Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի առողջական վիճակն այսօր համեմատաբար լավ էր: Այդ մասին դատական նիստից հետո լրագրողներս տեղեկացանք Իշխան Բարսեղյանից:

Հիշեցնենք, որ նախորդ դատական նիստին Իշխան Բարսեղյանի համար դատարան շտապօգնություն էր հրավիրվել և տևական ժամանակ բժիշկները նրան բժշկական օգնություն էին ցուցաբերում:

Իշխան Բարսեղյանի զարկերակային ճնշումը կտրուկ բարձրացել էր, դեղորայքային միջամտություն էր կատարվել բժշկի կողմից, սակայն չէր հաջողվել լիարժեք կարգավորել նրա ճնշումը, իսկ հոսպիտալացնելու վերաբերյալ շտապօգնության բժիշկին առաջարկը Իշխան Բարսեղյանը մերժել էր:

Գործով այսօրվա դատական նիստին չէին ներկայացել Բարսեղյանի 6 պաշտպաններից ոչ մեկը:

Նիստը նախագահող դատավոր Վաչե Մարգարյանը ներկաներին տեղեկացրեց, որ գրություն էր ստացվել դատարան, առ այն, որ Իշխան Բարսեղյանի պաշտպան Վարդուհի Էլբակյանը վիրահատվել է և ներկայումս գտնվում է «Էրեբունի» ԲԿ-ում՝ ստացիոնար բուժման մեջ, դիմումին կից տեղեկանք էր ներկայացվել առողջական խնդրի մասին:

Իշխան Բարսեղյանի մյուս պաշտպաններ Վլադիմիր Գրիգորյանը և Արա Ղազարյանը դատարանի գրությամբ հայտնել էին, որ այլ գործերով ծանրաբեռնվածություն ունեն և խնդրել էին հարգելի համար իրենց բացակայությունը, իսկ մյուս 3 պաշտպանների վերաբերյալ դատարանը որևէ տեղեկությունը չէր ստացել:

Այսպիսով, անհարգելի համարելով պաշտպաններ Լիանա Գրիգորյանի, Կարեն Ղազարյանի և Կարեն Հովհաննիսյանի բացակայությունը՝ դատարանը որոշեց նրանց նկատմամբ կիրառել դատական սանկցիա, և դիմել Փաստաբանների պալատ՝ պատասխանատվության ենթարկելու համար:

Այսպիսով, պաշտպանների բացակայության պատճառով դատական նիստը հետաձգվեց և նշանակվեց մայիսի 20-ին:

Աղբյուր` Փաստինֆո