Փաստ ինֆո

2016թ. հունիսի 4-ին Նուբարաշենի խճուղում 58-ամյա Եղիշե Խաչատրյանի սպանության գործով այսօրվա դատական նիստը ևս առանց միջադեպի չանցավ:

Դատարանի կողմից սահմանված ապացույցների հաջորդականության համաձայն՝ դատարանն անցավ տուժողների հարցաքննությանը՝ հարցաքննվեց սպանված Եղիշե Խաչատրյանի մայրը՝ Էմմա Աբրահամյանը:

Տարեց կինը ցուցմունք տվեց բավականին հուզված վիճակում, հաճախակի կրկնվում էր, ցուցմունքի վերաբերյալ կողմերի միջև առաջացած տարակարծությունների ու հայտարարությունների պատճառով էլ իրարանցում սկսվեց դահլիճում, և մինչ նախագահող դատավոր Աննա Դանիբեկյանը այդ իրավիճակում աննկատ լքեց դահլիճը, տուժող Էմմա Աբրահամյանի ինքնազգացողությունը վատացավ:

Շուրջ 50 րոպե դատական նիստն ընդմիջվեց, այդ ընթացքում տուժողի համար շտապօգնություն հրավիրվեց և երբ դատարանը որոշեց ի վերջո վերադառնալ նիստը շարունակել, տուժողի իրավահաջորդի ներկայացուցիչ Ինեսսա Պետրոսյանը դատարանին տեղեկացրեց, որ տուժողի համար շտապօգնություն է հրավիրվել, ներարկում է կատարվել և բժիշկը հայտնել է, որ հիվանդն անկողնային վիճակում հանգստի կարիք ունի:

Տուժողի իրավահաջորդի խոսքով՝ կարճ ժամանակ անց տուժող Էմմա Աբրահամյանի զարկերակային ճնշումը կրկին բարձրացել էր և դատարան էր հրավիրվել նաև երկրորդ շտապ օգնությունը:

Այդ պատճառով դատարանը որոշեց նիստը հետաձգել և նշանակել հունիսի 29-ին:

Մանրամասները քիչ ուշ:

Աղբյուր` Փաստինֆո