Փաստ ինֆո

Վերաքննիչ քրեական դատարանը՝ դատավոր Մխիթար Պապոյանի նախագահությամբ, այսօր բեկանել է ամբաստանյալ Արմեն Համազասպյանի կալանավորումն անփոփոխ թողնելու՝ Երևանի Աջափնյակ և Դավթաշեն վարչական շրջանների դատարանի 02.03.2017թ. որոշումը և ուղարկել նույն դատարան՝ նոր քննության:

Փաստաբան Հայկ Ալումյանը՝ «Փաստինֆո»-ին հայտնելով այս մասին, նշեց, որ շատ դրական է գնահատում «երևի նախադեպը չունեցող այս որոշումը»: Ըստ պաշտպանի, որոշմամբ ձևափոխվում է գոյություն ունեցող դաշտը և Հայաստանի դատական պրակտիկան համապատասխանեցվում Մարդու իրավունքների եվրոպական կոնվենցիայի պահանջներին:

Փաստաբանը պարզաբանեց, որ առաջին ատյանի դատարանի որոշումը, որով անձը անժամկետ կալանքի տակ է պահվել, ինչը կարող է տարիներ տևել, կարող է բացարձակապես անվերահսկելի ու անբողոքարկելի լինել: Վերաքննիչ դատարանի այս որոշմամբ առաջին ատյանի դատարանի որոշումը դառնում է բողոքարկելի և հնարավորություն է տալիս խնդիրը ներկայացնել Վերաքննիչ դատարանին՝ ակնկալելով դրական արդյունք:

Առաջին ատյանի դատարանը Արմեն Համազասպյանի կալանավորումը անժամկետ թողել է անփոփոխ, ինչն, ըստ Արմեն Համազասպյանի պաշտպան, փաստաբան Հայկ Ալումյանի, կոպիտ խախտում է և հակասում է Մարդու իրավունքների եվրոպական կոնվենցիայի 5-րդ հոդվածի (Ազատության և անձնական անձեռնմխելիության իրավունք) ոգուն:

Ըստ «Դատալեքս» տեղեկատվական համակարգի, վերաքննիչ բողոքում Հայկ Ալումյանը միջնորդում էր վերացնել Երևանի Աջափնյակ և Դավթաշեն վարչական շրջանների ընդհանուր իրավասության դատարանի 02.03.2017թ. որոշմամբ ամբաստանյալ Արմեն Համազասպյանի նկատմամբ որպես խափանման միջոց ընտրված կալանքը և նրան ազատել կալանքից: Հակառակ դեպքում` բեկանել, փոփոխել 02.03.2017թ. որոշումը` կալանքը գրավով փոխարինելու մասով և որոշում կայացնել կալանքը գրավով փոխարինելու մասին՝ ճանաչելով գրավի կիրառումը թույլատրելի և սահմանելով գրավի ողջամիտ չափ:

ՀՀ քրեական օրենսգրքի 112-րդ հոդվածի 2-րդ մասի 14-րդ կետով՝ դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահը, մեղադրվող Արմեն Համազասպյանը երեք տարի գտնվում է կալանքի տակ, ներկայումս գործով դատաքննությունը շարունակվում է:

Լուսանկարը՝ Ֆոտոլուրի

Աղբյուր` Փաստինֆո