Փաստ ինֆո

Տեխասի բնակիչ Բրենդոն Վեզմարը դատի է տվել կնոջն, ում հետ ինքն առաջին ժամադրության ժամանակ գնացել է կինոթատրոն և ցանկանում է նրանից գանձել տոմսի արժեքը:

Ըստ BBC-ի ռուսական ծառայության, 37-ամյա Վեզմարը պնդում է, որ կինն անդադար ինչ-որ մեկի հետ բջջային հեռախոսով նամակագրության մեջ էր, իսկ երբ նա դժգոհություն է հայտնել այդ վարքագծի հետ կապված, պարզապես հեռացել է սեանսից: Ի դեպ, այդ օրը ցուցադրում էին «Գալակտիկայի պահապանները, երկրորդ մաս» ֆիլմը:

Արդյունքում Վեզմարը հայց է ներկայացրել նահանգի մայրաքաղաք Օսթինի դատարան՝ պահանջելով փոխհատուցել 17 դոլար և 31 ցենտի չափով, պնդելով, որ կնոջ նման վարքագիծն իրենից ներկայացնում է սպառնալիք քաղաքակիրթ հասարակության համար:
Պատասխանողն իր հերթին հայտարարել է, որ մտադիր չէ որևէ բան վճարել, քանի որ դա ժամադրություն էր:
Ըստ Վեզմարի, մայիսի 6-ին առաջին ժամադրության ժամանակ կինո հրավիրված աղջիկը սկսել է հաղորդագրություններ գրել իր հեռախոսով արդեն իսկ կինոնկարի ցուցադրման սկսվելուց 15 րոպես անց:
«Այդ առաջին ժամադրությունը դարձավ իսկական մղձավանջ»,- խոստովանել է Բրենդոնը Austin American-Statesman թերթին: Նա պնդում է, որ խնդրել է ուղեկից կնոջը դադարեցնել հաղորդագրություններ գրել, իսկ երբ նա մերժել է, առաջարկել է նրան դուրս գալ կինոթատրոնից և այնտեղ շարունակել հեռախոսով շփումը:

Կինն իսկապես դուրս է եկել կինոդահլիճից և այլևս այնտեղ չի վերադարձել:
Վեզմարը պնդում է նաև, որ դրանից մի քանի օր անց sms է ուղարկել կնոջը՝ խնդրելով փոխհատուցել տոմսի արժեքի չափով, սակայն նա հրաժարվել է:
Կինը հայտարարում է, որ այն չարաբաստիկ օրն ինքն ընդամենը երկու կամ երեք հաղորդագրություն է ուղարկել ընկերուհուն, ով վիճել էր բոյֆրենդի հետ:
«Ես հեռախոսն իմ մոտ էի պահում և ոչ ոքի չէի խանգարում»,- նշում է նա:

Սակայն ըստ հայցվորի, տեքստային հաղորդակցություններ ուղարկելը կինոթատրոնի կանոնների ուղիղ խախտում է, և նա փչացրել է կինոնկարի դիտումից Վեզմարի և այլ դիտողների տպավորությունը:
«Թեև պատճառված վնասը աննշան է, սակայն ամբողջ հարցը սկզբունքի մեջ է, քանի որ պատասխանողի վարքագիծը սպառնալիք է քաղաքակիրթ հասարակության համար»,- ասվում է հայցային հայտարարության մեջ:

Կինոթատրոնի սեփականատեր ընկերության գործադիր տնօրեն Թիմ Լիգը առաջարկել է Վեզմարին նվեր-վաուչեր որպես փոխհատուցում, եթե նա հետ կվերցնի իր հայցը:

Աղբյուր` Փաստինֆո