Փաստ ինֆո

Դատական համակարգում վիճակը՝ կոռուպցիայի առումով, շարունակում է մնալ ողբերգական: ԱԺ արտահերթ նիստում հայտարարել է «Ծառուկյան» դաշինքի պատգամավոր Նաիրա Զոհրաբյանը` ընդգծելով. «Ինչքան էլ դալաններում դատավոր բռնեք՝ հազար դոլար կաշառք վերցնելուց, կաբինետներում, որ վերցվում են կաշառքներ և կայացվում են դատական վճիռներ, դա ակնհայտ է բոլորին»։

Նշենք, որ ԱԺ արտահերթ նիստ է հրավիրվել ՀՀ կառավարության նախաձեռնությամբ， որի օրակարգում ընդգրկված օրինագծերից մեկը վերաբերում է «Պետական պաշտոններ զբաղեցնող անձանց սոցիալական երաշխիքների մասին» օրենքում առաջարկվող փոփոխություններին։ Նախկինում 20-ամյա կենսաթոշակ հատկացվում էր նրանց, ովքեր աշխատանքից կհեռանային մինչեւ 2017 թվականի հուլիսի 1-ը։ Այժմ առաջարկվում է այդ իրավունքն անժամկետ դարձնել բոլոր նրանց համար, ովքեր ծնվել են մինչեւ 1974 թվականը (տարիքով ավելի կրտսերները մասնակցում են կուտակային կենսաթոշակային համակարգին)։

Զոհրաբյանի խոսքերով՝ դատախազներին բարձր աշխատավարձեր ու կենսաթոշակներ են սահմանելու նպատակը մեկն է՝ նրանց անկախ դարձնել գործադիր իշխանությունից եւ որ կաշառքներ չվերցնեն։

«Այդ պարագայում, ներկայացրեք կոռուպցիոն գործերի վիճակագրությունը։ Թե չէ, իբր թե ինչ-որ դատախազի են բռնում հազարավոր դոլարներով։ Իսկ ուշադրություն դարձրեք, թե որքան են նրանք վերցնում իրենց աշխատասենյակներում», - ընդգծեց Նաիրա Զոհրաբյանը։

Ի պատասխան արդարադատության նախարարի առաջին տեղակալ Արթուր Հովհաննիսյանը հայտարարեց, որ կոնկրետ այս օրինագծի նպատակը ոչ թե կոռուպցիայի դեմ պայքարն է, այլ բարձր կենսաթոշակ ստանալու իրավունքի երկարաձգումը։ «Նման կերպ դատախազներն ու քննիչները ժամանակից շուտ թոշակի չեն անցնի՝ ապագայում դրանից չզրկվելու համար։ Նրանք կշարունակեն աշխատել՝ իրենց փորձը ծառայեցնելով իրավապահ համակարգին»,- վստահեցրել է նա։

Լուսանկարը՝ Ֆոտոլուրի

Աղբյուր` Փաստինֆո