Փաստ ինֆո

«Ելք» դաշինքը պահանջում է Կենտրոնական ընտրական հանձնաժողովից (ԿԸՀ)՝ Հանրապետական կուսակցության (ՀՀԿ) գրանցումը ուժը կորցրած ճանաչելու հայցով։ Այս մասին այսօր հայտարարել է Երեւանի քաղաքապետի թեկնածու Նիկոլ Փաշինյանը՝ ՀՀ կենտրոնական ընտրական հանձնաժողովի դիմաց հրավիրած մամուլի ասուլիսի ժամանակ։ Ըստ նրա՝ «Ելք» դաշինքին հաջողվել է փաստել ընտրակաշառքի ամենախոշոր դեպքը երրորդ Հանրապետության պատմության մեջ:

Նիկոլ Փաշինյանը պնդում է, որ Տարոն Մարգարյանն ընտրակաշառքներ է բաժանել իր պաշտոնական շտաբից: Ստեղծված իրավիճակում «Ելք» դաշինքը պետք է դիմի ԿԸՀ եւ դատարան ՀՀԿ-ի գրանցումը չեղյալ համարելու պահանջով: Հաջորդ քայլն այն է, որ քվեարկությունից հետո բոլոր այն ծրարները, որոնց մեջ կլինի օտար որեւէ բան բացի քվեաթերթիկը պետք է անվավեր համարվի, իսկ գունավոր գրիչներով քվեարկված քվեաթերթիկները պետք է համարել ոչ սահմանված նմուշի:

«Մենք ունենք ահազանգ եւ վկայություն, որ դուրս են բերվել քվեաթերթիկներ, ուրեմն պետք է բոլոր քվեաթերթիկները մեր վստահված անձի մասնակցությամբ հանձնաժողովի անդամների կնիքները դրվեն եւ այլն: Դրոշմապիտակներից հետո կնիքները չեն դրվում, պետք է դրվեն եւ վավեր համարվեն այդ քվեաթերթիկները»,- հայտարարեց Նիկոլ Փաշինյանը:

Երեւանի ավագանու ընտրություններում «Ելք» դաշինքի նախընտրական շտաբի ղեկավար Էդմոն Մարուքյանի տեղեկացմամբ երկու դիմում է ներկայացվել ԿԸՀ։ Առաջին դիմումը ՀՀԿ-ի գրանցումն անվավեր ճանաչելու դիմումն է, երկրորդ դիմումն այն դիմումն է, որ եթե, ըստ էության, մերժվի առաջին դիմումը, երկրորդ դիմումով կանխել ստուգման մեխանիզմը»,- պարզաբանեց Էդմոն Մարուքյանը:

Անդրադառնալով Տ.Մարգարյանի շտաբում քվեաթերթիկների տրամադրման հայտարարությանը՝ Կենտրոնական ընտրական հանձնաժողովի նախագահ Տիգրան Մուկուչյանը «Ազատության» եթերում պարզաբանել է， որ Տարոն Մարգարյանի շտաբում բաժանվել է ոչ թե իրական քվեաթերթիկ, այլ քվեաթերթիկի քարոզչական նմուշ:

Մուկուչյանի փոխանցմամբ՝ իրական քվեաթերթիկները տարածքային հանձնաժողովներում են, դրանք դեռևս տարածքային հանձնաժողովներին և ընդհանրապես որևէ մեկին չեն հատկացվել:
«Դրանք որևէ կապ չունեն այն քվեաթերթիկների հետ, որոնք քվեարկության օրը տրամադրվելու են քաղաքացիներին, նմուշը նույն է, դա քարոզչական բնույթ կրող նյութ է, որի վրա առկա է նմուշ ձևակերպումը, տպաքանակ է գրված, և դա ծառայել է որպես քարոզչական բնույթի նյութ, որպեսզի դրանով պարզաբանվի ընտրողների հետ հանդիպումների ժամանակ, թե ինչպես պետք է իրականացվի քվեարկությունը։ Մեզ տրված պարզաբանումը եղել է այդպիսին», - «Ազատության» հետ զրույցում ասաց ԿԸՀ նախագահը։

Լուսանկարը՝ Ֆոտոլուրի

Աղբյուր` Փաստինֆո