Փաստ ինֆո

«Պատանի լրագրողներ» դպրոցի տնօրենի կողմից 22-ամյա ապագա բժիշկ Լևոն Սահակյանի սպանության աղմկահարույց գործով այսօր սկսվեց դատաքննությունը:

Ըստ ամբաստանյալ Վահան Ղազարյանին առաջադրված մեղադրանքի, նա Թերլեմազյան փողոցի 3-րդ հասցեում, Լևոն Սահակյանի նշանածին աշխատավարձ չվճարելու հարցի շուրջ Լ.Սահակյանի հետ վիճաբանության և քաշքշուկի մեջ է մտել, որի ժամանակ իր մոտ առկա ծալովի դանակով մեկ անգամ հարվածել է վերջինիս ոտքին և մեկ անգամ կրծքավանդակի շրջանին, որի հետևանքով Լ. Սահակյանը մահացել է:

Ամբաստանյալը հայտարարեց, որ ինքն իրեն մեղավոր չի ճանաչում և որ ինքը 40 տարեկան է, մարդասպան չէ:

Դատարանի սահմանած ապացույցների հետազոտման կարգի համաձայն, նախ հարցաքննվեց տուժողի իրավահաջորդ Տիգրան Սահակյանը: Տուժողի հայրը հայտնեց, որ հոկտեմբերի 19-ին իրեն զանգահարել է որդին ու ասել, որ մեքենայի մեջ է, վիրավոր է, ստացել է դանակի հարվածներ: Իր հետ հեռախոսազրույցում որդին ասել է, որ ինքը դեռ բան չասած՝ տնօրենը միանգամից հարձակվել է իր վրա ու խփել:

Որդին իրեն ասել է, որ շունչը կտրվում է, նա ինքն է մեքենան վարել և դիմել բուժօգնության, քանի որ իր ընկերը մեքենա վարել չգիտեր: Հիվանդանոցում առաջին պահին կարծել են, որ լուրջ բան չկա, սակայն վիրահատության ժամանակ պարզվել է, որ երիտասարդի սիրտն ու թոքը վնասված են, ծանր իրավիճակ է, երիտասարդի կյանքը չի հաջողվել փրկել:

Վահան Ղազարյանին մեղադրանք առաջադրվեց դիտավորյալ սպանության համար

Դեպքից երկու ամիս առաջ տուժողն ամբաստանյալի հետ եկել էր համաձայնության, որ հոկտեմբերի 20-ին կվճարվի իր նշանածին չվճարված աշխատավարձի գումարը՝ 110 hազար դրամի չափով: Ըստ տուժողի իրավահաջորդի, ինքը հետաքրքրվել է՝ մյուս աշխատողների հետ էլ տնօրենն ունեցել է չվճարումների խնդիրներ:

Տուժողի հայրն ասաց, որ պայմանավորված հանդիպման նախօրեին՝ սպանության օրը, Վահան Ղազարյանն է զանգել իր որդուն, տեսնելով, որ չպատասխանված զանգ կա իր հեռախոսին, որդին հետադարձ զանգ է կատարել Վահան Ղազարյանին:

Բուն միջադեպի մասին հայրն իմացել է որդու ընկերոջից, ով նույնպես գտնվել է «Պատանի լրագրողներ» դպրոցի տնօրենի աշխատասենյակում՝ որդու հետ միասին:

Տնօրենն իր որդուն հայտարարել է, որ փող չունի տալու, հետո էլ կերևա: Տուժողն ասել է այդ դեպքում տեսախցիկը կտաս: Ըստ տուժողի հոր, ամբաստանյալը սկսել է քաշքշոցը՝ «ո՞ւմ կամերան ես տանում» ասելով:

Մինչ տուժողի ընկերը փորձում էր նրանց բաժանել, ամբաստանյալը հետ-հետ է գնացել, կտրուկ շուռ եկել ու հարձակվել Լևոնի վրա՝ Վահան Ղազարյանի ձեռքին դանակ կար: Ըստ տուժողի ընկերոջ պատմածի, ինքը խփելու պահը չի հիշում, հիշում է, որ իրար քաշքշում էին:

Տուժողի ընկերը պատմել է, որ երբ ինքն ու տուժողը դուրս են եկել մեքենայի մոտ, ամբաստանյալը դուրս է եկել՝ ձեռքին ատրճանակ կար, սակայն տուժողի ընկերոջ և տնօրենի հետ դուրս եկած երրորդ անձի խոսքերից հանդարտվել է ու ներս մտել:

Հաջորդ դատական նիստում կսկսվի վկաների հարցաքննությունը:

Այսօրվա դատական նիստում, մինչ դատաքննության սկսվելը, դատարանը մինչև գործի էական հանգամանքների պարզումն ու ապացույցների հետազոտման ավարտը հետաձգեց պաշտպանական կողմի միջնորդությունը դատահոգեբանական փորձաքննություն նշանակելու մասին: Ըստ պաշտպան Մնացական Սարգսյանի, եթե պարզվի, որ մեղսագրվող արարքն ամբաստանյալը կատարել է հանկարծակի առաջացած հոգեկան խիստ հուզմունքի վիճակում, ապա  արարքն ենթակա է վերաորակման, իսկ նման վիճակ եղե՞լ է, թե՞ ոչ կարող են պարզել համապատասխան մասնագիտական գիտելիքներ ունեցող անձինք՝ հոգեբան փորձագետները:

Աղբյուր` Փաստինֆո