Փաստ ինֆո

50-ից ավել ընտրատեղամասերում տեսախցիկները չեն ֆիքսում չհրկիզվող պահարաններն, ինչը վկայում է այն մասին, որ Երևանի ավագանու ընտրությունը կեղծիքով են սկսել: Այս մասին հայտարարել է Երևանի քաղաքապետի թեկնածու, «Երկիր ծիրանի» կուսակցության նախագահ Զարուհի Փոստանջյանն՝ անդրադառնալով Աճառյան 22 հասցեում գտնվող Տարոն Մարգարյանի ընտրական շտաբում տեղի ունեցած միջադեպին։

«Կարծում եմ, ՀՀԿ շտաբում պահում էին ոչ միայն այն մարդկանց անունները, որոնց 5-10 հազար դրամներ էին բաժանել, այլև նրանց անուններն, ում գումար են տալիս բաժանելու համար: Մենք չենք ներխուժել՝դուռը բաց էր, բայց փորձեցինք տեսնել, թե ինչ ցուցակներ են: Մտանք, մի տիկին էր նստած, հավանաբար,սկզբում ինձ չճանաչեց, թվաց, որ իրենց հաճախորդներից ենք, բայց հետո հասկացավ, որ ես եմ ու այդ պահից սկսած պահեց փաթեթը դարակում և զանգեց իրենց շտաբի պետին: Շտաբի պետն եկավ շատ բորբոքված և սկսվեց ամենը: Եթե այդ ցուցակները բացահայտվեին, ներկայացվեին հանրությանը, ապա մարդիկ իրական փաստեր կունենային, բայց ամեն բան արվեց այդ ցուցակներին չծանոթանալու համար»,- հայտարարել է Զարուհի Փոստանջյանն՝ ընդգծելով, որ եթե որևէ վտանգ չկար, ապա կարող էին թույլ տալ ծանոթանալ այդ փաստաթղթերին:

Քաղաքապետի թեկնածուն նշել է, որ ինքը ափսոսում է, որ ներս մտնելուն պես չի բացել այդ փաթեթը և ներկայացրել լրատվամիջոցներին: Այդ դեպքում, ըստ նրա, ընտրակեղծարարության հստակ փաստեր կլինեին։ «Այս պահին աղջիկս, որն ուսանող է և նախապես էր հանձնել քննություններ ու եկել մասնակցելու այս քաղաքական գործընթացին, գտնվում է հիվանդանոցում: Նրա նկատմամբ եղավ բռնություն, նրա ձեռքերը ճանգռված են: Չգիտեմ՝ ով է տվել հրամանը, բայց երբ նրան առևանգեցին, այո, փաստացի առևանգեցին, ես չգիտեմ,թե ով հրաման է տվել ու նրան թողել են Մասիվ գնացող ճանապարհի վրա»,- հավելել է Զ.Փոստանջյանը:

Փոստանջյանի հայտնել է, որ ինքը տեղամասերում շրջելիս տեսել է նախկին պաշտոնյաների, թաղապետարանի աշխատակիցների, որոնք ընտրողներին ուղղորդել են: «Բոլորին դեմքով չեմ ճանաչում, բայց գիտեմ, որ նախկին պաշտոնյաներ են, որոնցից մեկն, ասես, Ավանի նախկին թաղապետն էր: Մենք հիմա կորստի շարժման մեջ ենք, իսկ այս անգամ մեզ այդ կորուստը չեն ների՝ ո՛չ սերունդը, ո՛չ աշխարհը: Մայիսի տասնհինգից հետո Տարոն Մարգարյանն ու իր ղեկավարությունն ամեն օր խնդիր են ունենալու, մենք լայն թիմ ունենք, համախոհներ ամբողջ աշխարհում, մենք ստեղծելու ենք քաղաքական պլատֆորմ, որպեսզի իրականություն դարձնենք մեր ծրագիրը։ Այլևս հնարավոր չի լինի հումանիտար ճանապարհով, այլ լինելու է այն ճանապարհ, որը տանելու է դեպի բանտախուց»:

Աղբյուր` Փաստինֆո