Փաստ ինֆո

«Փաստինֆո»-ի տեղեկություններով՝ մայիսի 11-ին ԱԱԾ-ի կողմից կաշառք վերցնելու կասկածանքով ձերբակալված ՀՀ Արարատի և Վայոց ձորի մարզերի ընդհանուր իրավասության դատարանի դատավոր Լևոն Արազյանը որպես կասկածյալ հրաժարվել է ցուցմունք տալուց:

Ինչպես արդեն տեղեկացրել ենք՝ դատավորը բռնվել է ինքնիրավչության գործով կաշառք ստանալու համար։ Դեռևս ամիսներ առաջ՝ մարտի 7-ին, ՀՀ Արարատի և Վայոց ձորի մարզերի ընդհանուր իրավասության դատարանի դատավոր Լևոն Արազյանի վարույթ է ընդունվել ինքնիրավչության մի գործ, սակայն մինչև գործով առաջին նիստ նշանակելը դատավորը ձեռնամուխ է լինում ամբաստանյալի հետ ծանոթանալուն:

Ինքնիրավչություն մեջ մեղադրվող Գրիգոր Շամասուրյանին հեռախոսազանգի միջոցով հրավիրում են դատարան, իսկ արդեն դատավորի աշխատասենյակում քրեական գործի վերաբերյալ զրույցն ամփոփվում է դատավորի կողմից «պատրաստված գնա» արտահայտությամբ:

Թերևս սա եզակի դեպք չի, որ դատավորը Գրիգոր Շամասուրյանին հասկացնում է պատրաստված գնալու մասին, և միևնույն ժամանակ նախազգուշացնում է, որ ազատազրկման է դատապարտելու:

Ամբաստանյալն այդ պահին այս բառերի տողատակերը չի հասկանում, և հերթական դատական նիստից հետո դատավորը ամբաստանյալին կրկին կանչում է և իր աշխատասենյակում կրկին հորդորում «պատրաստված գնալ», այստեղ էլ ամբաստանյալը հասկանում է, որ դատավորը իր հոգեբանական վիճակի մասին չէ， որ անհանգստացած է:

Իսկ արդեն մայիսի 4-ին դատավոր Արազյանն ամբաստանյալի հետ փորձում է պայմանավորվածություն ձեռք բերել, ասել է՝ թե կարող է նրա նկատմամբ պատիժ նշանակել տուգանքի ձևով, որը կկազմի 300 000 ՀՀ դրամի չափով:

Հոդվածի սանկցիայով պահանջվող նվազագույն պատիժը հենց 300 000 ՀՀ դրամ է, սակայն այս պատժի դիմաց դատավորն ամբաստանյալից պահանջել է 600 ԱՄՆ դոլար:

Միևնույն ժամանակ դատավորը պնդել է, որ ամբաստանյալը գումարը տա հենց այդ օրը, բայց քանի որ ամբաստանյալի մոտ այդքան գումար չի եղել, վերջինս խնդրել է գումարը տալ մայիսի 10-ին:

Ըստ պայմանավորվածության էլ դատավորը մայիսի 5-ին դատավճիռը հրապարակել է ակնկալելով՝ մայիսի 10-ին ստանալ իր կողմից պահանջված գումարը:

Սակայն Գրիգոր Շամասուրյանը գտել է, որ դատավորը իր հանդեպ արդար չի վարվում և դիմել է Ազգային անվտանգության ծառայությանը:

Այսպիսով, «կաշառք տալու նմանակում» օպերատիվ - հետախուզական միջոցառման շրջանակում մասիսի 11-ին Արարատի և Վայոց ձերի մարզի ընդհանուր իրավասության դատարանի դահլիճում Գրիգոր Շամասուրյանը գումարը հանձնում է դատավոր Լևոն Արազյանին:

Արազյանը գումարը վերցնում և դնում է իր աշխատասեղանի վրա դրված մի գրքի, ոչ ավել ոչ պակաս Քրեական դատավարության օրենսգրքի 132-133 էջերի մեջ:

Կաշառ ստացած գումարը եղել է 6 հատ 100 ԱՄՆ դոլարանոց:

Ավելի վաղ տեղեկացրել էինք, որ փաստի առթիվ հարուցվել է քրեական գործ ՀՀ քրեական օրենսգրքի 311-րդ հոդվածի 4-րդ մասի 3-րդ կետով:

Արազյանը ձերբակալվել է մայիսի 11-ին՝ ժամը 19.10-ին, խոշոր չափերով կաշառք ստանալու կասկածանքով:

Մեր տեղեկություններով, դատավորը որպես կասկածյալ հրաժարվել է ցուցմունք տալուց, ինչպես նաև հրաժարվել է Գրիգոր Շամասուրյանի հետ առերեսման ժամանակ ցուցմունք տալուց:

Աղբյուր` Փաստինֆո