Փաստ ինֆո

ՀՔԱ Վանաձորի գրասենյակը 2011թ.-ից իրականացնում է զանգվածային լրատվության միջոցներով և պաշտոնական կայքէջերով հոգեկան առողջության բնագավառի վերաբերյալ տարածվող հրապարակումների մշտադիտարկում, որը նպատակ ունի բացահայտելու հոգեկան առողջության բնագավառում պետական քաղաքականության և հոգեկան առողջության խնդիրներ ունեցող անձանց խնդիրների լուսաբանման վիճակը: Այս մասին տեղեկանք է ներկայացրել ՀՔԱ Վանաձորի գրասենայկը:

2016թ. հավաքագրված 620 հրապարակումների թվում, ինչպես և նախորդ տարիներին, մեծ տեղ են զբաղեցնում քրեադատավարական գործողությունների վերաբերյալ հրապարակումները (մոտ 30 տոկոս)։ Մինչդեռ եզակի են հոգեկան առողջության բնագավառում առկա խնդիրների և դրանց լուծումների մասին, հոգեկան առողջության խնդիրներ ունեցող անձանց նկատմամբ հասարակությունում առկա կարծրատիպերը կոտրելուն ուղղված հրապարակումները։

Հրապարակումների մեջ օգտագործվող տեքստերը և բառակապակցություններն ու հոգեկան առողջության խնդիրներ ունեցող անձանց կողմից կատարվող ոչ իրավաչափ գործողությունների վերաբերյալ լայնածավալ լուսաբանումն իր հերթին նպաստում է հասարակությունում հոգեկան առողջության խնդիրներ ունեցող անձանց նկատմամբ առկա բացասական կարծրատիպերի խորացմանը, որի հետևանքով վերջիններս ավելի խոցելի են դառնում մարդու իրավունքների պաշտպանության տեսանկյունից։

Շարունակում է մտահոգիչ մնալ հոգեկան առողջության խնդիրներ ունեցող անձանց առնչությամբ կարծրատիպային եզրույթների օգտագործումը՝ տարբեր ոչ իրավաչափ գործողությունները նկարագրող, ներկայացնող հրապարակումներում:

2016թ. կրկին հավաքագրվել են հրապարակումներ, որոնք խախտում են անձի անձնական տվյալների պաշտպանության իրավունքը, քանի որ պարունակում են անձնական տվյալներ՝ առանց այդ տվյալների հրապարակման մասին թույլտվության վերաբերյալ նշումների։ Ավելին՝ 2016թ. այդ հրապարակումների թիվը նախորդ տարվա համեմատությամբ կրկնակի աճել է:

Ուսումնասիրության միջոցով բացահայտված խնդիրների լուծման նպատակով վերստին առաջարկում ենք՝

ՀՀ պետական մարմիններին՝

բացառել հոգեկան առողջության խնդիրներ ունեցող անձանց նույնականացնող տվյալներ պարունակող հրապարակումները, երբ բացակայում է դրա օրինաչափ նպատակը,
միջոցներ ձեռնարկել հոգեկան առողջության խնդիրներ ունեցող անձանց նկատմամբ հասարակությունում առկա բացասական կարծրատիպերի վերացման ու կանխարգելման ուղղությամբ,
մեծացնել հոգեկան առողջության խնդիրներ ունեցող անձանց իրավական, առողջապահական և սոցիալական խնդիրների լուծման ուղղությամբ պետության կողմից իրականացվող գործողությունների մասին իրազեկման ծավալները:
Զանգվածային լրատվության միջոցներին հորդորում ենք՝

զերծ մնալ անձնական այնպիսի տվյալների հրապարակումից, որով հնարավոր է նույնականացնել հոգեկան առողջության խնդիրներ ունեցող անձանց, երբ բացակայում է դրա օրինաչափ նպատակը,
զերծ մնալ հոգեկան առողջության խնդիրներ ունեցող անձանց նկատմամբ առկա բացասական կարծրատիպերն ամրապնդող հրապարակումներից, ինչպես նաև նրանց պիտակավորող, կարծրատիպեր առաջացնող տեսքտերի, եզրույթների և բառակապակցությունների կիրառումից։

Աղբյուր` Փաստինֆո