Փաստ ինֆո

Մալաթիայի նախկին թաղապետ Վահան Զատիկյանի որդու՝ Սեդրակ Զատիկյանի սպանության պատվերի գործով մեղադրողը միջնորդել է գործով ամբաստանյալ Նարեկ Խաչատրյանին դատապարտել 15 տարվա ազատազրկման:

Մեղադրողը մեղադրական ճառում գտել է, որ ՀՀ քրեական օրենսգրքի 38-104-րդ հոդվածի 2-րդ մասի 8-րդ կետով՝ պատվերով սպանությանը դրդելը, մեղադրանքն ամբողջ ծավալով ապացուցված է ու հիմնավորված: Հոդվածը նախատեսում է 12-20 տարվա կամ ցմահ ազատազրկում:

Իսկ տուժողի իրավահաջորդի ներկայացուցիչ, փաստաբան Վաղարշակ Գևորգյանը՝ կատարելով տուժողի իրավահաջորդի հանձնարարությունը, միջնորդել է ամբաստանյալի նկատմամբ նշանակել հոդվածով նախատեսված առավել խիստ պատիժ:

Ամբաստանյալի պաշտպան, փաստաբան Վարդուհի Էլբակյանը ժամանակ է խնդրել պաշտպանական ճառի հրապարակմանը նախապատրաստվելու համար: Դատարանը բավարարել է միջնորդությունը և դատական նիստը հետաձգել մինչև հունիսի 20-ը:

Ըստ Նարեկ Խաչատրյանին առաջադրված մեղադրանքի, նա Ստեփան Հակոբյանի հետ, նախնական համաձայնությամբ, նախկինում ունեցած վեճի պատճառով վրեժխնդիր լինելու նպատակով, Արսեն Առուշանյանին նյութապես շահագրգռելով դրդել՝ պատվիրել են սպանել Սեդրակ Զատիկյանին:

Սեդրակ Զատիկյանը սպանվել էր 2006թ. հունիսի 22-ին` Սեբաստիա փողոցում: Արձակված կրակահերթից մահացել էր նաև պատահական մի անցորդ՝ երեք անչափահաս երեխաների մայր Կարինե Սարգսյանը:

Նշենք, որ սպանության պատվերի մեկ այլ գործով արդեն կա օրինական ուժի մեջ մտած դատավճիռ, որով Ստեփան Հակոբյանը մեղավոր է ճանաչվել նույն՝ ՀՀ քրեական օրենսգրքի 38-104-րդ հոդվածի 2-րդ մասի 8-րդ կետով և դատապարտվել ազատազրկման 15 տարի ժամկետով:

Ավելի վաղ՝ բուն սպանության գործով 2007թ. կայացված դատավճռով սպանության մեջ մեղադրվող Արսեն Առուշանյանը դատապարտվել է ցմահ ազատազրկման, իսկ Արթուր Հովհաննիսյանն ու Լուսինե Ղևոնդյանը՝ տևական ազատազրկման՝ սպանությանը օժանդակելու համար:

Աղբյուր` Փաստինֆո