Փաստ ինֆո

«Շենգավիթ» ԲԿ-ում ծննդկան Մերի Մարգարյանի առողջական վիճակը ճիշտ չի գնահատվել, իսկ մինչ վիճակի գնահատումը՝ առկա ջերմությամբ և անամնեստիկ տվյալներով հղիին չհոսպիտալացնելը հիմնավորված չի եղել: Այդ մասին այսօր գործով դատական նիստին հայտարարեց ՀՀ ԱՆ «Դատաբժշկական գիտագործական կենտրոն» ՊՈԱԿ-ի բարդ դատաբժշկական փորձաքննությունների բաժնի վարիչ Գագիկ Հարությունյանը, ով եղել է դատաբժշկական փորձաքննության հանձնաժողովի նախագահը:

Ըստ Հարությունյանի, հղի մոտ 38 և ավելի ջերմությունը համարվում է բարձր ջերմություն, սակայն մասնավոր դեպքերում 37 աստիճանի պարագայում հարկավոր է ջերմող անձին ուշադրության կենտրոնում պահել:

Մերի Մարգարյանին հոսպիտալացման խնդիրն առաջացել է այն պահին, երբ նա դիմել է բժշկի՝ հաշվի առնելով այն հանգամանքը, որ նա գտնվել է 35 շաբաթական հղիության  ընթացքում, ունեցել է բարձր ջերմություն, գանգատվել է թուլությունից:

Փորձագետը պնդեց, որ Մերի Մարգարյանի մոտ առկա աշխտանշանները՝ ջերմություն, թուլություն, հաճախասրտություն, սրտխառնոց և այն որ նա գտնվել է հղիության 35 շաբաթականում, այս ամենից կարող էին մտածել հեստոզի մասին՝ նույնիսկ, եթե չկային լաբորատոր տվյալներ:

«Վատը մտածելով կարող էին կանխել»,- ասաց փորձագետը՝ հավելելով, որ հղին պետք է գտնվեր դինամիկ հսկողության տակ:

Իսկ 2015թ. հուլիսի 27-ին,  երբ առավոտյան կատարվել են կլինիկոլաբորատոր հետազոտություններ, այդ ժամանակ արդեն ցուցում է եղել կեսարյան հատում կատարելու: «Որքան շուտ կատարվեր կեսարյան հատումը, այնքան հնարավոր կլիներ կանխել հետագա բարդությունները»,- ասաց Հարությունյանը:

Ինչ վերաբերում է հարցին, թե հնարավո՞ր էր արդյոք նախապես ախտորոշել հեստոզը, այսինքն՝ ամսի 23-ին 24-ին, 25-ին, ապա փորձագետը նշեց, որ ախտորոշելու հիմքեր չեն եղել, սակայն կարող էին այդ մասին մտածել՝ ելնելով հղիի մոտ ընդհանուր պատկերից, որևէ խանգարող հանգամանք չի եղել՝ հեստոզ ախտորոշելու, ուստիև կարող էին հանգիստ ախտորոշել:

Իսկ թե ինչո՞վ էր պայմանավորված Մերի Մարգարյանի տեղափոխումը «Շենգավիթ» ԲԿ-ից «Էրեբունի ԲԿ, փորձագետի համար անհասկանալի է:

Գագիկ Հարությունյանի խոսքով՝ Մերի Մարգարյանի մոտ սուբարախնոիդալ արյունազեղում չի եղել, իսկ թե որտեղից են վերցրել, որ կարող էր լինել ինքը չի կարող պատասխանել, սակայն, ըստ նրա, այդ ախտորոշումը ընդամենը միջոց է եղել՝ հղիին «Էրեբունի» ԲԿ տեղափոխելու համար:

Նշենք, որ «Շենգավիթ» ԲԿ-ի փաստաթղթերում որևէ տեղ նշված չէ, որ Մերիի վիճակը ծանր է գնահատվել, ուստիև՝ եթե ծանր չի եղել, այդ դեպքում ինչո՞ւ են տեղափոխել բազմապրոֆիլային հիվանդանոց, «պահեիք Ձեր մոտ, բուժեիք»,- ասաց նա:

Հիշեցնենք նաև, որ 2015թ. հուլիսի 27-ին «Շենգավիթ» ԲԿ-ի կողմից հրավերով Մերի Մարգարյանին հետազոտելու է եկել  «Սուրբ Աստվածամայր» ԲԿ-ի նյարդաբան Գայանե Խաչատրյանը, ով դատարանում հարցաքննվելու ժամանակ հայտարարեց, որ Մերիի գիտակցականը խանգարված է եղել, հարցերին պատասխանել է ուշացումով ու դժվարությամբ, խոսքը ևս խանգարված է եղել, դժվար է արտահայտվել:

Ըստ նյարդաբանի՝ զննելու արդյունքում Մերիի մոտ ներգանգային ճնշման բարձրացում է նկատվել և քանի որ ինքը կասկածել է սուբարախնոիդալ արյունազեղում, գտել է, որ անհրաժեշտ է, որպեսզի Մերիին բազմապրոֆիլային հիվանդանոց տեղափոխեն և կատարեն համակարգչային տոմոգրաֆիա:

