Փաստ ինֆո

2013թ.-ին, երբ ընդունվեց քննիչների, դատավորների, դատախազների թոշակները բարձրացնելու մասին օրենքը, այն լուրջ խնդիրներ առաջացրեց: «Պետական պաշտոններ զբաղեցրած անձանց սոցիալական երաշխիքների մասին» և «ՀՀ քննչական կոմիտեի մասին» օրենքներում փոփոխություններ կատարելու մասին օրենքի նախագծերի փաթեթի քննարկման ժամանակ հայտարարեց ՀՀ ազգային ժողովի ՀՀԿ խմբակցության պատգամավոր, ՀՀ նախկին գլխավոր դատախազ Գևորգ Կոստանյանը:

Պատգամավորը, մասնավորապես, նշեց, որ այդ ժամանակ 20-ամյա աշխատանքային ստաժ ունեցող փորձառու մասնագետները համատարած անցան թոշակի՝ բարձր թոշակ ստանալու պատճառով:

«Եվ արդյունքում ստացվում էր, որ թոշակի գնացած դատախազն ավելի շատ փող էր ստանում, քան այդ պահին որպես դատախազ պաշտոնավարող սուբյեկտը: Աբսո՛ւրդ: Իրավիճակը հանգեցրեց նրան, որ այո՛, աշխատող սուբյեկտները, որոնք պոտենցիալ ունեն, դուրս եկան համակարգից, դրա փոխարեն եկան երիտասարդներ, ովքեր ավելի ցածր էին ստանում, քան դատախազը, որը տանը նստած է»,- մանրամասնեց ԱԺ պատգամավորը:

Ըստ Գևորգ Կոստանյանի, փոփոխության մեջ մի շատ կարևոր հանգամանք կա. իհարկե, բարձր թոշակն անհրաժեշտություն է, բայց առավել կարևոր է սոցիալական ապահովության կայունությունը, որն անհրաժեշտ է հասարակությանը և հատկապես՝ պետական ծառայողին:

«Պատկերացրեք քննիչ, դատախազին, որը չունի կայունության երաշխիք, այո, իր գործունեությունը դառնում է կոռուպցիոն, ռիսկի գոտում գտնվող»,- հավելեց նախկին գլխավոր դատախազը՝ համաձայնելով իր որոշ գործընկերների տեսակետի հետ, որ այս օրենքը հակակոռուպցիոն ուղղվածություն ունի:

Գևորգ Կոստանյանը հույս հայտնեց, որ մոտակա տարիներին «մենք չենք ունենա պետական ծառայողների կարգավիճակը վատթարացնող օրենքներ»: Պատգամավորը պարզաբանեց, որ սոցիալական ապահովության ոլորտի օրենքների կայունության ամենակարևոր երաշխիքը երկարատևությունն է: «Այն հանգամանքը, որ մենք երեք տարի հետո սոցիալական ապահովության բնույթի օրենք ենք փոխում, սա լավ չի, բայց անհրաժեշտություն է, ցավոք սրտի, այս պահին»,- ասաց Գևորգ Կոստանյանը՝ ընդգծելով, որ դա չի նշանակում, որ դա անհատին ուղղված օրենք է, դա երևույթին, համակարգերին ուղղված օրենք է:

Աղբյուր` Փաստինֆո