Փաստ ինֆո

Քրեական հեղինակություն համարվող կայարանցի Թևոսիկի եղբոր՝ Արթուր Սաֆարյանի, սպանության գործով այսօրվա դատական նիստում գործով ամբաստանյալ Իսրայել Սարգսյանն ամբողջությամբ հերքեց իրեն առաջադրված մեղադրանքը: Նա պնդեց, որ Արթուր Սաֆարյանի սպանության պատվեր չի տվել, իսկ Մովսես Ներսիսյանին էլ չի սպանել ու գցել հորը:

Ավելին, Մովսես Ներսիսյանը ողջ առողջ է ու հեռացել է Հայաստանից՝ ինքն է Մովսեսին ասել՝ «ոտքերդ առ, գնա, ես հավատում եմ, որ դու չկաս մեջը՝ մինչև տեսնենք ինչ է լինում»:

Ամբաստանյալը հավելեց, որ իր մոտ Մովսեսի մոտից մարդ է եկել և պատմել Մովսեսի հեռանալու մասին: Ամբաստանյալը միաժամանակ ընդգծեց, որ «Մովսեսը նորմալ տղա է եղել, չէր կարող այդ հանցագործությունն անել»:

Ի.Սարգսյանն ընդգծեց, որ Մովսեսը շատ ձևերով կարող էր ցույց տալ, որ ինքը ողջ-առողջ է, սակայն «ես կալանքի տակ եմ, ո՞նց անեմ»:

Իր ցուցմունքներում ամբաստանյալը անդրադարձավ իր և Տիգրան Ասատրյանի խոսակցության «մուտիլովկա ձայնագրությանը», որում Ի.Սարգսյանը խոստովանում է, որ սպանության պատվեր է տվել ու սպանել Մովսես Ներսիսյանին: Խոստովանության երեք հնարավոր պատճառ կա՝ ինքն ու Տիգրանը հանցակիցներ են, ինքը լուրջ պատճառներ ուներ կասկածելու Տիգրանին ու խոսում էր Տիգրանին խոսեցնելու համար և երրորդ պատճառն այն է, որ ինքը խելագար մարդասպան է և առանց մոտիվի մարդ է սպանում:

Ամբաստանյալը նշեց, որ տվյալ դեպքում խոստովանության պատճառը Տիգրանին խոսեցնելն է եղել:

Ըստ Իսրայել Սարգսյանի վարկածի, Տիգրանը քավոր-սանիկական հարաբերություններ ուներ Արթուր Սաֆարյանի հետ այն դեպքում, որ նրա եղբոր՝ Թևոսի, հետ Տիգրանը թշնամական հարաբերությունների մեջ է եղել: Տարբեր լուրջ մարդկանց Տիգրանն ասել է՝ Թևոսն ինձ գցել է, իրավունք չուներ, ես իրեն պատժելու եմ:

Թշնամանքն, ըստ ամբաստանյալի, ծագել է այն ժամանակ, երբ Թևոսը պետք է Տիգրանին փոխանցեր վերջինիս 5 մլն դոլարանոց ապրանքի երեք մլն-ը և չի փոխանցել: Ու երբ դրանից հետո Տիգրանը դարձավ Արթուրի երեխայի քավորը, շատերը զարմացան, իր համար էլ դա զարմանալի ու անհասկանալի էր՝ հարցականներ են առաջանում, ասաց ամբաստանյալը:

Իսրայել Սարգսյանը պնդեց, որ Տիգրանը «շակալի պես» ձայնագրել է իր և Իսրայել Սարգսյանի խոսակցությունը, մոնտաժված տարբերակը տվել իրավապահներին: Ամբաստանյալն ընդգծեց՝ շատ կուզեմ, որ ամբողջական ձայնագրությունը լիներ: «Եթե մաքուր տղա ես, ինչո՞ւ ես մոնտաժում, իրավապահներն իրենք կորոշեն՝ ո՛ր մասը կապ ունի գործի, իսկ ո՛րը՝ չունի»:

Ամբաստանյալը շատ կուզեր նաև, որ «Էդգարն (գործով վկա, «Փոքր Մհեր» կրթահամալիրի նախկին տնօրեն Էդգար Միքայելյանը) այստեղ լիներ, ցուցմունք տար, բայց «նրան որ կախեցին, դա просто так չէր»: Ամբաստանյալը հայտարարեց, որ ինքը Էդգարին չի ասել՝ ոնց կլինի, եթե մարդուն կոլոդեցը գցես: Ըստ ամբաստանյալի, ինքը խոսել է միայն ջրհորի մոտ գտնվող իր հողատարածքի կանալիզացիոն հարցերի շուրջ:

Ամբաստանյալը հայտարարեց նաև, որ հավաստի աղբյուրներից տեղեկություն ունի, որ Արթուր Սաֆարյանի սպանությունից երկու օր առաջ Հայաստան են եկել և սպանության օրը տարբեր ժամերի Հայաստանից հեռացել երկու անձինք, որոնց համարում են քիլլերներ: «Ես չեմ պատրասվում դրա համար նստել, ես կապացուցեմ, որ տվյալ հանցագործության մեջ ես չկամ»,- ասաց ամբաստանյալը:

Ամբաստանյալը հայտարարեց, որ ինքը Մովսես Ներսիսյանի ենթադրյալ սպանության օրը չի հանդիպել վերջինիս հետ, չի նստել նրա ավտոմեքենան, չի գնացել «Մագնում» համալիր (որտեղ ենթադրաբար սպանվել է Մովսես Ներսիսյանը), չի գնացել օդանավակայան: Եթե ինքն ունի ալիբի, այսինքն՝ դեպքի ժամանակ եղել է այլ վայրում, ինչո՞ւ գործընկերները չեն հաստատել այն, հարցին ի պատասխան հայտարարեց, առաջվա ընկերությունը չկա, դրա համար էլ չեն հաստատել ալիբին:

Ամբաստանյալը հայտարարեց, որ դատավճիռը կանխորոշված է, սակայն փառք Աստծո, կա Մարդու իրավունքների եվրոպական դատարան:

Հարցաքննությունը կշարունակվի վաղը:

Աղբյուր` Փաստինֆո