Փաստ ինֆո

Երևանի Մաշտոցի պողոտայում աղմկահարույց ծեծռտուքի գործով այսօրվա դատական նիստում պարզվեց, որ չի հաջողվել դատական նիստին ապահովել լրացուցիչ վկայի ներկայությունը:

Ըստ ոստիկանությունից ստացված գրության՝ վկային հնարավոր չի եղել գտնել, քանի որ բնակարանը, որում, գործի տվյալներով, նա հաշվառված է, վկան վաճառել է դեռևս 12 տարի առաջ, և նրա ներկայիս բնակության վայրն անհայտ է:

Մեղադրողն, ում միջնորդությամբ էլ դատարանում պետք է հարցաքննվեր լրացուցիչ վկան, միջնորդեց հրապարակել նրա նախաքննական ցուցմունքը: Մեղադրողը վկայակոչեց ՀՀ քրեական դատավարության օրենսգրքի 342-րդ հոդվածն, ըստ որի վկայի տված ցուցմունքների հրապարակումը թույլատրվում է, եթե վկան դատական նիստից բացակայում է այնպիսի պատճառներով, որոնք բացառում են նրա՝ դատարան ներկայանալու հնարավորությունը:

Դատարանը նկատեց, որ տվյալ նորմը նախատեսված է այն դեպքերի համար, երբ վկան ծանուցվում է, սակայն ինչ-ինչ պատճառով հնարավոր չի լինում նրա ներկայությունն ապահովել: Տվյալ դեպքում վկան ոչ միայն ծանուցված չէ, այլև ի սկզբանե հասցե է տրամադրվել, որտեղ նա 12 տարի չի բնակվել: Դատարանն արձանագրեց նաև, որ խախտվում է անձի (ամբաստանյալների) իրավունքը՝ հարցաքննել իր դեմ ցուցմունք տված անձին:

Ամբաստանյալներից մեկի՝ Գարիկ Բաբախանյանի, պաշտպան, փաստաբան Վարդան Զուռնաչյանն էլ իր հերթին կասկած հայտնեց, որ առհասարակ այդպիսի անուն-ազգանունով անձ բնության մեջ կա:

Դատարանը մերժեց մեղադրողի միջնորդությունը, իսկ մեղադրողի հաջորդ միջնորդությունը վկայի վերաբերյալ լրացուցիչ տեղեկություններ ձեռք բերելու համար ժամանակ տրամադրելու մասին, բավարարվեց:

Դատարանը միաժամանակ արձանագրեց, որ պաշտպանական կողմի մտավախությունը դատական քննության ողջամիտ ժամկետը խախտելու վերաբերյալ, հիմքեր ունի:

Հիշեցնենք, որ գործով ամբաստանյալները չորսն են՝ ամբաստանյալ Անդրանիկ Գաբրիելյանին մեղադրանք է առաջադրվել ՀՀ քրեական օրենսգրքի 176-րդ հոդվածի երկրորդ մասի 1-ին և 4-րդ կետերով՝ մի խումբ անձանց կողմից նախնական համաձայնությամբ կատարված կողոպուտ, որը զուգորդվել է կյանքի կամ առողջության համար ոչ վտանգավոր բռնություն գործադրելով, 258-րդ հոդվածի 4-րդ մասով՝ զենքի կամ որպես զենք օգտագործվող առարկաների գործադրմամբ խուլիգանություն, 34-104-րդ հոդվածի 2-րդ մասի 2-րդ կետ՝ ծառայողական գործունեության կամ հասարակական պարտքի կատարման հետ կապված սպանության փորձ:

Գարիկ Բաբախանյանը մեղադրվում է ՀՀ քրեական օրենսգրքի 176-րդ հոդվածի 1-ին մասով, նույն հոդվածի 2-րդ մասի 1-ին և 4-րդ կետերով, 258-րդ հոդվածի 3-րդ մասի 1-ին և 2-րդ կետերով՝ մի խումբ անձանց կամ կազմակերպված խմբի կողմից կատարված խուլիգանություն, որը զուգորդվել է հասարակական կարգի պահպանություն իրականացնող կամ հասարակական կարգի խախտումը խափանող անձին դիմադրություն ցույց տալով:

Հակոբ Բոյաջյանին մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 1-ին և 4-րդ կետերով, 258-րդ հոդվածի 3-րդ մասի 1-ին և 2-րդ կետերով, իսկ Սամվել Սաֆարյանը՝ ՀՀ քրեական օրենսգրքի 176-րդ հոդվածի 2-րդ մասի 1-ին և 4-րդ կետերով, 258-րդ հոդվածի 3-րդ մասի 1-ին և 2-րդ կետերով:

Աղբյուր` Փաստինֆո