Փաստ ինֆո

Նուբարաշենի խճուղում դաժան ծեծի հետևանքով սպանված 58-ամյա Եղիշե Խաչատրյանի մայրը վստահաբար պնդում է，որ ամբաստանյալի աթոռին հայտնված անձինք են իր աչքի առաջ սպանել որդուն. «ավետարանը բերեք ձեռքս դնեմ վրան, ես սուտ չեմ ասում»: Նման հայտարարությամբ տուժողի մայրը՝ Էմմա Աբրահամյանը, հանդես եկավ այսօր դատարանում՝ ցուցմունք տալիս. տարեց կինը որդուն ծեծի ենթարկելու ժամանակ եղել է դեպքի վայրում:

Ըստ տուժողի ցուցմունքի՝ դեպքի օրը որդու հետ մասնակցել են եղբոր թոռան հարսանյաց հանդեսին։ Տուն վերադառնալու  ճանապարհին իրենց ավտոմեքենային  հանդիպակաց մեծ արագությամբ ընթացել է  մեկ այլ ավտոմեքենա, Եղիշե խաչատրյանը հասցրել է արգելակել ավտոմեքենան  եւ，մոր խոսքերով， այդկերպ փրկել է թե իրենց， թե այդ ավտոմեքենայում գտնվող անձանց կյանքը:

Ավտոմեքենան արգելակելուց հետո Եղիշե Խաչատրյանը դիմել է հանդիպակաց ընթացած ավտոմեքենայում գտնվողներին՝ «ոչխար, անասուններ, ի՞նչ էիք անում», և հենց այդ խոսքերից հետո նրանք ավտոմեքենայից իջել են， հայհոյանքներ հնչեցրել Եղիշե Խաչատրյանի հասցեին:

Վերջինս նույնպես իջել է ավտոմեքենայից，ինչից հետո վիճաբանությունը թեժացել է։ Որդեկորույս մոր խոսքերով՝եթե Եղիշեին մայր չհայհոյեին՝ նա ավտոմեքենայից չէր իջնի:

Ըստ տուժողի՝  մյուս ավտոմեքենայի մեջ գտնվել են երեք տղա，մեկ աղջիկ և այդ տղաները իր որդուն դաժանաբար ծեծել են:

Կարճ ժամանակ անց եկել են ևս երեքը և 6 հոգով ծեծել են Եղիշե Խաչատրյանին. «աջից, ձախից հարվածում էին»:

Տուժող կինը անընդմեջ պնդում էր, որ որդուն ծեծի ենթարկողները գտնվել են ալկոհոլի ազդեցության տակ, անգամ թմրամիջոցի մասին խոսեց:

Նրա խոսքերով՝ այդ ընթացքում ինքը և այդ աղջիկը, ում անունը Մարիամ Գրիգորյան է，  փորձել են հանդարտեցնել վիճաբանողներին,  քաշել դեպի իրենց Եղիշե Խաչատրյանին, սակայն՝ ապարդյուն:

Ըստ տուժողի՝ որդուն անգամ ընկած վիճակում են հարվածել, հարվածներ է ստացել նա ինքը ինչի հետևանքով վայր է ընկել:

Կինը մի քանի անգամ պնդեց,  որ ամբաստանյալներից բոլորին ճանաչել է,  սակայն երբ խոսում էր ամբաստանյալ  Յուրի Հակոբյանի մասին նա ցույց էր տալիս Խաչիկ Կոսյանի ուղղությամբ, թեեւ  Յուրի Հակոբյանը ճիշտ հակառակ կողմում էր նստած:

Սպանված Եղիշե Խաչատրյանի մոր համար երկու անգամ շտապօգնություն հրավիրվեց դատարան

Ի վերջո Խաչիկ Կոսյանի պաշտպան Վաչագան Քոսյանը տուժող կնոջը հարցրեց,  թե ամբաստանյալներից ով է Յուրի Հակոբյանը և խնդրեց ցույց տալ նրան, և մինչ կինը կկողմնորոշվեր դահլիճում իրարանցում սկսվեց. տուժողի իրավահաջորդ Փառանձեմ Մեյթիխանյանը，նրա ներկայացուցիչ Ինեսսա Պետրոսյանը հայտարարեցին， որ նախ ամբաստանյալները ոտքի կանգնեն և նոր միայն տուժող կինն ասի,  թե ով է նրանցից Յուրի Հակոբյանը, սակայն դատարանի կողմից ոչ մի միջոց չձեռնարկվեց այդ հայտարարության վերաբերյալ և ամբաստանյալներն էլ նստած մնացին:

