Փաստ ինֆո

Առանձնապես խոշոր չափերի փողերի լվացման ու խարդախության գործով այսօրվա դատական նիստը վերջին խոսքի փուլում հետաձգվեց ամբաստանյալ, «Հայբիզնեսբանկ» ՓԲԸ վարչության նախկին նախագահ Արա Կիրակոսյանի՝ իր պաշտպանից հրաժարվելու և նոր փաստաբան ներգրավելու հետ կապված:

Ամբաստանյալը հայտարարեց, որ շատ ուշացումով ստիպված է եղել գնալ իր պաշտպան Հակոբ Ճարոյանի ծառայություններից հրաժարվելու քայլին: Շատ լուրջ պատճառաբանություններ ու հանգամանքներ կան, բայց դա իր խնդիրն է, ասաց Ա.Կիրակոսյանը: Նա հայտարարեց, որ «բաժակը լցվեց, երբ պաշտպանը հրաժարվեց պաշտպանական ճառ արտասանելուց», պաշտպանը հրաժարվեց նաև ռեպլիկով հանդես գալուց:

Ամբաստանյալը խնդրեց, որպեսզի գործում ներգրավվի իր նոր պաշտպան, փաստաբան Հայկ Ալումյանը: Նա նաև խնդրեց հետաձգել դատական նիստը, քանի որ իր նոր պաշտպանի հետ շատ լուրջ քննարկում պետք է լինի ընդհանրապես գործի և, մասնավորապես, քաղհայցի հետ կապված:

Դատարանը պարզաբանեց, որ ճառով հանդես չեկած կողմն իրավունք չունի հանդես գալ ռեպլիկով:

Մեղադրողն ընդգծեց, որ չի առարկում նոր պաշտպանի ներգրավման դեմ՝ ամբաստանյալի պաշտպանական իրավունքի իրացման տեսանկյունից, սակայն միաժամանակ արձանագրեց գործի քննությունը ձգձգելու միտում՝ նախկին պաշտպանի ու ամբաստանյալի կողմից նախկինում եղել են բազմաթիվ նման դրսևորումներ, ասաց մեղադրողը:

Դատարանն արձանագրեց նախորդ պաշտպանից ամբաստանյալի հրաժարումը ու ճանաչեց փաստաբան Հայկ Ալումյանի լիազորությունները՝ որպես ամբաստանյալ Արա Կիրակոսյանի պաշտպան:

Դատարանը բավարարեց պաշտպանական կողմի միջնորդությունը և դատական նիստը հետաձգեց մինչև հունիսի 26-ը՝ հնարավորություն տալով կողմին ծանոթանալ երեսունից ավելի հատոր կազմող գործի նյութերին, ինչպես նաև դատական նիստերի ձայնագրառումներին: Այդ ընթացքում ամբաստանյալն ու պաշտպանը հնարավորություն կունենան նաև քննարկումներ անցկացնել գործի շուրջ:

Որևէ առնչություն չունեմ և ոչնչի հետ. «Հայբիզնեսբանկ» ՓԲԸ վարչության նախկին նախագահը հերքում է

Հիշեցնենք, որ ըստ մեղադրանքի՝ 2006 թվականի օգոստոսի 21-ից մինչև 2013 թվականի հոկտեմբերի 01-ը ներառյալ ժամանակահատվածում «Հայբիզնեսբանկ» ՓԲ ընկերության Վարչության նախագահ աշխատած Արա Կիրակոսյանը բանկի վարչության նախագահի տեղակալ-Տարածքային զարգացման և տեղեկատվական տեխնոլոգիաների դեպարտամենտի տնօրեն Մելիք Եսայանի, ԻԻՀ և ԱՄՆ քաղաքացի Մաջիդ Ռ Նազիֆի, ԻԻՀ և ԱՄՆ քաղաքացի, ՀՀ-ում գրանցված «Ալֆա Զեներալ Թրեյդինգ» ՍՊ ընկերության հիմնադիր-տնօրեն Բեհրուզ Բեհնամի, ԻԻՀ և ՀՀ քաղաքացի Վահիկ Մանուկյանսի, Շվեյցարիայի Համադաշնության ժնև քաղաքում գրանցված, «Կոսմոս Տրադինգ» ընկերության հիմնադիր, ՀՀ քաղաքացի Անդրանիկ Դոների, վերջինիս կողմից լիազորված անձ՝ Սուրեն Դաբրիելյանի և ՀՀ-ում գրանցված «Դավ Տրանս Ստրոյ» ՍՊ հիմնադիր տնօրեն, ՀՀ քաղաքացի Դավիթ Դերզյանի հետ, մի խումբ անձանց կողմից նախնական համաձայնությամբ, 2012 թվականի օգոստոսից մինչև 2013 թվականի մարտ ամիսը ներառյալ ժամանակահատվածում, օգտագործելով իրավունք վերապահող պաշտոնական փաստաթղթեր հանդիսացող կեղծ պայմանագրեր և վճարման հանձնարարականներ, խարդախությամբ՝ խաբեության եղանակով հափշտակել, ապա օրինականացրել են Ռուսաստանի Դաշնության Մոսկվա քաղաքում գործող «Միր Բիզնես Բանկ» ՓԲ ընկերության կողմից, «Սբերբանկ» ՓԲ ընկերության միջոցով (միջնորդությամբ), «SWIFT» համակարգով «Հայբիզնեսբանկ» ՓԲ ընկերություն փոխանցված առանձնապես խոշոր չափերով ընդհանուր 5.804.577.000 ՀՀ դրամին համարժեք 10.980.000 եվրո գումար, որից՝ 1.000.000 եվրոն նախատեսված է եղել գումարի իրական շահառու, Բանկում թղթակցային հաշվեհամարներ բացած, ԻԻՀ «Քիշ Ինտերնեյշնլ Բանկ» ընկերության համար, իսկ 9.980.000 եվրոն՝ «SWIFT» հաղորդագրություններում անճշտություններ լինելու և վերջնական շահառուն նշված չլինելու պատճառով, ենթակա Է եղել վերադարձման ուղարկող «Միր Բիզնես Բանկ» ՓԲ ընկերությանը, ինչի հետևանքով «Քիշ Ինտերնեյշնլ Բանկ» և «Միր Բիզնես Բանկ» ՓԲ ընկերությունները իրավունք են ձեռք բերել նույն չափով գումարներ ստանալու հայցապահանջ երկայացնել «Հայբիզնեսբանկ» ՓԲ ընկերության նկատմամբ, որը հատուցման պարտավորություն է ստանձնել։

Արա Կիրակոսյանին մեղադրանք է առաջադրվել ՀՀ քրեական օրենսգրքի 214-րդ հոդվածի 2-րդ մասով՝ առևտրային կազմակերպության ծառայողի կողմից լիազորությունները չարաշահելը, որն առաջացրել է ծանր հետևանքներ, 325-րդ հոդվածի 2-րդ մասով՝ մի խումբ անձանց կողմից նախնական համաձայնությամբ փաստաթղթեր կեղծելը, իրացնելը կամ օգտագործելը, 178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախություն, 190-րդ հոդվածի 3-րդ մասի 1-ին կետով՝ առանձնապես խոշոր չափերի փողերի լվացում:

Աղբյուր` Փաստինֆո