Փաստ ինֆո

Շենգավիթ վարչական շրջանում ընտանեկան աղմկահարույց դրամայի հետ կապված սպանության գործից առանձին քննվող ծեծի ու սպանության սպառնալիքների գործի շրջանակներում այսօր հարցաքննվեց գործով տուժող Վաչագան Մանսուրյանը:

Տուժողը հայտնեց, որ նախկին փեսան՝ Վլադիկ Մարտիրոսյանը, զբաղվել է քիքբոքսինգով, արագ-արագ հարվածում էր, հարվածները մեկից ավելի էին: Նախկին աներն անդրադարձավ կոնֆլիկտի հինգ դրվագներին էլ, որոնք ընկած են ծեծի ու սպանության սպառնալիքներ տալու մեջ մեղադրվող Վլադիկ Մարտիրոսյանի մեղադրանքի հիմքում: Գործի շրջանակում ծեծի մեղադրանք է առաջադրվել նաև վերջինիս նախկին կնոջը՝ Թագուհի Մանսուրյանին:

Նախկին աները հայտնեց, որ մասնավորապես 2016թ. հունիսի 21-ի միջադեպի ժամանակ ինքը նախկին փեսային ասել է, որ երբ իր մեքենան ու աղջկա աշխատանքային գործիքները վերադարձնի և ինքը տեսնի, որ նախկին փեսան հայրական զգացմունքներ ունի իր երեխայի հանդեպ, երեխայի հետ տեսակցելու հարցում կընդառաջի նրան: Մինչև հիմա էլ չի վերադարձրել, հավելեց տուժողը:

Ըստ նախկին աներոջ, իր փեսան հայհոյել է, սպառնալիքներ տվել՝ կմորթեմ, կոչնչացնեմ, ոչ ինձ, ոչ քեզ, երեխան թող գնա մանկատուն: Ինչո՞վ էր պայմանավորված այս պահվածքը հարցին տուժողը նշեց՝ ագրեսիայով էր պայմանավորված: Ըստ նրա, կոնֆլիկտներով փեսան նպատակ ուներ անվանարկեր նախկին կնոջը, որպեսզի նրան զրկեին մայրական իրավունքներից: Ի դեպ, վերջինս՝ տուժողի դուստրը, ըստ տուժողի, նախկին ամուսնուն չի ծեծել:

«Գնացել եմ ոստիկանություն, ասել՝ ո՞վ է պաշտպանելու իմ ընտանիքը և ոչինչ»,- ասաց նախկին աները:

Ապա նախկին փեսան «մեղադրեց» իր երեխային գողանալու մեջ, իսկ նախկին աները հակադարձեց՝ «Չեմ գողացել, տիրություն եմ արել, երեխան իմն է, քոնը չի, մոռացիր»:

Տուժողը նշեց, որ իր կինը թույլ չէր տալիս, որ ինքը միջամտի, ապա հավելեց՝ «ավելի լավ է ես նստեի, քան կնոջս սպաներ»: Ըստ դատարանի սահմանած ապացույցների հետազոտման կարգի, հաջորդ դատական նիստում կհետազոտվեն գործում առկա փաստաթղթերը:

Ըստ Վլադիկ Մարտիրոսյանին առաջադրված մեղադրանքի, նա 2016թ. հունիսի 12-ին ժամը 01:00-ի սահմաններում, Երևան քաղաքի Ս.Տարոնցի 7 շենքի բակում, որդուն տեսնելու հարցի շուրջ վիճաբանել է նախկին կնոջ` Թագուհի Մանսուրյանի հետ, որի ընթացքում վերջինիս նկատմամբ կատարել է բռնի գործողություններ, այն է` բռնել է Թ.Մանսուրյանի ձեռքերը, ուժեղ սեղմել և քաշքշել է` վերջինիս առողջությանը պատճառելով թեթև վնասի հատկանիշ չպարունակող մարմնական վնասվածք, ինչպես նաև նույն վեճի ժամանակ Թ.Մանսուրյանին տվել է սպանության սպառնալիք, որն իրականացնելու իրական վտանգ է եղել:

Բացի այդ, Վլադիկ Մարտիրոսյանը 2016թ. հունիսի 20-ին ժամը 01:00-ի սահմաններում Ս.Տարոնցի 7 շենքի բակում նախկին կնոջից` Թ.Մանսուրյանից պահանջել է թույլատրել որդուն տեսակցել, սակայն մերժում ստանալով` սպանության սպառնալիքներ է տվել, որն իրականացնելու իրական վտանգ է եղել:

