Փաստ ինֆո

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում շուրջ 10 ամիս ընդմիջումից հետո կայացավ 2013թ. հուլիսի 31-ին զինծառայող Մանուչար Մանուչարյանին ինքնասպանության հասցնելու գործով հերթական դատական նիստը:

Երկարատև ընդմիջման պատճառն այն, որ ամբաստանյալ Արման Ստեփանյանի պաշտպան Նորայր Նորիկյանի կողմից ներկայացվել էր լրացուցիչ դատահոգեբուժական և հոգեբանական փորձաքննություն նշանակելու մասին միջնորդությունը, որը դատարանը բավարարել էր, և արդյունքում 10-ն ամիս անց ստացվել են փորձաքննության եզրակացության արդյունքները:

Զինծառայողին ինքնասպանության հասցնելու գործով պաշտպանի միջնորդությունը բավարարվեց. նշանակվեց լրացուցիչ փորձաքննություն

Այսօր դատարանում մեղադրող դատախազը հրապարակեց փորձաքննության եզրակացության եզրափակիչ մասը: Նախ նշենք, որ փորձաքննությամբ առաջադրված մի շարք հարցերի պատասխաններ չեն տրվել.  հոգեբան փորձագետի իրավասության սահմաններից դուրս են եղել:

Այսպիսով, փորձագետները հանգել են հետևության, որ հետազոտվող իրավիճակի վերաբերյալ ներկայացված քրեական գործում առկա տեղեկությունների խիստ հակասական լինելու պայմաններում հաշվի առնելով այն հանգամանքը, որ նրանց արժանահավատության գնահատումը դուրս է հոգեբան փորձագետի իրավասության սահմաններից՝  հնարավոր չէ միանշանակ եզրահանգում կատարել՝ դեպքին նախորդող ժամանակահատվածում Մանուչարյանի հոգեվիճակի, ինչպես նաև՝ Գաբոյանի և Ստեփանյանի գործողությունների և Մանուչարյանի մահվանը նախորդող ժամանակահատվածում ունեցած հոգեվիճակի միջև առկա պատճառահետևանքային կապի մասին:

Ըստ եզրակացության՝ նախաքննության և դատաքննության ընթացքում Լ.Մկրտչյանի, Ա.Սահակյանի և Աբրահամյանի կողմից հայտնած տվյալների համաձայն և քրեական գործում առկա տեղեկությունները արժանահավատ գնահատելու պարագայում կարելի է եզրակացնել, որ Մ.Մանուչարյանը դեպքին նախորդող օրերին գտնվել է խիստ ընկճված հոգեվիճակում՝ Բ.Գաբոյանի գործողությունների և Մ.Մանուչարյանի մահվանը նախորդող ժամանակահատվածում ունեցած հոգեվիճակի միջև առկա է եղել պատճառահետևանքային կապ, իսկ Ա.Ստեփանյանի գործողությունների և Մ.Մանուչարյանի մահվանը նախորդող ժամանակահատվածում ունեցած իրավիճակի միջև՝ անուղակի:

Ամբաստանյալ Բաբկեն Գաբոյանի պաշտպան Հրանտ Անանյանի գնահատմամբ՝ փորձագետները զերծ են մնացել որոշ հարցերի պատասխանելուց զուտ կամայականորեն:

Մեղադրող դատախազն այլ կարծիք ուներ. ըստ նրա ՝ սկզբնական եզրակացությունը և ներկայիս եզրակացությունը նույնական են, և ելակետերի հետ որևէ փոփոխություն տեղի չի ունեցել, և ելակետերը մնացել են հիմնականում նույնը:

Ըստ տուժողի իրավահաջորդի ներկայացուցիչ իրավապաշտպան Ռուբեն Մարտիրոսյանի՝ 9 ամիս փորձագետները ջուր են ծեծել, բացարձակ ոչինչ չեն արել և վերջում հանգել են զրոյական եզրակացության, դատարանը փորձում էր այդ բարդ խնդիրը թողնել փորձագետների վրա, սակայն փորձագետները հրաժարվել են պատասխան տալ հարցերին:

Ամբաստանյալ Արման Ստեփանյանի պաշտպան Նորայր Նորիկյանն էլ նշեց, որ եզրակացության վերաբերյալ իրենց դիրքորոշմանը պաշտպանական ճառում ավելի մանրամասն կանդրադառնան, սակայն, ըստ պաշտպանի, տարակուսելի էր մեղադրողի արտահայտած դիրքորոշումը ելակետային տվյալների վերաբերյալ այն դեպքում, երբ դատաքննության ընթացքում վկաների գերակշռող մասը նախաքննության  ընթացքում տված ցուցմունքին տրամագծորեն հակառակ ցուցմունքներ են տվել:

