Փաստ ինֆո

Զենքի կամ որպես զենք օգտագործվող այլ առարկաների գործադրմամբ ավազակության մեղադրանքով 40-ամյա Արմեն Մուրադյանը Մալաթիա-Սեբաստիա վարչական շրջանների ընդհանուր իրավասության դատարանի դատավճռով դատապարտվեց 6 տարվա ազատազարկման:

Ըստ մեղադրանքի՝ Արմեն Մուրադյանը 2015թ. դեկտեմբերի 27-ին ժամը 17:00-ի սահմաններում， իր ծանոթ Դավիթ Կարապետյանի հետ միասին գնացել են Աիդային պատկանող բնակարան，որտեղ Արմեն Մուրադյանը օգտագործել է ալկոհոլային խմիչք։ Ապա՝ Աիդայի  հետ առանձնացել է նրա ննջարանում, որտեղ բռնություն է գործադրել վերջինիս նկատմամբ և որպես զենք օգտագործվող դանակի գործադրման սպառնալիքով պահանջել գումար և ոսկյա զարդեր։   Կինը հրաժարվել է կատարել Ա.Մուրադյանի պահանջը՝ հայտնելով, որ գումար ու զարդեր չունի，ինչից հետո  Ա.Մուրադյանը կպչուն ժապավենով կապել է  նրա ձեռքերը, ոտքերը，ինչպես նաեւ փակել բերանը， ապա տուժողի զգեստապահարանից գտել դրամապանակը， հափշտակել   առկա 25 000 ՀՀ դրամը，եւս  2000՝ մետաղադրամով, ինչպես նաև մոտ 10 000 ՀՀ դրամ արժեքի էժանագին զարդեր:

Այսպիսով, Արմեն Մուրադյանին մեղադրանք է առաջադրվել ՀՀ քրեական օրենսգրքի 175-րդ հոդվածի 2-րդ մասի 4-րդ կետով  և նրա նկատմամբ որպես խափանման միջոց է ընտրվել կալանավորումը:

Արմեն Մուրադյանը և գործով տուժողը գտնվել են մտերիմ հարաբերությունների մեջ， փաստացի ամուսնական հարաբերությունների մեջ գտնվել եւ Արմեն հաճախակի է նրան այցելել:

Փաստինֆո-ի թղթակցի հետ զրույցում Արմեն Մուրադյանի պաշտպան Հանրային պաշտպանի գրասենյակի փաստաբան Էմին Բեգլարյանը նշեց, որ իր պաշտպանյալն առաջադրված մեղադրանքում իրեն մեղավոր չի ճանաչել, իսկ նախաքննությամբ ձեռք բերված և դատարանում հետազոտված ապացույցներն էլ բավարար չէին մեղադրական դատավճիռ կայացնելու համար:

Ըստ պաշտպանական կողմի՝ դեպքի օրը Արմենը, ընկերոջ՝ Դավիթի， հետ գնացել է Աիդայի տուն, միասին հաց են կերել, ալկոհոլ  օգտագործել: Ապա Աիդան， ով կողմի ներկայացմամբ ունի հոգեկան առողջության հետ կապված խնդիրներ， Արմենի հասցեին անվայելուչ խոսքեր ու նաև հայհոյանքեր է հնչեցրել,  ինչը սաստելու համար Արմենը նրան տարել է ննջարան՝  «կարգի հրավիրել, սակայն Աննան ցնցումների մեջ է ընկել ու որպեսզի նա ինքն իրեն չվնասի Արմենը կպչուն ժապավենով կապել է նրան»:

Պաշտպանի խոսքով՝ տեղի ունեցածից հետո Աիդան Արմենի հետ գնացել է վերջինիս տուն եւ մի քանի օր մնացել այնտեղ, որից 10- օր հետո հաղորդում է տվել, թե ինքը ավազակային հարձակման է ենթարկվել։ Փաստաբանը նշում է, որ ավազակային հարձակում չի եղել, այլ Արմենը պարտքով վերցրած գումարը խոստացած ժամկետում չի կարողացել վերադարձնել գումարը, ուստիեւ կինը այդկերպ վերժխնդիր է եղել:

Արմենը իր ցուցմունքում նշել է, որ եթե ցանկանար այդ գումարը վերցնել， ապա դա կարող էր անել առանց որևէ խնդրի，    քանի որ ունեցել է նրա  բնակարանի բանալիները և գումարի տեղը ևս ինքը իմացել է:

Փաստաբանի ներկայացմամբ՝ տուժողը եւս դատարանում ասել է， որ ավազակային հարձակում տեղի չի ունեցել և հավելում, որ ինքը ամբաստանյալի պաշտպանությունը ստանձնել է տուժողի ցուցմունքից հետո， ուստիեւ դատարանին միջնորդել է տուժողին կրկին հրավիրել և հարցաքննել, ինչը բավարարվել է:

Սակայն տուժողի ներկայությունն այդպես էլ հնարավոր չի եղել դատարանում ապահովել:

Ինչ վերաբերում է գործով անցնող Դավիթ Կարապետյանին, ապա փաստաբանը հայտնում է, որ ի սկզբանե տուժողը մեղադրել է նրան, սակայն նախաքննական մամինը նրա նկատմամբ քրեական հետապնդում չի իրականացրել այն հիմքով, որ բացի տուժուղի անորոշ ցուցմունքներից այլ ապացույցներ ձեռք չեն բերել: Դավիթ Կարապետյանը գործով վկա է ճանաչվել:

Պաշտպանի գնահատմամբ,  ստացվում է երկակի մոտեցում են ցուցաբերել, մի դեպքում տուժողի ցուցմունքները անորոշ են եղել և անձի նկատմամբ քրեական հետապնդում չի իրականացվել, իսկ մյուս դեպքում՝ անձին մեղադրել են ավազակային հարձակման մեջ:

Աիդայի կողմից Արմենին պարտքով գումար տալու մասին， պաշտպանի խոսքով， գործում առկա է վկայի ցուցմունք,  ըստ որի Աիդան իրեն խնդրել է՝ Արմենին ասել, որ պարտքով տված գումարը շուտ վերադարձնի:

Նշենք, որ մեղադրող դատախազը  միջնորդել էր Արմենին մեղավոր ճանաչել առաջադրված մեղադրանքում և դատապարտել 8 տարի ժամկետով ազատազրկման:

Պաշտպան Էմին Բեգլարյանն էլ  միջնորդել էր արդարացնել իր պաշտպանյալին:

Ավազակային հարձակման մեջ մեղադրվող Արմենը դատարանում հանդես գալով վերջին խոսքով հույս էր հայտնել, որ արդարացի և պատճառաբանված դատավճիռ կկայացվի:

Աղբյուր` Փաստինֆո