Փաստ ինֆո

Քրեական հեղինակություն համարվող կայարանցի Թևոսիկի եղբոր՝ Արթուր Սաֆարյանի, սպանության գործով հաջորդ դատական նիստում ցուցմունքներ կտա ամբաստանյալ Իսրայել Սարգսյանը: Նա դատարանին խնդրեց, որպեսզի իր ցուցմունք տալու ժամանակ ապահովվի գործով վկա Տիգրան Ասատրյանի ներկայությունը:

Դատարանը, սակայն, նկատեց, որ օրենքով նման կարգ նախատեսված չէ՝ դատարանը չի կարող պարտադրել, որպեսզի վկան ներկա գտնվի ամբաստանյալի հարցաքննությանը:

Տիգրան Ասատրյանի կողմից արված նրա ու Իսրայել Սարգսյանի, խոսակցության ձայնագրության մեջ Իսրայել Սարգսյանը հանցագործության հետ կապված խոստովանություն է արել: Իսրայել Սարգսյանը, սակայն, բազմիցս պնդել է, որ խոսակցության ձայնագրությունը մոնտաժված է, եթե ձայնագրությունը ամբողջական կերպով ներկայացվեր իրավապահներին, ապա «հարյուր տոկոսով վստահ եմ, ես այստեղ չէի լինի, գործի քննությունն էլ կգնար ուրիշ ուղղությամբ»:

Այսօրվա դատական նիստում դատարանում հրապարակվեցին դատարան չներկայացած տասնյակ վկաների նախաքննական ցուցմունքները:

Մինչ ինքնությունը հայտնի վկաների ցուցմունքների հրապարակումը դատարանում հրապարակվեցին տուժող Մովսես Ներսիսյանի մեքենայի նկատմամբ գաղտնի դիտարկմանը մասնակցած երեք փակ վկա ոստիկանների, ցուցմունքները՝ նրանց նկատմամբ կիրառվել է պաշտպանության միջոց: Ըստ դատարան ուղարկված գրության, վկաներն երկարատև գործուղման մեջ են և չեն կարող ներկայանալ դատարան:

Վկաները մասնակցել են գաղտնի դիտարկմանը, տպավորություն են ստացել, որ դիտարկվող ավտոմեքենայում վարորդի ու նրա կողքի նստատեղին երկու մարդ կա, սակայն դիմագծերը չեն տեսել՝ մեքենայի ապակիները մգեցված են եղել: Ինչ-որ ժամանակամիջոց չեն հետևել օբյեկտին՝ չբացահայտվելու մտահոգությունից ելնելով, ապա դիտարկվող ավտոմեքենան հայտնաբերել են օդանավակայանում՝ արդեն իսկ առանց հետաքրքրող օբյեկտների:

Ցուցմունքների հրապարակումից հետո ամբաստանյալը հիշեցրեց ոստիկանության գործառույթները՝ կանխել, նախականխել, բացահայտել հանցագործությունը և հարց տվեց՝ ինչո՞ւ ոստիկանները չեն կանգնեցրել ու չեն մոտեցել դիտարկվող ավտոմեքենային:

Իսրայել Սարգսյանն արձանագրեց, որ վկաները դիտարկվող ավտոմեքենայի մեջ միշտ երկու հոգի են տեսել, այսինքն՝ այդ ողջ ընթացքում հանցագործություն չի կատարվել: Բացի այդ, վկաներից ոչ ոք հաստատ չի ասում, որ ինքը՝ Իսրայել Սարգսյանը, հաստատ նստել է Մովսես Ներսիսյանի ավտոմեքենան, ցուցմունքներում միայն ենթադրություններ են:

Իրենց իրական ինքնությամբ ցուցմունք տված վկաներից մեկը՝ գործով տուժող Արթուր Սաֆարյանի հարևանն է, հայտնել է, որ հանկարծակի բարձր ճիչերի ձայներից արթնացել է, կրակոցներ չի լսել, տեսել է բակում հավաքված ոստիկանների, շատ մարդկանց, ապա իմացել է, որ Արթուր Սաֆարյանին են սպանել: Վկան տեղյակ չի եղել, թե որը կարող էր լինել սպանության հնարավոր պատճառը, հայտարարել է, որ որևէ մեկին չի կասկածում այդ սպանությունը կատարելու մեջ:

Մեկ այլ վկա հայտնել է, որ երեք անգամից ավելի կրակոցների ձայներ է լսել, մտածել է հրավառություն է, հետո լսել է Արթուր Սաֆարյանի կնոջ՝ օգնություն կանչող ճիչը: Նրանից էլ լսել է, որ Արթուրի վրա կրակել ու սպանել են:

Եվս մի վկա ինչ-որ ձայներ է լսել, լուսամուտից տեսել հավաքված մարդկանց, իմացել, որ ինչ-որ մեկին հրազենով սպանել են, զանգահարել է ոստիկանություն ու հայտնել այդ մասին:

Վկաների հրապարակված ցուցմունքերը մեծամասամբ ցուցմունքներ էին ոչնչի մասին՝ Մագնում հյուրանոցային համալիրի մատուցողուհին, օրինակ, չի տեսել համալիր այցելած հաճախորդի մեքենայի համարը, մակնիշը չի կարող ասել, չի տեսել հաճախորդին կամ հաճախորդներին գնալիս, աղմուկ և արտառոց ձայներ չի լսել, իսկ Իսրայել Սարգսյանի տվյալներով անձի չի ճանաչում: Մագնում համալիրում, ըստ գործի, սպանվել է Մովսես Ներսիսյանը, նրա դիակը մինչ օրս՝ ենթադրյալ սպանությունից ավելի քան երեք տարի անց չի հայտնաբերվել:

Վկաների ցուցմունքների վերաբերյալ ամբաստանյալի պաշտպան Հեկտոր Սարդարյանը հայտարարեց. «Ամբողջ գործն այսպես դատարկ է»:

Այսօր պաշտպանական կողմը նորից պնդեց, որպեսզի իրեղեն ապացույց ճանաչվի ռետինե ձեռնոցը, որը հայտնաբերվել է Արթուր Սաֆարյանի սպանության վայրում՝ զենքի, պարկուճների հետ միասին: Ձեռնոցով, ըստ պաշտպանական կողմի, ապացուցվում է, որ Մովսես Ներսիսյանը չի կրակել, հետևաբար, «ինչո՞ւ պետք է ես նրան սպանեի», ասաց Իսրայել Սարգսյանը: Նա հավելեց՝ ժամանակը ցույց կտա իրականությունը: Դատարանը, սակայն, հիշեցրեց, որ ձեռնոցը մեղադրանքի ծավալում առկա չէ:

Հիշեցնենք, որ ըստ Իսրայել Սարգսյանին առաջադրված մեղադրանքի, նա իր ընկեր Մովսես Ներսիսյանին պատվիրել է սպանել Արթուր Սաֆարյանին, իսկ կատարելուց հետո սպանել է նաև նրան ու դին նետել Քանաքեռավանի կոյուղու դիտահորը:

Աղբյուր` Փաստինֆո