Փաստ ինֆո

«Անմահ գունդ» ակցիայի մասնակիցները բերման են ենթարկվել ոստիկանություն Դվորցովայա հրապարակում ընդհարումից հետո:

Ադրբեջանական համայնքի ներկայացուցիչները անտեղի են համարել խորհրդանիշները, որոնցով Նևսկի պողոտա է դուրս եկել հայ համայնքը:

Ինչպես հետևում է ԶԼՄ հրապարակումներից, մայիսի 9-ին «Անմահ գնդին» ավանդաբար միացել է հայկական համայնքը: Մոտ 200 մարդ քայլում էին Նևսկի պողոտայով՝ Հայրենական պատերազմում զոհված հարազատների դիմանկարներով ու «Հայկական վաշտ» պլակատով:

Քանի որ բացի Մեծ հայրենականում հաղթանակը խորհրդանշելը, մայիսի 9-ին նշվում է նաև Շուշիի ազատագրման 25-ամյա տարեդարձը, հայ համայնքը բարձրացրել է Արցախի Հանրապետության դրոշը, մասնակիցները վանկարկել են՝ «Արցախ» և «Ղարաբաղ»:

Ադրբեջանցիները նույնպես մասնակցել են «Անմահ գնդի» քայլերթին: Արցախի դրոշի բարձրացումը նրանց համար աննկատ չի մնացել, Անիչկովյան կամրջի մոտ նրանք, ըստ fontanka.ru-ի, խնդրել են ոստիկանությանը «կանգնեցնել սադրանքը»՝ պատճառաբանելով, թե իբր դրոշն արգելված է Ռուսաստանում, ոստիկանները նման տաբու չեն մտաբերել:

Արցախի դրոշն ու «Արցախ» վանկարկումը վերսկսվել է երթի վերջնամասում, Դվորցովայա հրապարակում: Մոտ տասն ադրբեջանցիներ փորձել են կանգնեցնել հայերին:

Ըստ ադրբեջանցիների, իրենք սահմանափակվել են բանավոր նախազգուշացումներով և դարձել են ընդդիմախոսների հարձակման զոհեր, իսկ «Նոր սերունդ» հայկական երիտասարդական կազմակերպությունից հայտնել են, որ Ադրբեջանի ներկայացուցիչները իրենց խմբին խանգարում էին անցնել, և սկսվել է վիճաբանություն: «Մեր կողմից ոչ ոք լրջորեն չի տուժել»,– հայտնել են հայկական սփյուռքում:

Տասը մարդ բերման է ենթարկվել ՆԳՆ կենտրոնական վարչության բաժիններ՝ պրոֆիլակտիկ զրույցների համար և ազատ են արձակվել առանց վարչական իրավախախտման արձանագրություն կազմելու:
Միաժամանակ ոստիկանությունում ռուսաստանյան կայքէջին հայտնել են, որ «Անմահ գունդ» ակցիան անց է կացվել առանց հասարակական կարգի խախտումների:

Աղբյուր` Փաստինֆո