Փաստ ինֆո

Քրեական հեղինակություն համարվող կայարանցի Թևոսիկի եղբոր՝ Արթուր Սաֆարյանի, սպանության գործով այսօրվա դատական նիստում հրապարակվեց ենթադրաբար սպանված Մովսես Ներսիսյանի որդու գրությունը:

Դատարանին ուղղված գրության մեջ նա նշում է, որ եթե դատարանը մեղավոր կճանաչի ամբաստանյալին իր հոր սպանության մեջ, ապա խնդրում է բավարարել քաղհայցը, որպեսզի ինքը հողատարածք վերցնի ու գերեզմանաքար տեղադրի՝ իր հոր հիշատակին:

Մինչդեռ ամբաստանյալ Իսրայել Սարգսյանն այսօր ևս, ինչպես և նախօրեին, շարունակեց պնդել, որ Մովսես Ներսիսյանը ողջ է: Դուք վստա՞հ եք, որ Մովսես Ներսիսյանը ողջ է հարցին հնչեց ամբաստանյալի պատասխանը՝ հարյուր տոկոս: Նա հավելեց, որ ոչ միայն ներքուստ վստահ է, որ Մովսեսն ողջ է, ավելին՝ ինքն է ասել, որ նա հեռանա Հայաստանից: Ինչո՞ւ նախաքննության ժամանակ այդ մասին չեք ասել հարցին, ամբաստանյալը ասաց, որ ի սկզբանե քննիչներին ասել է, որ «Մովսեսը սաղ ա, կոլոդեցի մեջ չի, հետախուզում հայտարարեք», իսկ այլ մանրամասների մասին հիմա է որոշել ասել՝ դատարանում:

Դատարանը՝ սկսելով հարցաքննությունը՝ նկատեց, որ ամբաստանյալի նախօրեի ցուցմունքն ավելի շատ նման է մեղադրական ճառի, քան ցուցմունքի: Մինչդեռ «Ձեր մեղադրանքի հիմքում դրված ապացույցներին ընդհանրապես չանդրադարձաք»,- նկատեց նախագահող դատավոր Արմեն Բեկթաշյանը: Եթե Արթուր Սաֆարյանի սպանության հարցով Տիգրան Ասատրյանի հետ կապված կասկածներ է ունեցել, ինչո՞ւ օրինական ճանապարհով չի դա արել՝ լինելով ոստիկանության նախկին աշխատակից, այլ սեփական նախաձեռնությամբ օպերատիվ-հետախուզական գործողություն կատարել՝ նույն պատասխանը հնչեց՝ ինքը ուզում էր իմանալ Տիգրանը կա՞ սպանության մեջ: Եթե անգամ իր կասկածները հաստատվեին, չէր դիմի իրավապահներին, այլ ընկերներով կորոշեին ինչ անել: «Ես եթե լինեի սպանության մեջ, հաստատ ապացույցները կլինեին, Մովսեսն էլ չկա այդ թեմայով»,- ասաց ամբաստանյալը:

Ըստ Ւսրայել Սարգսյանի, Մովսեսի միֆն առաջացել է Տիգրան Ասատրյանից: «Մոսոն Տիկոյի հետ ուներ ֆինանսական խնդիրներ, ուզում էր իմ միջոցով մտցնել նրան այս թեմայի մեջ», ուզում էր մատաղացու անել Մովսեսին, «տաներ, ցույց տար Թևոսին»:

Իսրայել Սարգսյանը նշեց, որ Արթուր Սաֆարյանի սպանությունից հետո Տիգրանը ցուցումներ էր տալիս՝ հաստատ քիլլեր է եղել, զենքն այստեղ ու այնտեղ փնտրեք, ու գտել են՝ զենքն աղբանոցում, իսկ ձեռնոցը գտել են մի քանի մետր հեռավորության վրա:

Ամբաստանյալը պնդեց, որ իմանալով, որ Մովսեսին վտանգ է սպառնում, ինքն ու Մովսեսը որոշել են, իսկ Մովսեսն առանց իրեն իրագործել է՝ արյան հետքեր է թողել Մագնում հյուրանոցում, դիտահորի մոտ՝ իր հողատարածքի վրա, որպեսզի տպավորություն ստեղծվի, որ Մովսեսը սպանվել է:

Անցյալ դատական նիստում ամբաստանյալը հայտարարել էր, որ սպանությունների վերաբերյալ խոստովանություն արել է Տիգրան Ասատրյանին խոսեցնելու համար, որին նա կասկածում էր սպանության մեջ: Իր և Տիգրան Ասատրյանի խոսակցությունը վերջինս ձայնագրել է ու մոնտաժված տարբերակը ներկայացրել ոստիկանություն: Մինչդեռ նախաքննության ժամանակ ամբաստանյալը ձայնագրության հատվածի վերարտադրությունից հետո ասել է, որ ինքը չէ խոսողը, ձայնն անծանոթ է, չի կարող ասել նաև, թե մյուսն ում ձայնն է:

Դատաքննական ու նախաքննական ցուցմունքներում առկա հակասության վերաբերյալ ամբաստանյալն ասաց, որ նախաքննության ժամանակ մինչև վերջ չի լսել ձայնագրությունը, մտածել է օպերներն են արել, դրա համար էլ այդպես է պատասխանել, միայն մեկ տարի անց է իմացել Տիգրան Ասատրյանի կատարած ձայնագրության մասին:

Պաշտպանական ու մեղադրող կողմերն այսօր հայտնեցին, որ դատաքննությունը լրացնելու միջնորդություններ չունեն: Եթե հաջորդ դատական նիստում տուժող կողմն ևս չունենա այդպիսիք, ապա մեղադրական ճառով հանդես կգա մեղադրող Հայկ Հակոբյանը:

Աղբյուր` Փաստինֆո