Փաստ ինֆո

Իրավագիտության դոկտոր Արթուր Ղամբարյանը Ֆեյսբուքում քննիչների ուշադրությունն է հրավիրել օրերս Սահմանադրական դատարանի ընդունած որոշման վրա: «ՀՀ սահմանադրական դատարանը նոր հրապարակեց իրավակիրառ պրակտիկայի տեսանկյունից խիստ կարևոր` ՍԴՈ-1372 որոշումը, որի եզրափակիչ մասի 2–րդ կետի համաձայն` գործի վարույթը կարճելու միջոցով նախաքննությունն ավարտելիս տուժողի կամ օրենսգրքի 262-րդ հոդվածի 1-ին մասով սահմանված դատավարության մյուս մասնակիցների գործի նյութերին ծանոթանալու իրավունքն իրացվում է մինչև գործի վարույթը կարճելու և քրեական հետապնդումը դադարեցնելու մասին որոշում կայացնելը, այն է՝ նախաքննության ավարտին նախորդող ժամանակահատվածում»,- նշում է Արթուր Ղամբարյանը՝ հայտնելով իր մասնավոր կարծիքը:

Ըստ իրավագիտության դոկտորի, այս դիրքորոշումից բխում է, որ այսուհետ փոխվելու է վարույթի մասնավոր մասնակիցներին վարույթը կարճելու դեպքում գործի նյութերին ծանոթացնելու ժամանակագրությունը։ Մեղադրական եզրակացությամբ վարույթն ավարտելուն պես, վարույթը կարճելու դեպքում նախ պետք է ծանոթացնել գործի նյութերին, այնուհետև` կայացնել կարճման մասին որոշում:

«ՍԴ–ի այս որոշումը դրական է, ազդելու է նախաքննության համակողմանիության վրա և նվազեցնելու է վարույթը կարճելու մասին որոշումները բողոքարկելու և այն վերացնելու դեպքերը։

Օրենքով նախատեսված չէ, մինչև վարույթը կարճելը, գործի նյութերին ծանոթացնելու դատավարական ձևի առանձնահատկությունները, ուստի պետք է գործեն ընդհանուր դրույթները»,- հավելում է իրավագիտության դոկտորը։

Աղբյուր` Փաստինֆո