Փաստ ինֆո

Գրասենյակային տարածքներ, բնակարաններ և ավտոկայանատեղեր վաճառելու պատրվակով տարիներ շարունակ բազմաթիվ քաղաքացիներից առանձնապես խոշոր չափերի` շուրջ 2 միլիարդ դրամի հափշտակություն կատարելու մեջ մեղադրվող Վլադիսլավ Մանգասարյանի գործով այսօրվա դատական նիստում սկսվեց դատաքննությունը:

Ըստ մեղադրական եզրակացության, Վլադիսլավ Մանգասարյանը Երևան քաղաքում իրականացնելով բազմաբնակարան շենքերի շինություն, ինչպես նաև ստանալով Երևան քաղաքի Մաշտոցի 33Ա և Մաշտոցի 33/1 հասցեներում կառուցվող շենքերից տարածքներ օտարելու իրավունք, իսկ հետագայում` փաստացի հանդիսանալով նաև հիշյալ շինությունների սեփականատեր «Արին Կապիտալ» Ներդրումային ՍՊԸ բաժնետեր և ընկերության տնօրենին պարտադիր կատարման ենթակա ցուցումներ տվող անձ, խաբեությամբ ու վստահությունը չարաշահելու եղանակով` գրասենյակային տարածքներ, բնակարաններ և ավտոկայանատեղեր վաճառելու պատրվակով 2005-2011թթ. ընթացքում միասնական դիտավորությամբ հափշտակել է բազմաթիվ քաղաքացիների և ՍՊԸ առանձնապես խոշոր չափերի` 2.255.412.294 ՀՀ դրամ արժողությամբ գույքը:

Գործով տուժող է ճանաչվել 26 անձ, այդ թվում նաև՝ իրավաբանական անձ։

Վլադիսլավ Մանգասարյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով` առանձնապես խոշոր չափերի խարդախություն, 31 դրվագով:

Ծավալուն մեղադրական եզրակացության հրապարակումից հետո ամբաստանյալ Վլադիսլավ Մանգասարյանը հայտարարեց, որ ինքն ամբողջությամբ չի ընդունում իրեն առաջադրված մեղադրանքն, այն բացարձակապես չի համապատասխանում իրականությանը, առաջինից մինչև վերջին տողը հորինվածք է: «Դեպք առ դեպք կապացուցեմ, որ սխալ է»,- ասաց ամբաստանյալը: Նա հավելեց. «Ես տուն շինող եմ, տուն քանդող չեմ»:

Ըստ ամբաստանյալի, ի սկզբանե համաձայն չի եղել մեղադրական եզրակացության հետ, սակայն ինքը հիվանդ էր, երկու ինֆարկտ է տարել և իրեն հնարավորություն չի տրվել բողոքարկել այն դատախազություն:

Իր վստահորդներին վերաբերող դրվագներով մեղադրանքն ընդունել-չընդունելու մասին գործով չորս տուժողի ներկայացուցիչ, փաստաբան Նիկոլայ Բաղդասարյանի հարցերին ամբաստանյալը պատասխանում էր զսպված կամ պոռթկացող զայրույթով՝ հայտարարելով՝ «թույլ տվեք դատաքննությունն անցկացվի, որ ես կարողանամ ապացուցել իմ անմեղությունը»:

Պոռթկումներից մեկի ժամանակ ամբաստանյալը միտք հայտնեց, որ եթե փաստաբանը ներկայացնում է անձանց շահերը, չի նշանակում, որ «մյուսի նկատմամբ պետք է դառնա քիլլեր»: Ապա հայտարարեց՝ ես սյունեցի եմ, ճորտ չեմ, մեղավորները պետք է պատժվեն: Հետևեց ամբաստանյալի հաջորդ դիտարկումը՝ «Դուք լավ աճպարար եք, մեզնից լավ գիտեք մեր պատմությունը»:

Ամբաստանյալը հայտարարեց՝ եթե անձը հարց ունի, թող քաղաքացիական հայցով դիմի դատարան և ոչ թե հարցը կապի խարդախության, խաբեության հետ, չի ստացվի, ասաց ամբաստանյալը:

Վ.Մանգասարյանը՝ ի պատասխան հարցի, հայտարարեց, որ չի ընդունում քաղհայցերը: Նա հավելեց, երբ դատաքննությամբ կապացուցվի, որ ինքը մեղավոր է, այդ ժամանակ էլ կպատասխանի:

Բանավեճ տեղի ունեցավ նաև ամբաստանյալի պաշտպանի ու մեղադրողի միջև՝ արդյոք բեկանվե՞լ է «Արին Կապիտալ»-ի սնանկության վճիռը, թե ոչ, հնչեց մեղադրողի արձագանքը՝ այդ հարցն իրավունք չունեք տալ, դա մեղադրանքի ծավալի մեջ չի մտնում: Ի վերջո պաշտպանը եզրահանգեց՝ այդ կապակցությամբ նշվածը ենթադրություն է, իսկ մեղադրողի եզրահանգմամբ՝ հաստատված է փաստերով:

Պաշտպանական կողմը, սակայն, համաձայնեց մեղադրանքի կողմի միջնորդած ապացույցների հետազոտման կարգի հետ, դատարանն էլ սահմանեց այդ կարգը՝ նախ կհետազոտվեն գործի գրավոր ապացույցները, կհարցաքննվեն տուժողները, վկաները, վերջում ցանկության դեպքում ցուցմունքներ կտա ամբաստանյալը:

Մինչև դատաքննության սկսվելը փաստաբան Նիկոլայ Բաղդասարյանը քաղհայցերի հետ կապված հայտարարեց, որ ամբաստանյալի գործողությունների հետևանքով պատասխանատվություն պետք է կրի նաև պետությունը, այսինքն՝ պետությունը պետք է պատասխանող ճանաչվի:

Ինչո՞ւ եք պետությանը պատասխանող ճանաչում, պետության դեմ մեղադրանք կա՞, ցույց տվեք, որ պետությունը մասնակցել է հանցավոր արարքին, ասաց գործով նախագահող դատավոր Արմեն Բեկթաշյանը: Նշվեց, որ դատարանը այդ հարցին կարող է անդրադառնալ միայն ապացույցները հետազոտելուց հետո:

 Լուսանկարը՝ Hetq.am-ի

Աղբյուր` Փաստինֆո