Փաստ ինֆո

Կենտրոնական ընտրական հանձնաժողովը օնլայն ռեժիմով հրապարակում է մայիսի 14-ին տեղի ունեցած Երևանի ավագանու ընտրությունների քվեարկության նախնական արդյունքները:

Ավելի քան հարյուր ընտրատեղամասերի քվեարկության նախնական արդյունքներով` ՀՀԿ-ն առջեւում է զգալի տարբերությամբ: Այսպես` մայիսի 15-ին` ժամը 00:30-ի դրությամբ ամփոփված տվյալների համաձայն ՀՀԿ-ի օգտին քվեարկել է ընտրողների 70.96 տոկոսը (99.212): «Ելք» դաշինքի օգտին ձայն է տվել ընտրողների 21.21 տոկոսը (29.650), «Երկիր Ծիրանի» կուսակցության օգտին՝ 7.84 տոկոսը (10.956):

Հիշեցնենք, որ մայիսի 14-ն տեղի ունեցած Երեւանի ավագանու ընտրություններին մասնակցում էր երեք քաղաքական ուժ՝ «Ելք» կուսակցությունների դաշինքը, «Երկիր Ծիրանի» և Հայաստանի Հանրապետական կուսակցությունները: Երեք ուժերի ընտրական ցուցակները գլխավորում են և, համապատասխանաբար, քաղաքապետի թեկնածուներն են Նիկոլ Փաշինյանը, Զարուհի Փոստանջյանը և Տարոն Մարգարյանը:

ԿԸՀ նախագահ Տիգրան Մուկուչյանի հրապարակած նախնական տվյալների համաձայն` Երևանի ավագանու ընտրություններին քվեարկությանը մասնակցել է 345 226 քաղաքացի կամ ընտրելու իրավունք ունեցողների 40,99 տոկոսը:

ՀՀ ընտրական օրենսգրքի համաձայն` Երևանի ավագանու անդամների մանդատները բաշխվում են այն կուսակցությունների և կուսակցությունների դաշինքների թեկնածուների ընտրական ցուցակների միջև, որոնք ստացել են ընտրություններում կողմ քվեարկված քվեաթերթիկների ընդհանուր թվի և անճշտությունների թվի գումարի համապատասխանաբար առնվազն` կուսակցությունների դեպքում` 6 տոկոս, իսկ կուսակցությունների դաշինքների դեպքում` 8 տոկոս կողմ քվեարկված քվեաթերթիկներ: Եթե Երևանի ավագանու ընտրությանը մասնակցում է մինչև երեք կուսակցություն, կուսակցությունների դաշինք, ապա մանդատների բաշխմանը մասնակցում են բոլոր կուսակցությունները, կուսակցությունների դաշինքները:

Այսինքն` անկախ արդյունքներից բոլոր երեք քաղաքական ուժերն էլ ներկայացված են լինելու Երեւանի ավագանու կազմում:

Աղբյուր` Փաստինֆո