Փաստ ինֆո

Մեղրիում գործով բժշական կենտրոնում նեղ մասնագետների պակասի, իսկ եղած մասնագետների թերեւս ոչ բավարար պատրաստվածության հետեւանքով վերջին դժբախտ դեպք է գրանցվել՝ մահացել է քառասունամյա մի տղամարդ:

Շուրջ 300 մեղրեցիներ բաց նամակով դիմել են ՀՀ վարչապետ Կարեն Կարապետյանին ակնկալելով, որ վարչապետը կարձագանքի եւ լուծում կտա 12 հազար բնակչության սպասարկելու պատասխանատվություն ստանձնած բուժհաստատության՝ որպես այդպիսին գործունեությունն ապահովելու հարցին։ 

Ստորև ներկայացնում են բաց նամակն ամբողջությամբ.

Հարգելի՛ պրն վարչապետ,

Ձեզ են դիմում սահմանամերձ Մեղրու մի խումբ բնակիչներ։ Նախորդ տարվա գարնանը ՀՀ Նախագահի մասնակցությամբ մեր քաղաքում բացվեց «Մեղրու տարածաշրջանային բժշկական կենտրոն» ՓԲԸ-ն: Համաշխարհային բանկի կողմից ֆինանսավորվող «Առողջապահական համակարագի արդիականացում» վարկային ծրագրի շրջանակում բացված կենտրոնը, որը միավորեց «Մեղրու բժշկական կենտրոն» և «Ագարակի հիվանդանոց» ՓԲԸ-ները եւ որի կառուցման համարներդվեց 1.62 մլրդ դրամ, հագեցած է ժամանակակից տեխնիկայով եւ լավ կահավորված է։ Նման հնարավորություններով աննախադեպ կենտրոնի բացումը մարզում հույս ներշնչեց մեզ, որ սահման պահող մեր բնակչության համար ի վերջո կլուծվի լրջագույն օրախնդիր դարձած բուժօգնության հարցը։

Սակայն ավաղ, ավելի քան մեկ տարվա գործունեությունը ցույց տվեց, որ հիվանդանոցը շարունակում է մնալ «սպանդանոց», ու մենք առողջական ամենաչնչին հարցերի դեպքում էլ ստիպված ենք կրկին բռնել մայրաքաղաքի կամ մոտ գտնվող այլ քաղաքների (Կապան, Գորիս) ճանապարհը։

Բժշկական անձնակազմի՝ նեղ մասնագետների պակասի, իսկ եղած մասնագետների թերեւս ոչ բավարար պատրաստվածության հետեւանքով վերջին դժբախտ դեպքը գրանցվեց օրերս, երբ հիվանդանոցում մահացավ երկու անչափահասների հայր, քառասունամյա Սուրեն Սարգսյանը։ Սա վերջին, բայց ոչ եզակի դեպքն է, որից հետո ողջ բնակչության շրջանում կրկին բարձրացվում է չարաբաստիկ հարցը՝ ո՞վ է հաջորդը, ո՞ւմ հարազատը, երեխան կամ ծնողն, այսպես այլեւս չի կարող շարունակվել…

Պարո՛ն Կարապետյան,

Խնդրում ենք ուսումնասիրել բուժհաստատությունում ստեղված իրավիճակը եւ միջոցներ ձեռնարկել՝ պարզելու, ինչո՞ւ տարածաշրջանային նշանակություն ունեցող հիվանդանոցում այդպես էլ չեն լուծվում այնքան կարեւոր կադրային խնդիրները, եւ եկած որակյալ երիտասարդ կադրերը, «չդիմանալով մրցակցությանն», արագ լքում են մեր քաղաքը։

Լիահույս ենք, որ կարձագանքեք եւ լուծում կտաք12 հազար բնակչության սպասարկելու պատասխանատվություն ստանձնած բուժհաստատության՝ որպես այդպիսին գործունեությունն ապահովելու հարցին։

 Խմբագրությունում ստացված բաց նամակում կան նաեւ Մեղրիի բնակիչների ստորագրությունները։

Աղբյուր` Փաստինֆո