Ըստ պաշտպանի՝ մտահոգիչ է, որ մեղադրողի կողմից սկզբնական եզրակացության և ներկայիս եզրակացության մեջ նույնականացման խնդիր է դրվում, որպիսի պայմաններում կարելի է  հանգել որոշակի եզրակացության, թե ինչպիսի վերաբերմունք ունի մեղադրող կողմը սույն քրեական գործի հետագա ընթացքի վերաբերյալ:

Նորայր Նորիկյանի կարծիքով՝ այս եզրակացությունը չի փայլում իր օբյեկտիվությամբ և կամայական գնահատականներից զերծ է, բացի այդ, փաստաբանն այստեղ պատասխանատվությունից խուսափելու ձեռագիր է տեսնում՝  փորձագետները, ըստ էության, հրաժարվել են ստանձնել պատասխանատվություն և հստակություն մտցնել սույն քրեական գործով էական նշանակություն ունեցող հանգամանքների վրա՝ այն ինչի համար միտված էր և սույն փորձաքննության նշանակությունը:

Պաշտպանը կատեգորիկ համաձայն է մեղադրողի այն դիրքորոշման հետ, որ սխալ էր փորձաքննության նշանակումը, քանի որ հենց եզրակացությունների միջև էական տարբերությունը խոսում է այն մասին, որ եթե փորձագետները մի փոքր ջանք գործադրեին և օբյեկտիվ գտնվեին այլ պատկեր կլիներ:

Եզրակացության վերաբերյալ դիրքորոշումներ հայտնելուց հետո կողմերը դատաքննությունը լրացնելու միջնորդություններով հանդես եկան: Մասնավորապես, տուժողի իրավահաջորդի  ներկայացուցիչ Ռուբեն Մարտիրոսյանը միջնորդեց դատաքննությունն այլևս չձգձգել՝ հիմք ընդունել, որ Մանուչար Մանուչարյանին սպանել են և ընդունել փաստ, որ Գաբոյանը և Ստեփանյանը Մանուչար Մանուչարյանին չեն ծեծել, չեն հայհոյել, ինքնասպանության չեն հասցրել և այդ հիմքով նրանց արդարացնել:

Մեղադրող դատախազը միջնորդության վերաբերյալ կարծիք հայտնեց՝ նշելով, որ նման դատավճռի հիմքերն իսպառ բացակայում են:

Պաշտպանական կողմն էլ գտավ, որ միջնորդությունը վաղաժամ է:

Դատարանը, լսելով կողմերին, միջնորդության լուծումը հետաձգեց և դրան կանդրադառնա խորհրդակցական սենյակում դատական ակտ կայացնելիս:

Հաջորդը միջնորդությամբ հանդես եկավ ամբաստանյալ Բաբկեն Գաբոյանի պաշտպան Հրանտ Անանյանը դատարանին միջնորդելով իր պաշտպանյալի նկատմամբ քրեական հետապնդումը դադարեցնել. մասնավորապես՝ խոսքը գնում էր Գաբոյանին առաջադրված ՀՀ քրեական օրենսգրքի 360-րդ հոդվածի 2-րդ մասին, որը դասվում է ոչ մեծ ծանրության հանցագործությունների շարքին, պաշտպանը միջնորդեց  վաղեմության ժամկետները լրանալու հիմքով քրեական հետապնդումը դադարեցնել:

Միջնորդության վերաբերյալ կարծիք հայտնելու համար դատախազը ժամանակ խնդրեց:

Մեկ այլ միջնորդությամբ էլ հանդես եկավ տուժողի իրավահաջորդի ներկայացուցիչ Ռուբեն Մարտիրոսյանը: Վերջինս միջնորդեց սպանված Մանուչար Մանուչարյանի հագին եղած աբատը ուղարկել փորձաքննության:

Դատահետքաբանական փորձաքննություն նշանակելու վերաբերյալ մեղադրող դատախազն առարկեց՝ գտնելով, որ միջնորդությունն անհիմն է և ենթակա է մերժման:

Ավելին, մեղադրողը նշեց, որ նախաքննությամբ և դատաքննությամբ հիմնավորվել է, որ Մանուչար Մանուչարյանի հագին եղած տաբատի վրա հրազենային վնասվածքներ չեն հայտնաբերվել:

Դատարանը՝ նախագահությամբ Արթուր Մկրտչյանի, այս և պաշտպան Հրանտ Անանյանի կողմից ներկայացված միջնորդությունների լուծումը հետաձգեց և քննության կառնի հաջորդ՝ հունիսի 12-ին կայանալիք  դատական նիստում:

Նշենք, որ տուժողի իրավահաջորդը հայտարարեց, որ եթե դատարանը մերժի իրենց միջնորդությունը, իրենք հանդես են գալու մեկ այլ միջնորդությամբ, որը մասնավորապես կվերաբերի տուժողի դիակի արտաշիրիմմանը:

Աղբյուր` Փաստինֆո