Փաստ ինֆո

ՀՖՖ-ի նախագահ Ռուբեն Հայրապետյանը լրագրողների հետ հանդիպման ժամանակ խոսեց նաև այն ֆուտբոլիստների մասին, որոնք ինչ-ինչ պատճառներով այլևս չեն հրավիրվում Ազգային հավաքական:

- Պարո՛ն Հայրապետյան, մոտ մեկ ամիս առաջ Յուրա Մովսիսյանը հարցազրույցներից մեկում նշել էր, որ շատ է կարոտում Հայաստանի հավաքականը: Դուք դեռ մնու՞մ եք նույն որոշմանը: Մովսիսյանին մենք չե՞նք տեսնի հավաքականում:

- Եթե կարոտում է, թող հավաքականի խաղերի տեսագրություններն անընդհատ դիտի: Եթե կարոտում են, ինչու՞ էին փախչում հավաքականի խաղերից: Ինչու՞ էին հրաժարվում հավաքականում խաղալուց: Վերջին 3 տարվա ընթացքում Յուրա Մովսիսյանն ինչո՞վ էր զբաղված: Կարոտում է: Պետք չէ դեմագոգիայով զբաղվել: Եթե կարոտում էր, ինչու՞ էր փախչում խաղերից, խաղից մեկ ժամ առաջ գալիս ասում՝ ոտքս է ցավում ... բազմաթիվ բաներ են եղել: 

-Իսկ դարպասապահ Գևորգ Կասպարովին կտեսնե՞նք հավաքականում:

- Ոչ:

-Ինչու՞:

- Որովհետև մարզիչն իրեն չի հրավիրում: 

- Իսկ Դուք համակարծի՞ք եք մարզչի հետ Կասպարովի առումով:

- Եթե մարզիչը որոշում է կայացնում, բնականար համակարծիք եմ: Ես միշտ մարզչի և նրա որոշման կողքին եմ: Ինչպես նաև՝ մարզիչն իմ որոշման: Մեկ ընտանիքի պես ենք: Չեք պատկերացնի՝ ինչ գեղեցիկ կոլեկտիվ ենք ձևավորել հավաքականում: Մեկ ընտանիք ենք դարձել: Դարձել ենք այն հավաքականը, որի մասին մենք միշտ երազել ենք: Մի՛ տվեք այդ անունները, որոնք կգան, մոլախոտի պես կմտնեն և կքայքայեն մեր հավաքականը: Հիմա հիանալի մթնոլորտ է հավաքականում: Մեկ ընտանիք է: Թողեք՝ հավաքականը հանգիստ իր խաղերը խաղա:

Աղբյուր` armsport.am