Բացի այդ, Վ.Մարտիրոսյանը, 2016թ. հունիսի 21-ին, ժամը 13:45-ի սահմաններում, Երևանի Շիրակի 45/2 հասցեում գտնվող «Մհեր Մար» խանութի դիմաց իր որդուն տեսակցել չթույլատրելու հարցի շուրջ վիճաբանել է նախկին կնոջ հոր` Վաչագան Մանսուրյանի հետ, որի ընթացքում սպանության սպաառնալիք է տվել ընտանիքի անդամների հասցեին, այդ սպառնալիքներն իրականացնելու իրական վտանգ է եղել, որից հետո դիտավորությամբ 4-5 անգամ բռունցքով հարվածնքեր է հասցրել ավտոմեքենայում նստած Վ.Մանսուրյանի դեմքին` վերջինիս առողջությանը պատճառելով թեթև վնասի հատկանիշ չպարունակող մարմնական վնասվածք:

Բացի այդ, Վ.Մարտիրոսյանը 2016թ. հունիսի 22-ին ժամը 11:00-ի սահմաններում, Երևան քաղաքի Ս.Տարոնցի 7 շենքի բակում որդուն տեսակցել չթույլատրելու համար սպանության սպառնալիքներ է տվել նախկին կնոջ մորը` Կարինե Մանսուրյանին և նրա ընտանիքի անդամներին, ու այդ սպառնալիքներն իրականացնելու իրական վտանգ է եղել:

Բացի այդ, Վ.Մարտիրոսյանը 2016թ. հուլիսի 8-ին ժամը 01:00-ի սահմաններում, Երևանի Ս.Տարոնցի նրբանցքի 7 շենքի դիմաց, որդուն տեսակցել չթույլատրելու համար վիճաբանել է Թ.Մանսուրյանի հետ, որի ընթացքում դիտավորությամբ ձեռքերով հարվածներ է հասցրել վերջինիս գլխին, թևին` պատճառելով ֆիզիկական ցավ, որից հետո դիտավորությամբ հարվածներ է հասցրել նաև վիճաբանությանը միջամտած Կ.Մանսուրյանի գլխին, ձեռքին, մատներին` պատճառելով ֆիզիկական ցավ:

Ըստ Թագուհի Մանսուրյանին առաջադրված մեղադրանքի, նա 2016թ. հունիսի 12-ին ժամը 01:00-ի սահմաններում, Երևանի Ս.Տարոնցի նրբանցքի 7 շենքի դիմաց նախկին ամուսնու` Վլադիկ Մարտիրոսյանի կողմից որդուն տեսակցելու հարցի շուրջ վիճաբանել է վերջինիս հետ, որի ընթացքում Վ.Մարտիրոսյանի նկատմամբ կատարել է բռնի գործողություններ, այն է` դիտավորությամբ ճանկռել է նրա պարանոցը` պատճառելով ֆիզիկական ցավ:

Բացի այդ, Թ.Մանսուրյանը, 2016թ. հուլիսի 8-ին ժամը 01:00-ի սահմաններում, որդուն տեսակցել չթույլատրելու համար վիճաբանել է Վ.Մարտիրոսյանի հետ, որի ընթացքում վերջինիս նկատմամբ կատարել է բռնի գործողություններ, այն է` դիտավորությամբ ճանկռել է թևերը` պատճառելով ֆիզիկական ցավ:

Բացի այդ, Թ.Մանսուրյանը, 2016թ. հունիսի 3-ին ժամը 01:30-ի սահմաններում, որդուն տեսակցել չթույլատրելու համար վիճաբանել է Վ.Մարտիրոսյանի հետ, որի ընթացքում վերջինիս նկատմամբ կատարել է բռնի գործողություններ, այն է` դիտավորությամբ ճանկռել է նրա ձեռքերը` պատճառելով թեթև վնասի հատկանիշ չպարունակող մարմնական վնասվածք:

Վլադիկ Մարտիրոսյանին մեղադրանք է առաջադրվել ՀՀ քրեական օրենսգրքի 118-րդ հոդվածով՝ Ծեծը, և 137-րդ հոդվածի 1-ին մասով՝ սպանության, առողջությանը ծանր վնաս պատճառելու կամ գույք ոչնչացնելու սպառնալիքը, իսկ Թագուհի Մանսուրյանին՝ ՀՀ քրեական օրենսգրքի 118-րդ հոդվածով:

Աղբյուր` Փաստինֆո