությամբ ոչնչացնելը կամ վնասելը, որով առանձնապես խոշոր չափերի վնաս է պատճառվել:

Վարուժան Ավետիսյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 2-րդ կետերով, 185-րդ հոդվածի 3-րդ մասի 1-ին կետով,
Մխիթար Ավետիսյանին՝ 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 2-րդ կետերով, 185-րդ հոդվածի 3-րդ մասի 1-ին կետով,

Աշոտ Պետրոսյանին՝ 235-րդ հոդվածի 3-րդ մասով, 219-րդ հոդվածի 3-րդ մասի 1-ին կետով, 218-րդ հոդվածի 3-րդ մասի 1-ին կետով, 185-րդ հոդվածի 3-րդ մասի 1-ին կետով,

Արայիկ Խանդոյանին՝ 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 2-րդ կետերով,
Էդվարդ Գրիգորյանին՝ 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 185-րդ հոդվածի 3-րդ մասի 1-ին կետով,
Գագիկ Եղիազարյանին՝ 235-րդ հոդվածի 3-րդ մասով, 219-րդ հոդվածի 3-րդ մասի 1-ին կետով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 2-րդ կետերով,

Արմեն Բիլյանին՝ 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 104-րդ հոդվածի 2-րդ մասի 2-րդ, 3-րդ և 11-րդ կետերով՝ մարդուն առևանգելով կամ պատանդ վերցնելով զուգորդված՝ անձի ծառայողական գործունեության հետ կապված, այլ հանցանքը թաքցնելու կամ դրա կատարումը հեշտացնելու նպատակով կատարված սպանություն, 238-րդ հոդվածի 4-րդ մասի 1-ին և 2-րդ կետերով, 177-րդ հոդվածի 3-րդ մասի 1-ին և 2-րդ կետերով՝ կազմակերպված խմբի կողմից առանձնապես խոշոր չափերով գողություն,

Սմբատ Բարսեղյանին՝ ՀՀ քրեական օրենսգրքի 235-րդ հոդվածի 3-րդ մասով, 104-րդ հոդվածի 2-րդ մասի 1-ին, 2-րդ, 3-րդ և 11-րդ կետերով՝ մարդուն առևանգելով կամ պատանդ վերցնելով զուգորդված՝ անձի ծառայողական գործունեության հետ կապված, այլ հանցանքը թաքցնելու կամ դրա կատարումը հեշտացնելու նպատակով երկու կամ ավելի անձանց սպանություն, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 2-րդ կետերով,

Արեգ Կյուրեղյանին՝ 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 2-րդ կետերով, Արմեն Լամբարյանին՝ 235-րդ հոդվածի 3-րդ մասով, 185-րդ հոդվածի 3-րդ մասի 1-ին կետով, 219-րդ հոդվածի 3-րդ մասի 1-ին կետով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 2-րդ կետերով,

Սեդրակ Նազարյանին՝ 235-րդ հոդվածի 3-րդ մասով, 219-րդ հոդվածի 3-րդ մասի 1-ին կետով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 2-րդ կետերով, 185-րդ հոդվածի 3-րդ մասի 1-ին կետով:

Կարո Եղնուկյանին մեղադրանք է առաջադրվել ՀՀ քրեական օրենսգրքի 38-219-րդ հոդվածի 3-րդ մասի 1-ին կետով՝ կազմակերպված խմբի կողմից շենքեր, շինություններ, տրանսպորտի, հաղորդակցության կամ կապի միջոցներ զավթելուն օժանդակելը, և 38-218-րդ հոդվածի 3-րդ մասի 1-ին կետով՝ կազմակերպված խմբի կողմից պատանդ վերցնելուն օժանդակելը,

իսկ Խաչատուր Գիչյանին՝ 38-219-րդ հոդվածի 3-րդ մասի 1-ին կետով:

Աղբյուր` Փաստինֆո