Փաստ ինֆո

«168 ժամ»-ը գրում է, որ այսօր Հայաստանի Հանրապետական կուսակցությունը գործադիր մարմնի նիստում քննարկելու է կառավարության թարմացված կազմը:

Այս մասին լրատվամիջոցին ասել է ՀՀԿ խոսնակ, ԱԺ փոխնախագահ էղուարդ Շարմազանովը:

«Վարչապետն արդեն նշանակվել է, մնացածն էլ օրենքով սահմանված կարգով կնշանակվեն կամ կվերանշանակվեն, և օրենքով սահմանված կարգով ծրագիրը կներկայացնեն Ազգային ժողով, որպեսզի մենք հաստատենք»,- ասել է նա:

Է. Շարմազանովը հրաժարվել է մեկնաբանել շրջանառվող տեղեկությունները, թե փոխվելու են ՀՀ առողջապահության ու տրանսպորտի, կապի և տեղեկատվական տեխնոլոգիաների նախարարները: Կառավարության ծրագրի վերաբերյալ նա նշել է, որ ՀՀԿ-ն իր ծրագիրը ներկայացրել է նախընտրական ժամանակահատվածում, իսկ դրանից հետո իշխանության երկարաժամկետ ռազմավարությունն ու անելիքներն Աժ-ում իր ուղերձում ներկայացրել է ՀՀ նախագահը՝ ախտորոշում ու գնահատական տալով բոլոր ոլորտներին:

Խոսելով ԱԺ-ում ՀՀ նախագահ Սերժ Սարգսյանի ելույթի, մասնավորապես՝ 2040թ. թիրախային ցուցանիշների մասին՝ է. Շարմազանովն ասել է. «Ես կարծում եմ, որ այդ ելույթն էականորեն տարբերվում է շատ ելույթներից, նոր մտածողություն է բերում մեր քաղաքական համակարգ, լավ իմաստով նոր խոսք է, որովհետև պատմության մեջ, քաղաքականության մեջ հաջողում են այն պետությունները, որոնք իրենց առջև դնում են ոչ թե 5-10 տարվա ծրագիր, այլ դնում են երկարատև ռազմավարություն»:

Հիշեցնենք, որ ՀՀ կառավարության կառուցվածքը համապատասխանեցվելու է Սահմանադրության փոփոխություններին, համաձայն որի՝ նախարարների թիվը պետք է լինի 18-ը: Այսօր գործադիրում նախարարները 19-ն են: Կրճատվում է ՀՀ կառավարության աշխատակագմի դեկավար-նախարարի քաղաքական պաշտոնը, որը զբաղեցնում է Դավիթ Հարությունյանը:

Ինչպես ավելի վաղ գրել էինք, Դ. Հարությունյանը նոր կառավարությունում զբաղեցնելու է արդարադատության նախարարի պաշտոնը»,- գրում է թերթը:

Հոդվածն ամբողջությամբ կարող եք կարդալ «168 ժամ»-ի՝ 25.05.17թ. համարում:

Աղբյուր` Փաստինֆո