Փաստ ինֆո

Ոստիկանության պետի աշխատակազմի ղեկավար Մերուժան Հակոբյանը, Tert.am-ի հաղորդմամբ, այսօր Կենտրոնական ընտրական հանձնաժողովում հայտնեց, որ Երևանի ավագանու  ընտրությունների քարոզարշավի ընթացքում ոստիկանությունը ստացել է 19 ահազանգ, որոնցից մեկով քրեական գործի հարուցումը մերժվել է, երեք ահազանգով նյութեր են նախապատրաստվում, ութ դեպք ստուգմամբ դեռևս չի հիմնավորվել, վեց դեպք գտնվում է ստուգման փուլում, իսկ մեկ դեպք ուղարկվել է ոստիկանության ՃՈ ծառայություն:

«19 դեպքից 2-ը ստացվել է քաղաքացիներից, մեկը՝ ոստիկանի զեկուցագրի հիման վրա, 4-ը ԶԼՄ-ներից, 2-ը լրագրողներից, 10 ահազանգ կուսակցություններից կամ կուսակցությունների դաշինքից է եղել»,-ասաց նա և նշեց, որ ստացված ահազանգերից երեքը վերաբերել են ընտրական խոստումներին, մեկը՝ ընտրակաշառք ստանալուն: Երկու դեպք վերաբերել է քաղաքացու ընտրական իրավունքի ազատ իրականացման խոչընդոտմանը, 2-ը եղել է խուլիգանական արարք, բռնություն կամ ծեծ, մեկը ՝ հանձնաժողովականի լիազորությունների խոչընդոտմանն է վերաբերել, իսկ լրագրողի մասնագիտական գործունեության խոչընդոտման մեկ դեպք է գրանցվել, գրանցվել է ևս 9 այլ ընտրախախտման դեպք:

Ինչ վերաբերում է քվեարկության օրը ստացած ահազանգերին, Մերուժան Հակոբյանն ասաց, որ ոստիկանությունում ստացվել է 7 ահազանգ, բոլոր ահազանգերը գտնվում են ստուգման փուլում, դրանցից երկուսը ստացվել են քաղաքացիներից, երկուսը՝ ոստիկաններից և հինգը քաղաքական ուժերից:

«Յոթ դեպքերից մեկը վերաբերում է հանձնաժողովականի կամ վստահված անձի, դիտորդի աշխատանքը խոչընդոտելուն, մեկ դեպքը վերաբերում է մեկից ավելի անգամ կամ այլ անձի փոխարեն քվեարկելուն, մեկ դեպքը՝ քվեարկության գաղտնիության խախտմանը, և չորս դեպք էլ վերաբերում է այլ ընտրախախտումների»,-ասաց նա:

Աղբյուր` Փաստինֆո