Փաստ ինֆո

Ստամբուլի հայությունը ստորագրահավաք է սկսել Պոլսո Հայոց պատրիարքի պաշտոնում մնալ շարունակող Արամ Աթեշյանի դեմ: Այս մասին տեղեկանում ենք «Արցախպրես»-ից:

Change.org կայքում բացված ստորագրահավաքի մասնակիցները պահանջում են Աթեշյանի հրաժարականը և նշում, որ վերջինս արժանի չէ զբաղեցրած պաշտոնին, արատավորում է Ստամբուլի հայ համայնքի անունն աշխարհում, ինչպես նաև չարաշահելով իր դիրքը՝ թալանում է Պոլսո Հայոց պատրիարքարանի նյութական ունեցվածքը: Նրանք պահանջում են նաև զրկել նրան արքեպիսկոպոսի հոգևորական կոչումից, հաղորդում է ։

Հիշեցնենք, որ փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի ունեցավ Պոլսո Հայոց պատրիարքի տեղապահի ընտրություն: Ընտրությունից հետո, որում համոզիչ հաղթանակ էր տարել Գարեգին Բեկչյանը, Ստամբուլի նահանգապետարանն անակնկալ կերպով միջամտել էր ընտրություններին: Ստամբուլի նահանգապետի տեղակալը նախքան պատրիարքարանում ընտրությունների սկսվելը գրություն է ուղարկել, որն իրավաբանորեն անհնար է համարում պատրիարքական ընտրությունների գործընթացի մեկնարկը: Այս գրությունը Պոլսո Հայոց պատրիարքի տեղապահի ընտրություններից անմիջապես հետո պատրիարքարանի հոգևորականներին է ներկայացրել տեղապահի ընտրություններում պարտված փոխանորդ Արամ արքեպիսկոպոս Աթեշյանը և հայտարարել, որ չի հեռանա տեղապահի պաշտոնից:

Նշենք, որ Պոլսո պատրիարք Մեսրոպ Մութաֆյանը կոմայի մեջ է գտնվում 2008թ.-ից և փաստացի չի կարող կատարել պատրիարքի իր լիազորությունները։ Նրա փոխարեն այդ լիազորությունները կատարում էր Արամ արքեպիսկոպոս Աթեշյանը, որն ընտրված է ոչ թե համայնքի, այլ պետության կողմից:

Ստամբուլի հայ համայնքի ներկայացուցիչները տևական ժամանակ է՝ պահանջում էին կայացնել նոր ընտրությունների անցկացման որոշում՝ ցանկանալով իրենց առաջնորդի դերում տեսնել ոչ թե պետության կողմից նշանակված, այլ իրենց ձայների արդյունքում ընտրված անձի:

Աղբյուր` Փաստինֆո