Փաստ ինֆո

Կազմակերպված խմբի կողմից ապօրինի զենք ռազմամթերք պահելու մեջ մեղադրվող Ժիրայր Սեֆիլյանի  գործը թատերական ներկայացման սցենարով գրված քաղաքական գործ է:

Այդ մասին այսօր Ժիրայր Սեֆիլյանի և մյուսների գործով դատական նիստից հետո լրագրողների հետ ճեպազրույցում ասաց Սեֆիլյանի պաշտպան Տիգրան Հայրապետյանը:

Ըստ պաշտպանի՝ Սեֆիլյանի դեմ երկու անձ է ցուցմունք տվել, նրանք երկուսն էլ ամբաստանվում են այս քրեական գործով՝ Հովհաննես Պետրոսյանը և Գալուստ Գրիգորյանը:

Պաշտպանի գնահատմամբ՝ Սեֆիլյանի մեղադրանքը հստակ չէ, և իրենց համար անգամ այս պահին պարզ չէ, թե նրան ինչում են մեղադրում՝ «լղոզված» մեղադրանք է»:

«Թե երբ է նա ցանկացել զավթել շենք, շինություն, դրա մասին ընդհանրապես ոչինչ չկա, ցուցմունքներում առկա է, որ 2015թ. դեկտեմբերի 1-ին պետք է զավթեին շինություններ, այդ ամենից 7 ամիս հետո ինչու՞ Ժիրայր Սեֆիլյանը չի արել դա կամ ինչու՞ այդքան սպասեցին հետո Սեֆիլյանի մեղադրանքը խստացրեցին»:

Փաստաբանը մեկ այլ դրվագի վրա ևս ուշադրություն հրավիրեց. մեղադրանքի համաձայն՝ Սեֆիլյանը բազմաթիվ խմբեր է ունեցել, 200- 300 հոգուց կազմված զինված խումբ, եթե այդպես  է պետք է այդ խմբերը  բացահայտվեին, այդ պարագայում անհրաժեշտ է բեռնաթափել այդ զինված խմբերից Հայաստանը, քանի որ համաձայն մեղադրանքի՝ բացահայտվել են ընդամենը հինգը կամ վեցը:

Անդրադառնալով ներկայումս ամբաստանյալ Հովհաննես Պետրոսյանի ցուցմունքին, պաշտպանը նշեց, որ նա ցանկություն է հայտնել Սեֆիլյանի հետ հանդիպելու, փորձել է սոցիալական ցանցերի միջոցով կապ հաստատել հանդիպել նրա հետ, Սեֆիլյանը չի հանդիպել, որից  հետո, Հովհաննես Պետրոսյանի ցուցմունքի համաձայն, իր մեջ առաջացել է ցանկություն՝ զինված հեղափոխություն կատարելու մասին և մտածել է, որ Սեֆիլյանի մոտ էլ կարող է այդպիսի ցանկություն առաջանալ, գրել է նրան, սակայն պատասխան չի ստացել, իսկ հանրահավաքներին գնալով կարողացել է հանդիպել Սեֆիլյանին: Հետագայում, ըստ Պետրոսյանի, դեկտեմբերի 1-ին, հեռուստաաշտարակը պետք է գրավեին, իբրև թե ինքը գնացել է սխեմաներ կազմելու՝ Սեֆիլյանի ասելով:

Պաշտպանը նշում է, որ հետաքրքիրն այն է, որ Սեֆիլյանն իրեն ասել է սխեմաներ մի պահի, սխեման ինքը պետք է պատռեր, սակայն չի պատռել, տարել է մեկ այլ անձի է ցույց տվել, որից հետո ևս մեկ ուրիշին է ցույց տվել և այդ մեկ ուրիշի բնակարանի խուզարկության ժամանակ էլ սխեմա են գտել:

Այդ մեկ ուրիշն էլ, պարզվում է, ամբաստանյալ Գալուստ Գրիգորյանն է:

Նշենք, որ դատական նիստերի դահլիճում  այսօրվա ներկա էին ինչպես ամբաստանվողների հարազատները, այնպես էլ՝ նրանց համակիրները, այդ թվում նաև՝ քաղաքական գործիչներ:

Դատական նիստի մեկնարկից հետո այն բողոքի ակցիայի նմանվեց. մասնավորապես՝ ներկաների բղավոցները պայմանավորված էր ամբաստանյալներին սատարելու փորձով և դահլիճում լսելի չլինելու դժգոհությամբ, տեխնիկական խնդիրը երբ լուծվեց, դատական նիստը ավարտվեց:

Աղբյուր` Փաստինֆո