Ինչպես տեսնում ենք, ո՛չ այդ ժամանակ, ո՛չ «Էրեբունի» ԲԿ-ի կողմից, ո՛չ էլ հետագայում՝ դիակի դատաբժշկական փորձաքննությամբ Մերի Մարգարյանի մոտ սուբարախնոիդալ արյունազեղում չի հայտնաբերվել:

Ըստ գործի նյութերի՝ Մերի Մարգարյանը «Էրեբունի» ԲԿ է տեղափոխվել, հուլիսի 27-ին՝ ժամը 15.15-ին, և վիրահատության է  ենթարկվել ժամը 17.15-ին: ԲԿ ընդունվելուց 2 ժամ անց կեսարյան հատում անելու հանգամանքը պաշտպանական կողմի գնահատմամբ ուշացում է, քանի որ ըստ նրանց, եթե անհրաժեշտություն է եղել անհապաղ կեսարյան հատում կատարելու, ապա ինչու ավելի վաղ չեն կատարել, հարցի վերաբերյալ Գագիկ Հարությունյանը նշեց, որ, ըստ իրեն, այդ ժամանակը նորմալ է, քանի որ նրանց ժամանակ է հարկավոր եղել՝ իրենց ԲԿ տեղափոխված հիվանդին զննելու և խնդիրները պարզելու համար, ուստիև՝ այդ ժամանակը նորմալ է:

Ինչ վերաբերում է նշված փուլում HELLP-ի ախտորոշմանը, ապա, ըստ փորձագետի, անհավանական էր կյանք փրկել:

Նորածնի վերաբերյալ էլ փորձագետը նշեց, որ երեխան ճիչով չի ծնվել, եղել է մեռելածին, սակայն «Էրեբունի» ԲԿ-ի փաստթաղթերը կրկին ընթերցելուց հետո հաստատեց, որ երեխայի ծնվելուց հետո նրան վերակենդանացման փորձ է արվել և 10 րոպե անց սրտի բաբախ է գրանցվել, ինչից հետո երեխան 3 օր ապրել է և մահացել է հուլիսի 30-ին:

Նշենք նաև, որ Շուշանիկ Բախշյանը, երբ հարցեր էր ուղղում փորձագետին հայտարարեց, որ Մերիի մասին խոսելը իր համար դժվար է, իրենք ցանկացել են Մերիին փրկել:

Հաջորդ նիստին դատարանը կանցնի ամբաստանյալների հարցաքննությանը, ըստ ամենայնի՝ կհարցաքննվի ամբաստանյալ Անի Բաբելյանը, քանի որ, Շուշանիկ Բախշյանի պաշտպան Ալեքսանդր Սիրունյանի հայտարարության համաձայն, Բախշյանը չի ցանկանում ցուցմունք տալ:

Ըստ մեղադրանքի՝ Շուշանիկ Բախշյանը, աշխատելով «Շենգավիթ բժշկական կենտրոն» ՓԲԸ-ում՝ որպես մանկաբարձ-գինեկոլոգ, հանդիսանալով բժշկական օգնություն և սպասարկում իրականացնող անձ, 2015թ. փետրվարի 11-ից հաշվառման է վերցրել և վարել Մերի Վաղինակի Մարգարյանի հղիությունը:

Բժշկական օգնությունը և սպասարկումը կազմակերպելու ժամանակ պարտավոր լինելով Մերի Մարգարյանին ցուցաբերել անհետաձգելի, առաջին բժշկական օգնություն՝ անկախ այդ օգնության դիմաց վարձատրությունը երաշխավորող հիմքերի և այլ հանգամանքների առկայությունից, ինչպես նաև՝ ապահովել ցուցաբերվող բժշկական օգնության և սպասարկման քանակական և որակական բնութագրիչների համապատասխանությունը սահմանված չափանիշներին, իր մասնագիտական պարտականությունների նկատմամբ անփույթ և անբարեխիղճ վերաբերմունքի հետևանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի` Մերի Մարգարյանի, այնուհետև` նորածնի մահը:

Գործով մեղադրանք՝ առաջադրվել նաև Նույն ԲԿ-ի մանկաբարձ-գինեկոլոգ Անի Բաբելյանին: Վերջինս, 2015թ. հուլիսի 25-ին բժշկական օգնությունը և սպասարկումը կազմակերպելու ժամանակ պարտավոր լինելով Մերի Մարգարյանին ցուցաբերել անհետաձգելի, առաջին բժշկական օգնություն` անկախ այդ օգնության դիմաց վարձատրությունը երաշխավորող հիմքերի և այլ հանգամանքների առկայությունից, ինչպես նաև՝ ապահովել ցուցաբերվող բժշկական օգնության և սպասարկման քանակական և որակական բնութագրիչների համապատասխանությունը սահմանված չափանիշներին, իր մասնագիտական պարտականությունների նկատմամբ անփույթ և անբարեխիղճ վերաբերմունքի հետևանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի` Մերի Մարգարյանի, այնուհետև` նորածնի մահը:

Շուշանիկ Բախշյանին և Անի Բաբելյանին մեղադրանք է առաջադրվել ՀՀ քրեական օրենսգրքի 130-րդ հոդվածի 2-րդ մասի հատկանիշներով (Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ):

Շուշանիկ Բախշյանի նկատմամբ որպես խափանման միջոց է ընտրվել գրավ, իսկ Անի Բաբելյանի նկատմամբ՝ չհեռանալու մասին ստորագրությունը:

Աղբյուր` Փաստինֆո