Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի և փաստաբան Էլզա Զաքարյանի գործով այսօրվա դատական նիստն անցավ թեժ մթնոլորտում` ուղեկցվելով դատարանի և պաշտպանական կողմի բանավեճերով:

Բանավեճի առիթ դարձավ նախ այն, որ նախորդ դատական նիստին չէին ներկայացել Իշխան Բարսեղյանի երեք պաշտպանները՝ Լիանա Գրիգորյանը, Կարեն Ղազարյանը և Կարեն Հովհաննիսյանը, ինչը դատարանը անհարգելից էր գնահատել եւ որոշել նրանց նկատմամբ կիրառել դատական սանկցիա` դիմել Փաստաբանների պալատ՝ պատասխանատվության ենթարկելու համար:

Դատարանի այս որոշումը փաստաբան Լիանա Գրիգորյանը զավեշտ որակեց: Պաշտպաններից յուրաքանչյուրն այս հարցին անդրադարձավ առանձին-առանձին, բայց բոլորն էլ նշեցին, որ դատարանի գործողություններն իրավաչափ չեն և դատարանն այսկերպ կանխակալ վերաբերմունք է դրսևորում:

Նախկին դատարավոր, ներկայումս փաստաբան Վլադիմիր Գրիգորյանն էլ կարծիք հայտնեց, որ դատարանը իրավունք չունի կանխակալ լինել և կասկածի տեղիք տալ:

«Նախաքննական մարմինը նախապես հաստատված համարելով շատ ապացույցներ, չխորանալով գործի էության մեջ, գործը դրել է ձեր սեղանին եւ այս հանգամանքը պետք է ձեզ մտահոգի և վախեցնի»,- ասաց Վլադիմիր Գրիգորյանը` հավելելով, որ դատարանի սեղանին դրված է սպեցիֆիկ մի գործ, որով ամբաստանվում է հատուկ սուբյեկտ և գործը հասարակության ուշադրության կենտրոնում է պայմանավորված մի շարք հանգամանքերով:

Շուրջ մեկ ժամ այս հարցը քննարկելուց հետո դատարանը պաշտպաններին պարզաբանեց, որ պաշտպանական կողմը կարող է դատարանի գործողությունները վիճարկել օրենքով սահմանված կարգով:

Հիշեցնենք, որ նախորդ դատական նիստում նիստը նախագահող դատավոր Վաչե Մարգարյանը ներկաներին տեղեկացրեց, որ գրություն էր ստացվել դատարան առ այն, որ Իշխան Բարսեղյանի պաշտպան Վարդուհի Էլբակյանը վիրահատվել է և գտնվում է «Էրեբունի» ԲԿ-ում՝ ստացիոնար բուժման մեջ, դիմումին կից տեղեկանք էր ներկայացվել նրա առողջական վիճակի մասին:

Իսկ ինչ վերաբերում է Իշխան Բարսեղյանի մյուս պաշտպաններ Վլադիմիր Գրիգորյանին և Արա Ղազարյանին, ապա նրանք դատարանին գրավոր հայտնել էին, որ այլ գործերով ծանրաբեռնվածություն ունեն և չեն կարող ներկայանալ դատարան:

Գործով մյուս երեք պաշտպաններից դատարանը որևէ տեղեկություն չէր ստացել:

Ինչեւէ, դատարանն ի վերջո անցավ բուն դատաքննությանը` սահմանված ապացույցների հաջորդականության համաձայն՝ հարցաքննվեցին դատակոչված վկաները:

Այսօր որպես վկա հացաքննվեց փաստաբան Կիմա Սարյանը, ով հայտնեց, որ դեռևս 2015թ. դեկտեմբերին իրեն է զանգահարել փաստաբան Էլզա Զաքարյանը և խնդրել զբաղել մի գործով:

Ըստ վկայի՝ Զաքարյանն այդ ժամանակ գտնվել է դեկրետի մեջ, ուստիեւ խնդրել է իր վարույթում գտնվող մի քանի գործով զբաղվել, դրանց թվում նաև` քաղաքացի Նորիկ Հակոբյանի գույքային վեճով:

Ըստ վկայի` ինքը Էլզա Զաքարյանի խնդրանքով պայմանավորածություն է ձեռք բերել Նորիկ Հակոբյանի հետ, պայմանագիր է կնքել, սակայն այդ պայմանագիրը ընդամենը վերաբերել է վերաքննիչ դատարանում իր շահերը ներկայացնելուն, բայց քանի որ գործը վերաքննիչ դատարանը բեկանել և ուղարկել է առաջին ատյանի դատարան, Էլզա Զաքարյանը խնդրել է փաստաբանին գնալ առաջին դատական նիստին և ինչ որ պատճառով այն հետաձգել:

Վկա- փաստաբանը նշեց, որ Նորիկ Հակոբյանն անհանգստացել է իր գործի ճակատագրով, քանի որ հայցվորի պահանջը բավարարվելու դեպքում իրեն կվտարեին իր բնակարանից:

Ուստիև ինքն առաջարկել է հակընդդեմ հայց ներկայացնել: Ըստ փաստաբանի` Ն.Հակոբյանը պարբերաբար հետաքրքրվել է հայցը վարույթ ընդունելու կամ մերժելու վերաբերյալ, ապա նաև հարցրել է, թե «կարող է որևէ մեկին գտնել՝ դատավորի վրա դուրս գալու համար», ինչին պատասխան փաստաբանը հավաստեց, թե ասել է, որ իր միջոցով նման բան չի կարող անել և ցույց է տվել իր հետ կնքած պայմանագիրը, որ որևէ երաշխիք չի տալիս գործի դրական լուծման համար:

Ըստ վկայի, ավելի ուշ տեղեկացել է, որ դատարանը՝ Իշխան Բարսեղյանի նախագահությամբ, իր կողմից ներկայացրած հակընդեմ հայցը չի ընդունել:

Վկա- փաստաբանը նաև նշեց, որ Էլզան իրեն տեղեկացլել է, որ դատավոր Իշխան Բարսեղյանը իրեն գումար է պարտք՝ 2000 ԱՄՆ դոլար և խոստացված ժամկետում չի կարողացել վերադարձնել, ապա նաև ասել է, որ ցանկանում է դիմել դատարան, որպեսզի այդ գումարը հետ ստանա:
Վկայի խոսքով՝ պարտքի մասին ստացականը ինքը տեսել է, սակայն Էլզա Զաքարյանին խորհուրդ չի տվել դատարանի միջոցով այդ գումարը հետ ստանալ:

Նշենք, որ դատարանը ժամանակ առ ժամանակ հորդորում էր պաշտպանական կողմից առարկայական հարցեր տալ և չկրկնվել, թերևս այս պատճառով էլ դատարանի և կողմի միջև բանավեճ էր ծագում, իսկ երբ հերթը հասավ դատարանի հարցեր տալուն՝ դրանք հարցերը ևս կրկնվեցին:
Վկաների հարցաքննությունը կշարունակվի հաջորդ դատական նիստում:

Աղբյուր` Փաստինֆո