Փաստ ինֆո

Երևանի Ավան և Նոր-Նորք վարչական շրջանների ընդհանուր իրավասության դատարանում այսօր շարունակվեց ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործի քննությունը, սակայն կարճ ժամանակ անց հետաձգվեց:

Այսօր նախատեսվում էր վկաների հարցաքննություն, սակայն տարբեր պատճառներով նրանցից որևէ մեկին հնարավոր չէր եղել դատարան ներկայացնել:

Նշենք, որ տևական ժամանակ քրեական գործով դատական նիստեր չէին կայանում՝ նախ այն պատճառով, որ վկա զինծառայողները գտնվում էին զորավարժությունների, ապա նաև՝ նախապես որոշված դատական նիստի օր ընտրված երկուշաբթի օրերը ոչ աշխատանքային օրեր լինելու պատճառով:

Այսպիսով, դատարանը՝ նախագահությամբ Դավիթ Հարությունյանի, այսօրվա նիստին չներկայացված վկաների վերաբերյալ տեղեկություններ հրապարակեց առ այն, որ դատարան է ստացվել մի քանի գրություն: Մասնավորապես՝ վկա Սամվել Սերոբյանից և նրա հորից, որ Սամվել Սերոբյանը, սոցիալական պայմաններից ելնելով, մեկնել է արտագնա աշխատանքի և խնդրել է հիմք ընդունել իր նախաքննական ցուցմունքը:

Դատարանը գրություն էր ստացել նաև այն զորամասի հրամանատարից, որտեղ ծառայել է Սամվել Սերոբյանը, այդ գրությամբ էլ հայտնվում էր, որ Սերոբյանի ծառայության ժամկետը լրանալու կապակցությամբ նա արձակվել է պահեստազոր:

Վկաներից չորսի վերաբերյալ էլ դատարանը տեղեկություն էր ստացել, որ չեն կարող նրանց ներկայությունն ապահովել, քանի որ նրանք գտնվելու են ուսումնական պրակտիկայի մեջ:
Բացի այս, զինծառայողներ կային, ովքեր տարբեր զորավարժությունների մեջ էին գտնվում, որոնց ևս հնարավոր չէր եղել ապահովվել:

Այսպիսով, դատարանը որոշեց դիմել ոստիկանության համապատասխան ստորաբաժանմանը՝ պարզելու համար վկա Սամվել Սերոբյանի՝ ՀՀ սահմանը լքել է, թե՝ ոչ, և եթե պարզվի, որ նա չի լքել և Հայաստանում է, բերման որոշում կկայացվի, ինչ վերաբերում է մյուս վկաներին, ապա դատարանը միջոցներ կձեռնարկի ծառայության մեջ գտնվող վկաների ներկայությունն ապահովելու նպատակով:

Դատական նիստը հետաձգվեց և նշանակվեց մայիսի 29-ին:

Աղբյուր` Փաստինֆո