Փաստ ինֆո

20 տարուց ավելի իրավապահ մարմիններում ծառայությունից հետո կենսաթոշակի գնացած անձի՝ երկարամյա ծառայության զինվորական կենսաթոշակը սոցապնախարարությունը որոշել է կտրել:

Խոսքը վերաբերում է ներկայումս փաստաբան Ամրամ Մակինյանին, ով երկու տասնամյակ ծառայել է իրավապահ մարմիններում, սկզբում Ոստիկանության համակարգում, ապա՝ ՀՀ քննչական կոմիտեում:

Ամրամ Մակինյանը 2016թ. հոկտեմբերի 10-ին ՀՀ քննչական կոմիտեի նախագահին ծառայությունից ազատվելու դիմում է ներկայացրել՝ երկարամյա ծառայության կենսաթոշակի անցնելու նպատակով:

Ծառայությունից ազատվելուց հետո օրենքով սահմանված կարգով սոցապնախարարությունը հատկացրել է երկարամյա ծառայության զինվորական կենսաթոշակ, սակայն մայիսի 2-ին Մակինյանին սոցապնախարարությունից տեղեկացրել են, որ երկարամյա ծառայության կենսաթոշակի հատկացումը դադարեցվում է այն հիմքով, որ նա աշխատում է մասնավոր սեկտորում, միևնույն ժամանակ սոցապնախարարությունից չէին մոռացել զգուշացնել Մակինյանին, որ որպես կենսաթոշակ վճարված գումարները՝ հետ պետք է գանձեն:

Ամրամ Մակինյանը «Փաստինֆո»-ի թղթակցի հետ զրույցում տեղեկացրեց, որ այս ամենից հետո դիմում է գրել սոցապնախարարություն՝ պահանջելով հայտնել, թե ի՞նչ հիմքով է իրեն նշանակվել երկարամյա ծառայության զինվորական կենսաթոշակը, ապա նաև դիմում է գրել սոցապնախարարության՝ իրենց տարածքային բաժնի պետին՝ այս անգամ խնդրելով հայտնել, թե ի՞նչ հիմքով են դադարեցրել կենսաթոշակը:

Այդ ամենից հետո փաստաբանից բանավոր կերպով ներողություն են խնդրել՝ ասելով, որ սխալվել են, ապա նա հավելել են, որ կենսաթոշակի վճարումը վերսկսվել է:

Նշենք, որ երկարամյա ծառայության զինվորական կենսաթոշակ անձին նշանակվում է այն դեպքում, երբ նա առնվազն 20 օրացուցային տարվա զինվորական ծառայության ստաժ ունի:

Տվյալ պարագայում անձն իրավաբան է և կարողացել է իր շահերը պաշտպանել, իսկ ինչ իրավիճակում են հայտնվում իրավաբանի մասնագիտություն չունեցող կենսաթոշակառուները, թերևս միայն իրենց է հայտնի։

Աղբյուր` Փաստինֆո