Մի քանի վայրկյան վիճաբանությունից հետո տուժող կինը ցույց տվեց,  թե ով է Յուրի Հակոբյանը:

Արտաշես Չիչոյանի պաշտպան Միհրան Պողոսյանն էլ այդ առնչությամբ հայտարարությամբ հանդես եկավ՝ նշելով, որ Փառանձեմ Մեյթիխանյանը տեղից հուշեց տուժող կնոջը,  թե որ կողմում է նստած Յուրի Հակոբյանը:

Պաշտպանը， դիմելով դատարանին， փորձեց պարզել, թե դատարանն այս միջադեպի կապակցությամբ որևէ միջոց ձեռնարկում է, թե՞ ոչ, թե դատարանում գտնվող անձինք, երբ ցանկանան կարող են նստած տեղից հայտարարությամբ հանես գալ:

Եվ միայն պաշտպանի հայտարարությունից հետո դատարանը կարծես սթափվեց և դատավարության մասնակիցներին կոչ արեց տեղից հայտարարություններ չհնչեցնել:

Պաշտպանի այդ հայտարարությունը տուժող կողմի վրդովմունքն առաջացրեց:

Ամբաստանյալ Արարատ Նիկողոսյանի պաշտպան Լիպարիտ Սիմոնյանը ևս դատարանին դիմելով ասաց,  որ ցուցմունք տալիս Յուրի Հակոբյանի մասին խոսելիս տուժող կինը ձեռքով այլ ուղղությամբ էր ցույց տալիս，ինչին  ի պատասխան  կինը հակառակը սկսեց պնդել:

Այդ ամենից հետո պաշտպան Սիմոնյանը հայտարարեց, որ գործով միջադեպերը տեղի են ունենում այն պատճառով,  որ դատարանը համապատասխան միջոցառումներ չձեռնարկեց,  երբ ամբաստանյալի ուղղությամբ ջրով լի շիշ շպրտվեց տուժողի իրավահաջորդ Մեյթիխանյանի կողմից:

Պաշտպանների հայտարարություններին առարկեց տուժողի իրավահաջորդի ներկայացուցիչ Ինեսսա Պետրոսյանը՝ հայտարարելով,  որ Էմմա Աբրահամյանը դեռևս նախաքննության ժամանակ՝ ճանաչման գործողությունների ընթացքում ճանաչել է գործով ամբաստանյալներին:

Ամբաստանյալի ուղղությամբ շիշ նետելու վերաբերյալ արված հայտարարության առնչությամբ տուժողի իրավահաջորդ Փառանձեմ Մեյթիխանյանն ասաց, որ չի արդարացնում իր այդ քայլը և ներողություն է խնդրում:

Իսկ ինչ վերաբերում է ամբաստանյալներին, ապա նա հայտարարեց, եթե նրանք ինքնապաշտպանության զոհեր են, ապա թող դեպքից հետո չփախչեին, ինչո՞ւ փախան, որովհետև նույն պահին կապացուցվեր նրանց հարբած  լինելու  փաստը:

«Ես միշտ եմ ասել՝ տանը չեն նստել պլանավորել իմ ամուսնու սպանությունը,  դա եղել է երթևեկության կանոնների խախտման հետևանքով…ուրեմն  եկեք պատվով ամեն մեկս մեր հարվածի ծանրությունը տանենք»,- ասաց Մեյթիխանյանը:

Տուժողի իրավահաջորդը պատմեց նաեւ իրենց տուն այցելած ամբաստանյալ Արտաշես Չիչոյանի հորեղբոր և իր խոսակցությունը, որի ժամանակ էլ Չիչոյանը զայրացած ոտքի կանգնեց և սկսեց բղավել:

Դահլիճում լարվածությունը կրկնապատկվեց և դատարանը՝  Աննա  Դանիբեկյանի նախագահությամբ, կողմերին հանդարտեցնելու փոխարեն աննկատ հեռացավ դահլիճից:

Նշենք նաև, որ դատարանն այսօր անդրադարձավ տուժողի իրավահաջորդ Փառանձեմ Մեյթիխանյանի կողմից ամբաստանյալի Յուրի Հակոբյանի վրա շիշ նետելու փաստին և բավարարվեց դատական սանկցիայի կիրառմամբ։

Լուսանկարը՝ դատական նիստերի դահլիճից

Աղբյուր` Փաստինֆո